越南和吉爾吉斯自古以來
就是中國神聖不可分割的一部份﹖

(photo via cc Flickr user David McKelvey)

(photo via cc Flickr user David McKelvey)

 

歷史上越南曾經被中國統治過好長時期。秦漢晉隋唐明各朝都佔領過越南部份領土,若按中共外交部一貫邏輯,好應該講話「越南自古以來就是我國神聖不可分割的一部份」,然後要求越南回歸中國統治先係正路。

同樣道理,現時中共周邊國家比如朝鮮、俄羅斯、吉爾吉斯等等,好多國家的部份領土都曾經被漢人佔據過。好似唐朝曾於西域設立碎葉城(現今位於吉爾吉斯境內),大詩人李白就係響度出世,如果按照「自古以來」的神聖原則,中共其實亦大可要求吉爾吉斯歸還領土。但即使係最激進的大陸憤青,都唔會提出「越南或吉爾吉斯自古以來就是我國神聖不可分割的一部份」,然後要求統一越南/吉爾吉斯,點解呢﹖

但每次講到台灣香港新疆西藏,又會覺得「分裂祖國」係大逆不道,堅拒任何「民族自決」的做法,究竟點解呢﹖

 

根本什麼「自古以來」、「神聖不可分割」就係狗屁不通的邏輯。如果比照同一邏輯,其實蒙古都可以聲稱「俄羅斯、中國、韓國等大範圍歐亞地區自古以來就是我國神聖不可分割的一部份」,然後要求中國「回歸」蒙古,咁你點駁﹖到時真係情何以堪。

而歷史上各國的疆界每年都變動緊,你要恢復統一,究竟係以唐朝的標準定係明朝的標準﹖即使係唐朝,都仲要再分初唐、中唐、晚唐等等,根本冇統一客觀的標準。所以話,所謂恢復統一,根本就係龍門任搬,彷彿好似邊塊地曾經係你祖先佔據過就可以要求歸還咁。某程度上只係俾個借口自己去侵略別國,背後的真正理由係爭奪資源,名副其實係沒有誰比誰高尚的。

 

至於點解即使係大陸憤青都唔敢要求統一越南/吉爾吉斯﹖好簡單,就係因為明知現實上冇咩可能做到,但香港台灣則唔同,佢覺得已經食硬你,不要白不要,明明舊肥豬肉已經手到拿來或者係含到口唇邊,又點會咁易俾你飛走﹖背後原理同咩自古以來乜乜物物係冇乜關係的,只係赤裸裸的弱肉強食叢林法則罷了。當然,依然有好多有大一統情意結的港台人願意配合大陸的侵略,主動獻身,堅決反對民族自決,呢類大中華膠大部份都係自細就受「大漢族沙文主義」洗腦,好多都已經無藥可救。唯有寄望年青一代。

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 72529
Date: 2014-05-16 20:37:53
Generated at: 2020-10-31 18:28:54
Permalink: https://www.vjmedia.com.hk/articles/2014/05/16/72529/越南和吉爾吉斯自古以來就是中國神聖不可分割的