飯局人言

上回：《朋友飯局》

（photo via cc Flickr user austinevan）

話說上回講到朋友Y頂朋友A和B唔順，他們不關心社會卻助紂為虐，還厚顏在朋友飯局中大放厥詞，阿Y直斥其非以後拂袖離去，剩下一臉怒火卻依然不知悔過的AB，還有其他正在吃花生的朋友C至Q。

C小姐：「嘩，阿Y 憤青上身？」

好一個「憤青」，Y君最討厭的名詞，幸好他已離座，否則著多把火，對不公不義憤怒，匹夫有責，這個光怪世界不知何時如此陸離，識時務者就是俊傑，講句公道話就是憤青。

D君：「我唔理你們仨邊個啱邊個唔啱，總之阿Y發脾氣仲走埋，就係冇禮貌，就係唔啱。」

「總之病」患者發作了，把任何事情以千份之一秒慢鏡重播，然後抽取其中一格來做文章，是詭辯的基礎，思辨的惡夢，係呀，總之發嬲發脾氣不對，對方為何失望和義正辭嚴？抹殺所有前因，單單拿其中一定格做無線劇集家婆家姑式是非，的確冇得輸嘅。

H姐：「阿Y又普選又公民提名又梁振英又共產黨，政治呢尐嘢好深嘅，我呢尐師奶仔乜都唔識㗎。」

很好的見解，係呀，政治好深㗎，妳樓下價X棧每天多人多車到迫到妳出馬路行，妳巴士車費愈來愈貴但班次愈來愈疏，妳阿囡奶粉學位乜都要撲，妳家旁那個公眾泳池三幾日就發現浮屎…… 全部都係最攪政治嘅梁振英政府一味媚共，漠視本土利益而衍生嘅民生問題，一定唔關政治事，俾尐掌聲自己。

至於其他英文字母男女，繼續討論三色台所謂花旦的私隱舞姿好唔好睇，那個英國佬廚神奧利華在銅鑼灣開了新意大利餐廳日不如下次大伙兒去試下，還有三色台2130那齣有郭晉安的劇集到底誰是幕後黑手。

看來Y君離席並冇影響呢班最討厭政治的朋友的雅興，雖然席上還有某君看似欲言又止，不過他腦海裡忽然響起達明一派某首歌的旋律，他最後不動聲色徐徐拿起不鏽鋼叉，卷了一串Carbonara Pasta來吃。

至於那首歌是甚麼？後生尐嘅朋友可能都未聽過 — 《十個救火的少年》。

作者：爽健

不求聞達於諸侯，只願笑傲賞江湖。

閱讀後覺得好，請多多讚好及分享～：）