從中共談判策略看香港政改討論

中國共產黨黨旗

 

香港行政長官產生方法由之前嘅叫價期,進入依家嘅談判期。中國共產黨同香港人嘅談判,有好多種方式。通過傳媒拋出種種議題,例如「袋住先」,「唔係終點,可以改良」,係其中一種方式。鼓勵香港嘅「溫和派」掟出種種「妥協方案」,係另一種方式。如果條件許可,同某啲泛民中人進行密室談判亦係方式之一。要同中國共產黨傾嘢,最好梗係「知己知彼」,睇吓佢哋嘅談判策略啦。

 

中國共產黨其實係一個好叻嘅政黨,但好多人特別係香港人,其實唔係好明白呢一點。喺中國歷史上,佢哋搞咗好多次密室談判,幾乎次次都係贏家。1920年代,國民黨同中國共產黨密室傾掂第一次國共合作,通過成立黃埔軍校,為共產黨培養出包括林彪、徐向前等解放軍將領。

1937年,國共經過7個月內6次密室談判,促成第二次國共合作,被國民黨迫到守喺江西省井崗山嘅共產黨爭取到喘息嘅機會,留番啲最難打嘅仗俾國民黨同日本人打,終於坐大成功,喺1949年成立政府。

共產黨唯一蝕底嘅一次,就係1980年代同台灣嘅李登輝搞密室談判,俾李登輝摸清楚共產黨嘅底,然後李登輝就宣布「戒急用忍」,拒絕同大陸融合。

但到2010年同香港嘅民主黨密室談判,就又成為大贏家,搞到香港泛民分裂,令到香港泛民嘅「五區公投」唔齊人,聲勢大減;而且最犀利嘅係,香港「泛民」中間形成心結,彼此猜忌,至今不能撫平。

 

中國共產黨好叻談判,經常有斬獲,咁究竟佢哋叻在乜嘢地方呢?

 

喺策略上,中共一貫會採取主動,提出先決條件;有學者就話,佢哋犀利在,提出談判嘅前提,往往就係佢哋嘅目的。例如大陸同台灣談判,前提就係要承認「兩岸同屬一個中國」原則;而中央同香港民主黨喺2010年嘅談判,就係香港民主黨唔好參加「五區公投」。總之,談判對手只要應承咗前提,就已經正中內地下懷。內地嘅談判專家會不斷重申佢哋嘅「先決條件」,直至你相信呢啲「先決條件」為不可談的前提。相信今次大陸要同香港人傾,亦會以「不談公民提名」作為先決條件,因為佢哋最怕就係呢味嘢。

另一個大陸談判嘅策略就係「原則優先細節」;例如大陸同台灣談判嘅「兩岸同屬一個中國」原則,北京成日強調「一個中國」嘅內涵唔使傾住,兩岸可以各說各話,咁樣,大陸政府雖然唔承認台灣當局嘅合法地位,但亦唔會同台灣當局反咗面先。

中共同香港人傾行政長官產生,共產黨亦一味話「傾普選」,啲魔鬼當然就係啲細節到。例如港澳辦張曉明就講到明,大原則係「一國先於兩制」,「普選要符合國家利益同安全」,呢個係冇得傾嘅。北京嘅香港方針大原則係要確保香港可以控制,特首係信得過,靠得住嘅人,唔會阻住太子黨進行內幕交易,唔會調查太子黨喺香港洗黑錢。

而喺呢個「大原則」之下,提名委員會嘅公司票可以變成董事票,共產黨肯同香港人慢慢傾嘅,就係呢類「細節」。

值得關注嘅係,「細節」有好多種,仲有一啲「細節」,共產黨就未必會同你傾咁多喇。好似提名門檻,百份之二十可以肯定冇乜可能。因為咁嘅話會影響太子黨利益,又或者GRAND啲嘅「國家安全」。如果北京喺提名門檻方面願意讓步,咁佢哋多數係「移形換影」,改為限制參選人數等。

仲有,大陸最叻就係喺對手陣營中挑選「最適當的談判對手」。例如北京最鍾意嘅台灣談判對手,梗係支持「一個中國」原則嘅馬英九,而唔係反對「一個中國」嘅陳水扁啦。對香港事務,中央上次就揀咗「冇咁企硬」嘅香港民主黨坐低慢慢傾。

 

就係憑呢三道板斧,大陸喺談判桌上,幾乎次次都無往而不利。筆者較為悲觀,覺得香港人不了解中共,亦唔知人哋嘅談判策略,所以次次都中招收場。總之,北京嘅香港方針,主要係要確保香港人唔好阻住太子黨發財,佢哋亦有好多招數招呼你哋呢班TOO SIMPLE, SOMETIMES NAÏVE嘅香港人!

 

作者:蔣紫

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 81156
Date: 2014-08-09 15:29:42
Generated at: 2020-10-30 22:37:34
Permalink: https://www.vjmedia.com.hk/articles/2014/08/09/81156/從中共談判策略看香港政改討論