【中佬手記】決心決定勝負,兵工廠響頭炮

 

社運界有一名句:「 It’s all about determination! 」放諸四海皆準架,遠至英倫球壇,開季前例行公事「社區盾」,又係決心決定勝負。

上季英超冠軍曼城同足總盃盟主阿仙奴喺溫布萊球場相遇,兩隊都係寓賽於操,正選陣容相當生口面。主要嚟講,係新球員有得踢、後備球員有得踢、踢世界盃但早段出局嘅都有得踢。但係大牌正選就冇喇,唯有聚焦睇下新兵係咪對辦,好過冇。

 

曼城嘅正選陣容包括新加盟嘅門將卡巴尼路、少有踢右邊嘅基歷治、拿斯達錫、好陌生嘅舊人保亞達、串演左翼嘅高拉洛夫、忽左忽右嘅拿斯尼、耶耶托尼、新防中費蘭度、捷西斯拿華斯以及一對前鋒祖維迪同迪斯高。阿仙奴陣容相對地完整少少,正選門將施捷斯尼、由紐卡素轉會嘅迪布基、修咸頓新仔張伯斯、哥斯爾尼、基比斯、韋舒亞、阿迪達、喺世界盃十分搶眼然後三千幾萬鎊轉會嘅阿歷斯山齊士、艾朗藍斯、辛迪卡蘇拿,以及因為熱身賽入好多波而備受吹捧嘅耶耶辛洛高。

原本諗住睇智利翼鋒阿歷斯山齊士嚟到英超係咪一樣咁威水,但我又唔記得咗呢隊係猜到勻、猜到你暈都仲未入到禁區嘅阿仙奴。佢同隊友未配合到,想要波但又唔知去邊度攞,好幾次喺前場都係睇住隊友猜到絲絲入扣,搞到存在感好低,簡稱多餘。打陣地戰嗰陣,佢上腳亦唔似喺西班牙咁任我行,因為對手防守密啲又快啲。

反而初段踢得最搶嗰個叫迪布基,佢踢晒成條右邊邊線,包返嚟中間封阻拿斯尼勁射亦有功勞。佢右邊嘅出波都相當有質素,阿仙奴球迷可以安心放低沙洛拿。

出咗大半隊後備嘅曼城冇乜邊個特別話搶眼,或者靠聽聲可以知道拿斯尼相當活躍攞波嘅。 (按:拿斯尼係阿仙奴球迷眼中嘅叛徒) 一對中場耶耶托尼同費蘭度滋柔淡定,加上保亞達質素所限,拿斯達錫又心不在弦,結果去到 20 分鐘,辛迪卡蘇拿禁區頂攞到波扣橫再拗腰射遠柱,地波收死卡巴尼路先開紀錄。

 

近年嘅阿仙奴向來清風送爽就越踢越順,話咁易又憑一次快速反擊,阿歷斯山齊士右路傳個斜直線畀耶耶辛洛高,論論盡盡入到禁區交畀後上嘅艾朗藍斯,面對壓力下乖巧一推一射成二比零。嗱,上面話阿歷斯山齊士同隊友未有默契,但踢反擊嗰陣人少少,畀佢推深兩步再傳個波有質素嘅波出嚟,又唔係真係咁難嘅。

半場落後兩粒嘅曼城下半場換咗大衛施華出嚟,又真係有一段虛火,要施捷斯尼飛撲一下。不過,阿仙奴陣容始終比較完整,仲換埋正印中鋒基奧特出嚟。呢位法國國腳不負雲加所託,離門廿幾碼抽腳曲墜波笠死卡巴尼路。場波仲有三分一左右,就已經進入垃圾時間。曼城陣中出現久違嘅米卡里察士同史葛冼佳亞,以及未見過嘅蘇古連尼。冇所謂啦,唔好整親妨礙開季就算囉。

阿仙奴一贏陣容二贏鬥心,今場喺三位德國國腳缺陣嘅情況下,仍然輕取曼城,新加盟嘅迪布基同張伯斯都相當對辦,而阿歷斯山齊士明顯需要更多時間去融入球隊,但來夜方長啦。仙奴相當深厚嘅後備深度,加上球隊冇咩主力流失,今季英超前四應該唔難。兩個可能係杞人憂天嘅問題:一:球隊由歐聯外圍賽開始踢起,會唔會重複上季季尾大跌 watt 嘅覆轍?二:前鋒仍然靠基奧特擔大旗,耶耶辛洛高啲走位同波底明顯唔夠班,有咩事唔通靠阿歷斯山齊士踢 False 9 ?

雲加用佢嘅 determination 去為阿仙奴帶來九年來第二個錦標,柏歷堅尼就用呢 90 分鐘畀啲二三線球員上陣取下經。就好似打機咁,派啲低級兵去打正規軍,取得嘅經驗值通常零舍高。新兵費蘭度同費蘭甸奴作用相似,不過身型好啲,冇咁鋼條。祖維迪繼續同隊波唔夾,保亞達就真係算吧啦。但球隊點樣克服大衛施華不在陣中嘅時候,球隊進攻欠缺重心嘅問題呢?

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 語言陷阱(上):闕義、歧義、含混 by 楊梓燁
    這種因為語法結構的問題,而造成一個語辭(詞語、字、句子)在某語境裡有兩個或以上的意思,便叫做「語法歧義」。這種歧義的其他例子,例如有「求學不是求分數」,可以理解成「求學,不是求分數」,又可以開玩笑地理解成「求學?不,是求分數!」。又例如算命…
歡迎讚好我們的facebook page,免費資訊源源送上。

文章資訊

ID: 81396
Date: 2014-08-11 00:46:08
Generated at: 2022-11-27 14:31:43
Permalink: https://www.vjmedia.com.hk/articles/2014/08/11/81396/【中佬手記】決心決定勝負,兵工廠響頭炮