讀史有感:崇禎的方丈管理學

公有圖片

公有圖片

 

以亡國之君來計,明末的崇禎都可以算係最慘情的一個。崇禎皇帝並唔昏庸,亦唔懶惰,更唔係冇心搞好國家,相反佢不知幾勤政,不近女色,日日做足十幾個鐘,日以繼夜夜以繼日咁為國事操勞。但最終都係難免一死,所謂「天要下雨,國要死人」,內憂外患加上個小冰河時期,當李自成一打到來,京城仲係疫症橫行,真係氣數已盡,非人力所能挽回。

 

崇禎帝十六七歲登基,在位十七年,死時先至三十三歲。崇禎登基一個月,就剷除魏忠賢羽翼崔呈秀,令魏忠賢恐懼自殺,又殺與魏相通的客氏,為民除害,真係「行公義」。佢又重視「講真話」,為大批冤獄平反,重新起用一批被魏忠賢罷黜的大臣,令皇朝現出一番新氣象。

可惜崇禎呢個人雖有雄心壯志要搞返好個帝國,又有能力,但佢本人太急進,諗法又五時花六時變,朝令夕改,往往令人無所適從,呢個正正就犯左管理上的大忌。崇禎一朝,最為人所詬病的,就係所謂「崇禎五十相」。即係佢在位十七年間,竟然總共起用過五十位內閣閣臣,可謂破晒歷史紀錄。除返開等於平均一年換三位宰相,每位得幾個月貨仔。

即係每位閣臣做左幾個月,櫈都未坐暖就又話要走。皆因崇禎疑心重,諗法多,求治心切,往往見你冇咩成效就換第二個人上。每次起用官員大將,都係好有誠意,對你超好,好似佢任用袁崇煥咁,仲賜予尚方寶劍,真係俾足面,搞到袁將軍感動流涕。但轉過頭,只要你令佢唔滿意,佢就會立即反面,話貶官就貶官,要凌遲就凌遲,絕對唔會「好憐憫」,直情係小器過方丈。

而「崇禎五十相」入面,亦不乏有能之士,可惜能人做唔長,奸人就係咁用。好似清末陸以湉《冷廬雜識》所形容:「明崇禎朝五十相,文震孟最賢,入閣三月遽罷。而奸如溫體仁,輔政乃至八年之久。是猶病劇而投以峻削之劑,欲不亡得乎!」可謂一矢中的。

但崇禎皇帝從來唔會反省自己剛愎自用、用人不當的問題。總之,大明國係屬於崇禎嘅,佢鍾意點調就點調,除左佢本人之外,帝國「冇左邊個都得」,你唔好理咁多,一句「goodbye」就送走你。佢曾經講過:「朕非亡國之君,諸臣皆亡國之臣。」可見佢同項羽都有共通點,都鍾意諉過於人,自己就毫無問題。

 

明末清初的張岱曾於《石匮書後集.烈帝本紀》中嚴厲批評崇禎帝的管理方針,幾百年後再讀亦感受到佢的悲痛:「先帝焦於求治,刻於理財;渴於用人,驟於行法:以致十七年之天下,三翻四覆,夕改朝更。耳目之前,覺有一番變革;向後思之,訖無一用:不亦枉卻此十七年之精勵哉!即如用人一節,黑白屢變,捷如弈棋:求之老成而不得,則用新進;求之科目而不得,則用薦舉;求之詞林而不得,則用外任;求之朝寧而不得,則用山林;求之薦紳而不得,則用婦寺;求之民俊而不得,則用宗室;求之資格而不得,則用特用;求之文科而不得,則用武舉:愈出愈奇,愈趨愈下。……揆厥所由,只因先帝用人太驟、殺人太驟:一言合,則欲加諸膝;一言不合,則欲墮諸淵。以故侍從之臣,止有唯唯、否否,如鸚鵡學語,隨聲附和已耳。……『諸臣誤朕』一語,傷心之言。後人聞之,真如望帝化鵑,鮮血在口;千秋萬世,決不能幹也!嗚呼痛哉!嗚呼痛哉!」

以崇禎之勤政,竟落得如斯下場,今人讀之,尤其是做老闆或做管理的,真係不得不為之戒呀﹗

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 73683
Date: 2014-05-28 17:54:52
Generated at: 2020-10-31 19:07:45
Permalink: https://www.vjmedia.com.hk/articles/2014/05/28/73683/讀史有感:崇禎的方丈管理學