偷懶是求生之道

（photo via cc Flickr user Charles Williams）

細細個父母就經常苦口婆心地叫我地唔好偷懶。返學唔好偷懶，溫書唔好偷懶，學琴唔好偷懶，打波唔好偷懶。只要有恆心，鐵柱磨成針，我知。身為打工仔既我，我既恆心只係為每月出糧，咩係柱咩係針，我真係唔知。

問心，除咗玩，有邊個未試過偷懶？但係我自問我係expert。吓？偷懶就偷懶啦，有分level既咩？有！Professional既偷懶，就係要冇人知你係度偷懶。話明係「偷」，唔洗再解釋下話？

出黎做野，如果你唔識偷懶，真係死路一條。你有幾個死既方法：

俾老細操勞至死
俾同事笑死/跣死/屈死/捽死
俾你另一半「哦」你冇時間陪佢「哦」死

方法千奇百怪，千變萬化，不能盡錄，總之就係死啦。

咁父母由細到大叫我地唔好偷懶咪害死我地? 說話唔好咁講，那些年我地入世未深，為免我地胡亂運用而走火入魔，父母唯有好好保護我地。只係到我地懂性，父母冇教我地做人要適時偷懶，就好似你父母永遠唔會透徹地教你了解性教育一樣。

我有個同事好勤力，做野好似成隻牛咁衝，晚晚OT，成個office都知，但老細都唔滿意佢。唔係佢ability有問題，唔係佢time management有問題，因為佢唔識偷懶。你會問，唔係應該偷懶蛇王先至搞到自己OT既咩? 可能呢位同事都係秉持呢一個信念，但係佢千算萬算，竟然算漏咗老細呢種生物。你要知道老細係無定向風，你永遠唔可以100%估到佢想點。老細每日俾無數個task你，張to-do list有加冇減，勤力又點會係唯一解決辦法。

其實老細都係人，佢有咁多條「O靚」，每人每日俾咁多個task，你唔好以為佢真係會記得哂佢叫你做咩。你要做既，首先係摸清老細性格，唔係叫你擦鞋，而係你要知道老細會最先催你交邊一個task。簡單講，就係要識排priority。唔係個task對個公司客戶最重要嗰種priority，而係你老細心目中最重要的priority。例如，老細今朝叫你趕起份proposal俾大客，叫你做好份report俾大老細，叫你約時間開meeting，叫你幫佢今晚book枱同老婆橕枱腳。唔洗我教，你都知第一樣野緊係幫佢book咗枱先啦。

你會話，鬼唔知咩，咁其他咪又係要照做，咪又係要OT搞掂佢。第二步，就係要識SAY NO，我淨係聽過Customer is always right，冇聽過Boss is always right。如果有任何task你認為唔合理唔efficient唔effective，請你直接同老細三口六面講清楚。橫竪都係死，何不死得壯烈一點? 雖然你認為99.9%老細都係無理，你都要抱住0.1%希望去說服佢。相信我，老細大部分都願意接納意見，因為佢相信「不聽老細言，吃虧在眼前」，到你衰咗佢就有大條道理指責你嘅愚見。請相信你自己嘅能力，到件事完滿解決，一嚟你可以剝老細棚牙，二嚟你可以做少好多不必要嘅功夫。

結果咪又係要做，幾時先可以偷懶呀？ 最後，就係要係咁多個task之中，揀50%你可以遲d做，揀20%老細突然間催你先做，10%直接唔做。你今日要做嘅，只係你張to-do list其中嘅20%。其他時間，當然係pantry吹水，放2個鐘lunch，上facebook上youtube上online shop。To-do list仍然有加無減，so what？

吓？嗰10%唔理？老細唔催？咪講咗囉，首先係摸清老細性格。查實老細呢頭講完，佢真係唔記得自己講過。就算記得，佢再提返起都已經由plan A轉咗做plan B，你死做懶做做咁多個plan A出黎有鬼用咩。我個同事就係日日係度OT做十萬個plan A，轉個頭就俾老細話佢做啲垃圾出黎。記住，敵不動我不動，老細一日未知自己想點，你點勤力都係徒勞無工。

講到呢度，你仲未明白偷懶嘅精髓？你叫定下午茶今晚OT啦。

而我點解係expert？現在時間為下午3時，work-related productivity = 0%，剛剛lunch hour正午12時至下午2時。過去一小時，咪打緊呢篇文囉，仲問？我仲有facebook 未update, youtube未睇。斃! 夠鐘團購秒殺！

作者：芝游

不是作家，只是閒來喜歡寫作。性格慢熱卻爽朗, 愛抱打不平卻不喜歡出頭。曾於外國留學，但無一外語精通。最愛旅遊，突顯自己的渺小。

閱讀後覺得好，請多多讚好及分享～：）