九十後的回憶:欣欣杯

(原載於:Waikin’s Quote

 

由細到大,我都好鍾意食零食,乜嘢旺旺啊、味覺糖啊、媽咪麵啊,統統都係小息放學嘅主要食糧。當中有一款係我到而家依然容易唔記得,但又曾經食過嘅,就係明治嘅欣欣杯喇。

前幾日樓下商場搞咗每月一度嘅四洲小型食品展,見到一堆優惠零食,無意中响芸芸零食裡面,畀我搵到欣欣杯。之後一幕幕同欣欣杯相關嘅回憶,從腦海裡面浮返哂上嚟。

 

相信好多九十後都曾經食過欣欣杯。雖然好好食,但係又真係唔平,當時一杯都已經賣五蚊樓上(相比之下,卡樂B薯片賣兩三蚊),以我小學嗰陣每日十蚊零用錢(鬼叫我窮咩?)嚟講,真係好甘,不過間唔中買嚟體驗吓,嗰種點嚟點去嘅感覺都唔錯嘅。

所謂嘅「點嚟點去」,就係攞住一條條餅乾條去點杯內另一邊嘅醬料,呢個係欣欣杯嘅一大賣點。之但係最衰嘅,就係啲醬料少得好可憐,依著平時點麥樂雞嘅力去點欣欣杯嘅醬料,真係未到第五條都已經差唔多無哂咁滯。我真係想搵發明欣欣杯嘅蛋散,然後打佢一鑊。

 

我最鍾意就係朱古力味,幾乎買親都揀呢款口味。我記得除咗朱古力味,士多啤梨味亦好受歡迎,存貨最多嘅都係佢,直到而家。至於其他口味,包括呍呢嗱味,就好似好少見,如果無留意嘅話,重以為欣欣杯得兩款咁Dry。

唔好睇小佢個杯,原來除咗愛嚟裝餅乾條之外,重可以有其他用途。Lego Cheung同我講,食完之後用嚟做水杯,但係奈何當時我細細個諗唔通,食完之後抌咗就算。近排更加有學生利用欣欣杯,組團搞咗「欣欣杯音樂會」,認真有創意。

 

縱使而家大個咗,時間唔多,忙完呢樣又要忙嗰樣,根本無乜時間食,回憶返以前得閒就嘆嘅時代,真係令人回味無窮。不過食還食,都係唔好食太多,食到肥咗就唔好喇。

 

(編按:D 醬咁少,細個中過伏就唔食鳥~)

 

作者:韋健

韋健
「九十後的回憶」系列作者,現《輔仁媒體》特約記者。FB專頁:http://www.facebook.com/waikinquote

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 74525
Date: 2014-06-07 16:21:17
Generated at: 2020-06-02 00:10:07
Permalink: https://www.vjmedia.com.hk/articles/2014/06/07/74525/九十後的回憶:欣欣杯