上年年尾路姆西Hit到爆炸個陣，我地偉大既黨國領導人梁特寫左篇《與狼共桌》既Blog文，有評論就話呢篇Blog好唔梁振英，似係當時就嚟履新白宮發言人政府新聞統籌專員既馮煒光係後面指點江山。姑勿論呢篇blog對梁振英個人形象有咩特別建樹、篇文係咪真係咪馮煒光背後指點，對於一般港豬普羅大眾而言，係公關傳訊層面之上，確實有一種比董曾年代耳目一新既感覺。站係公關傳訊角度而談，固然喜見政府帶頭作少量進步改變，但諗深一層，政府宣傳策略不斷進步而民間傳訊手法一成不變之餘又愈趨離地之際，對於所謂既民主運動、議題關注組織者黎講，呢次進步並唔係一個警號咁簡單，而係一場災難既開端。
梁振英與路姆西（轉自行政長官官方網頁）
回顧二零一四年首半年政府宣傳廣告、梁振英本人行徑，唔難發現決策局對政策宣傳比過往兩屆政府更到位、更中point，甚或乎梁振英本人既言論亦都針中左好多港豬心目中既「道德底線」。
先用影響最大，講得最耐，炒得最熱（再loop排比既我就黎拍得住中共班黨官~）既2017政改諮詢做下例子，打開政府係Youtube既Channel， 無論由林鄭擔大旗既有商有量既諮詢廣告，去到搵班同筆者一樣咁大既後生仔女講政府對普選既立場、步驟、對基本法既詮釋，甚至搵埋肥媽拍既維穩廣告，都有幾個不可忽視既共通點：
– 主旨完備
– 簡短
– 生活化
撇開政見唔講，單純以廣告論說，頭先提過個三個廣告確實做到傳訊工作入面既基本條件：易明、入屋，搵一班演員扮市民，強調「一人一票＝普選」（都話唔拗呢樣岩唔岩住咯），搵班學生強調普選要符合基本法原則（唔拗岩唔岩住阿頂你～），用幾十秒時間確立左「特區式普選＝一人一票、合基本法」（頂你，唔拗岩定唔岩住阿～係咪唔識字阿你～），簡短得嚟又易記，仲要搵埋肥媽教煮餸做比喻嚟洗你班港豬腦，將爭議性極高既問題完全忽略，港豬們根本唔需要記得普選既定義，只要記得肥媽教落普選好似煮飯仔咁，要就晒全家人口味，唔可以你話減肥就大晒話晒事，最緊要和和諧諧、河河蟹蟹，係你屋企負責玩煮飯既阿媽或者老婆個腦入面建立到呢一種意識，呢幾個廣告就已經好似好美X髮彩既效用咁樣，得左。
譚志源（紅圈者）跳埋入去扮市民，老老實實，比好多泛民拍廣告拍得都要有心機。
呢兩條廣告係Roadshow入面都有播，如果你屋企負責煮飯個個已經將政改同肥媽Mix埋一齊架話，證明呢條廣告傳訊效用有幾大。
廣告呢樣野，最棹忌就係長、長得嚟無主旨、拍完之後唔知嗡乜，頭先個幾個政改廣告只係做完左基本野，就已經成功打動左港豬既民心，點解會咁？我唔直接話比你聽，我用例子講比你知，以下呢條片，睇個陣唔好睇牌子，你睇完一次就明佢到底Sell咩既，唔洗話我知，你可以默默咁將隻mouse移去X位到Close左呢篇文佢。
做人唔比較呢就無意思既，要論說政府係公關戰上如何贏泛民朋友一籌，我地又搵返搞得最大、傾得最耐、籌備得相當長時間既和平「佔」中運動嚟做比較。
同樣都係YouTube Channel，入面有好多佔中支持者既分享，或者主辦者戴教授、朱牧師既演說等等等，所花既心思心血，確實值得敬佩，拎政府司局級參與度嚟對比，譚志源對戴耀庭當然係小巫見大巫。不過傳訊工作對港豬嚟講，易明易入腦一定重要過你到底放左幾多心機，筆者就見證過自己做兼職既公司點樣係一份promotion到落足錢落足心機，最後換來無人問津既悲慘結局，你比幾多錢幾多時間幾多心血去做一件事，係港豬當道既世界根本就Who fucking cares.
回歸正題，和平「佔」中個Channel，片就真係夠多，能夠簡短地中Point既Video，確實真係少之又少。清楚解釋普選定義既有公民學堂系列，但係片中訊息易唔易入屋，就真係見仁見智，要一個師奶記個毒男易D定記肥媽易D，你叫你阿媽/老婆入嚟睇睇條片就會搵到答案。片中用語趨向網絡化、年輕化係一件好事，網絡群體巨大，一項公民運動爭取到網民支持確係一個正面成效。但係切記一回事，網絡世界內外既民意係差天共地，同一樣社會議題，係電腦Mon內電腦Mon外，就已經有兩種好極端既取態，又唔信？聽日返學返工之前問問你樓下個保安點睇新界東北，再將同一條問題打上Facebook問問，你又會拎到呢條既答案。而爭取民主普選，並唔係網民圍爐取暖既活動，整個社會體系、三百幾萬名選民統統都係持份者，你拍條片淨係爭取年輕網民支持，而忽略廚房師奶既需要，得罪D講句，有咩用呢？
議題宣傳，鞏固既有支持者其實係次要，開拓新支持者來源先係首要任務，本身對一件事有興趣有關注既人，自自然然就會繼續去搵、去睇佢有興趣既事，唔駛任何人對佢做任何宣傳，等於睇波咁樣，你條女要係鍾意睇足球既，就唔會好似成龍咁貼巴塞贏冠軍啦。你以為真係日日唱下「是問誰人未發腥聲」，拍條片上去Youtube、Facebook, Share下、Forward下，個門常開就會冧落嚟、聽日就可以拍個屁股去投票？ 你 一 定 以 為 自 己 個 樣 好 靚， 唱 歌 好 好 聽 啦。
當然，泛民都有拍過出色既作品既，五區公投呢條片，咪成功拎到年青人以外既支持囉。
呢篇文目的並唔真係去讚政府係傳訊工作上面做得幾好，有幾進步，而係告戒一班以關心社會公義為己任、以充權、平等為生存意義既朋友，有好多事情，你地唔做，對家就已經有人做緊，仲要慢慢咁進步到好成熟。新界東北發展，有團體拒絕將議題提升到全港層面去抗爭，但係你地既對家，阿陳波波局長，已經同班馬仔拍好晒片，用全港層面既論述去反擊你地。
你知唔知呢一句可以令一個運動喪失幾多支持者？你仲要叫人用三分鐘去睇發生咩事？
SHIT,仲要係上集..人地三條廣告加埋都唔洗五分鐘阿，係加埋都唔洗五分鐘阿，你覺得港豬會睇你定睇個三個先阿？
當然，崇優鄙劣先係真正既處事態度，要做好傳訊工作，唔好再抄政府廣告，拍D 咩時機已經成熟出嚟啦，呢D唔係叫幽默諷刺，只係黔驢技窮既表現。要學既就學民主先驅，要吸引你眼球既，60秒就已經綽綽有餘。
“How Parliament works in nearly 60 seconds” ：
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年6月27日
