女人之苦

(photo via cc Flickr user Lisa Roe)

(photo via cc Flickr user Lisa Roe)

 

女人經常被人標籤,太早拍拖就話你隨便、太遲拍拖又話你係剩女;太叻就話你係女強人、太蠢又話你係無知婦孺;靚就話你係花瓶、唔靚就話你係豬扒,如果你因為那些八公八婆的一句說話便影響心情,那真是太無謂了,所以小盛女亦不想再花篇幅講這些無聊嘢,始終把口生喺人地度,唔到你控制,你可以做到的只是控制自己的EQ。

 

心理因素可以控制,但生理呢?只能說我輸了(請用普通話唱出),相信每月一痛真係玩死唔少女人,有男性友人說:「女人真係好,郁D又可以話M痛請病假!」好明顯呢位人兄係完全唔理解M痛有幾辛苦,我亦唔怪佢,因為男人無親身經歷過,唔理解亦無可口非,即使如何繪影繪聲地描述,佢地亦很難想像。講真,我寧願在公司OT到天昏地暗都唔想M痛請病假在家「典床典蓆」!

坊間有很多減輕M痛方法、飲寶礦力溝水、飲薑茶、食朱古力、食天喜丸、食必利痛、食避孕丸、用暖水袋、用經痛貼、趴住瞓、聽音樂、墊枕頭落小腹、雙腳提起踩單車、睇中醫調理身體、以上方法除了食避孕丸外,我全部都試過,結果:無_用。每次都要捱過死神36小時才可以平靜下來,真係「除了忍耐,還是忍耐」。

到底M痛有幾辛苦呢?除了撕裂般的痛,還會又痾又嘔、食乜嘔乜、唔食嘢就嘔黃膽水,只能在床上典來典去,幾分鐘便要轉一個pose,有時會因為失血過多而暈陀陀,要扶著牆邊才能去洗手間,陣痛36小時後就會無事,然後一個月後又再嚟過,真係熱烈地彈琴熱烈地唱。

 

有人說生BB後便不會再痛,頂,唔通我而加求其搵個人同我生咩大佬!其實小盛女都知道呢個問題係無辦法解決,只係希望大家可以體諒一下身邊嘅女性朋友或女同事,而當女朋友慘叫向你求救嘅時候,你可以遞上一盒朱古力或一個暖水袋,甚至是一句簡單的「我會陪住你」,相信已是最有效的止痛方法。

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 80363
Date: 2014-08-02 23:10:19
Generated at: 2022-09-28 13:41:55
Permalink: https://www.vjmedia.com.hk/articles/2014/08/02/80363/女人之苦