在心態上,法西斯離中國也很近

政治 / 最新文章綜覽

鄧小平

 

近幾年,有段段子三不五時就會響大陸論壇上出現:

「1987年,菲律賓前總統訪華,在談到南沙群島的所有權時,這樣說道:『至少在地理位置上,那些島嶼離菲律賓更近。』鄧小平也毫不示弱地說了一句:『在地理上,菲律賓離中國也很近。』從此以後,南沙再無戰事。」

 

呢段文字,堪稱係大陸憤青「飛機文」的表表者。呢幾年來,呢段段子已經被各大討論區瘋傳過無數次,有時更會同另外幾篇飛機文一併列入「最中國的9句外交語錄」入面。每當有人轉載呢段野,大陸網民都會無比雀躍,留言力撐「鄧爺爺」,讚佢係偉人、偶像,順便諷刺當今中共政府外交上的軟弱無能。

當然,叫得做飛機文,就梗係老作架啦。事關1987年根本冇菲律賓總統訪華,一切都只係子虛烏有。有人考證過,最先提出呢個故事的帖子,係響2008年的天涯社區。當時那帖沒有提出任何來源出處。之後各大論壇紛紛轉載,尤其當中菲因黃岩島主權問題關係緊張時,呢段野更獲瘋傳,留言者力讚鄧小平有之,侮辱菲律賓有之,諷刺當今領導人亦有之,偏偏就係冇人會嘗試指出,如果段野屬實,其實鄧小平係相當失禮同霸道。

 

但中國網民唔會咁諗。佢地極大部份人都覺得,鄧小平呢句「菲律賓離中國也很近」係相當有霸氣,展現強國領導人的「大國風範」。其中當然亦有好多人乘機發表侮辱菲律賓及其國人的歧視言論,在此不贅。呢種反應,好反映到而家大陸網民普遍都有種「大國要崛起」、外交上要更加強硬,「寸土必爭、半步不讓」的心態。響佢地心目中,菲律賓、越南呢啲只係東南亞的蠻夷小國,係「老美響亞洲彖養的守門狗」,同強大的中國並非同一檔次,自然無需以平等角度看待。所以冇咩人會覺得嗰句野其實響外交上相當失禮,背後隱藏著「你老幾呀﹖我唔吞咗你呢個小國已經好俾面啦﹗」的帝國霸權心態。

而呢種帝國霸權心態,其實係「大中華統一思想」在作祟。呢種思想,先係真正的極右法西斯。所以話,在心態上,法西斯其實離中國也很近。但響香港居住的大中華左膠,往往對以上現象視若無睹,反而怪責香港人法西斯,對真正的極右法西斯卻多加迴護,甚至視佢地為弱勢。呢啲正正咪就係佢地左膠口中的「只拍蒼蠅,不打老虎」囉﹗

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 73617
Date: 2014-05-27 22:24:37
Generated at: 2020-11-29 09:08:51
Permalink: https://www.vjmedia.com.hk/articles/2014/05/27/73617/在心態上,法西斯離中國也很近