一個副學士過來人的故事

(photo via cc Flickr user See-ming Lee 李思明 SML)

(photo via cc Flickr user See-ming Lee 李思明 SML)

 

這個星期,是很多UGC的Degree仔女們既RegDay,即係註冊日。「他們」即將拎到大學學生證(張相通常都整到你包面),而如果「他們」是讀PolyU,他們會被逼做好多好硬膠的FitnessTest同PsychoTest,同一時間,「他們」將會成為很多OCamp搞手及Hall莊的目標,「他們」的煩惱,很多都圍繞住去唔去/去邊個OCamp,又或者係今年住唔住/住邊個Hall等等。當然,如果「他們」的樣子俊俏/甜美,「他們」又會成為獸母/獸父的目標(當然都可以角色對調),開展「他們」的A(X)toA(X+N)戀愛or/and性愛生活。因為讀左咁多年書,通常就係為左唔洗再讀書。

「去唔去大O好?」
「你都ON9既,識去梗係去細O啦~」
「但係大O個組媽好靚呀頂你﹗」
「靚又點呀,你估輪到你上咩?」
「屌,講呢D,咁住唔住HALL好呀?」

在同一西鐵/東鐵上,都係去紅磡搞學生證既你,聽住旁邊「他們」既對話,你有D唔明「他們」講咩,又或者你好明「他們」講咩,不過你更加明「他們」所講既一切都唔關你事。因為同是去紅磡拎學生證,人地就去A出口,你就去B出口;人地就去香港理工大學,你就去香港理工大學—香港專上學院。人地就興奮莫名,你就悲痛莫名。

 

副學士,AssociateDegree,簡稱Asso,就好似失敗者的名稱。至少好多好多中學老師會向學生講:Asso無用、切記切記唔好讀。但係佢地唔明,讀咩,有時候真係唔到你話事,講真,唔通有Degree收我我會去讀Asso咩。不過今時唔同往日,2008年果時你點衰都有Asso讀,但係334DSE開始之後,有好多人連Asso都無得讀。「咁睇我都算唔差,起碼都有Asso讀」你盡力咁安慰自己,縱然你知道你全家都唔係咁睇。其實副學士的學費唔係真係貴學士好多,而且好窮既你GRANTLOAN都一樣包哂,不過屋企人總係覺得俾錢讀大學就無問題,但係俾錢讀副學士就係浪費金錢,原來多左個「副」字,咩都唔同哂。

 

講到呢度,你可能覺得我講風涼話,又或者你覺得我會寫一D好傳奇既神人故事,其實唔係,我只係想講下我既故事、我既體驗俾大家聽。

的確既,年代唔同,我果時中五仲要考會考,而我第一次會考放榜得4分。放心,會考4分,其實同文憑試4分完全無分別,即係咩都唔係囉。係呢個時候,會有老師搭住你講:「唔緊要,每個人才能唔同。」你其實明佢想講:「同學其實你都無咩讀書既才能。」自問都無咩俾過心機,咪試下重讀考多次,咁4分原校實唔收,你咪唯有去「現代/英皇/遵理」呢類0分都收既學校重讀。呀,我本身都淨係想考番個5科合格,點知又俾我過14分升左中六,咁咪諗住試下俾心機考埋上大學,就算係ApplyPhysics呢D「神科」都好呀。結果,我UE(UseofEnglish)F左,咩都唔洗諗,轉個灰身就去報Asso。

就係咁,2008年,我走左去報讀副學士。係填報名表果刻,我呆左,佢問我想讀咩。有咩問題?無,係我從來諗過要讀咩姐,唉屌是但,聽講果個咩健康學有七成都升讀到註冊護士課程,護士,人工高、又缺人,畢業連sendCV都唔洗,醫院就會搵你返工。仲諗?即報啦,個面試其實都幾HEA,就係咁就收左。

 

結果一讀,唔知搞咩俾我讀到科社會學,先發現一路都無諗過想讀咩、真心將來想做咩。其實咁大個人,都從來無試過真心鍾意去讀去研究一樣野,純粹為讀為前途而讀,結果我轉左去讀社會科學。我知,你地會覺好浪費時間姐,我又唔咁睇,起碼都識or/and食左個護士女朋友呀。讀左社會科學,我先發現原來真係有一D書係你真心鍾意讀,果兩年,我睇左既文、重要有七成係英文,超越我中學生涯既十倍。而成績呢,唔,第一個SEM都係拎過4分,不過今次係GPA4分,完全唔同。跟住既學期都係咁過,日頭係香港專上學院既電腦室、夜晚就去理工24,日做夜做,好L辛苦但又好有動力,就係咁升左上去理工讀社工。

可能因為咁既經驗,好多老師都會搵我分享我既經歷。而我每一次都係同師弟妹講,搵下自己想讀咩其實先最重要。係既,如果單從百分率咁計,讀社會科學升上去既人比讀護士既人少太多,但係我諗如果我繼續讀護士,我諗我就係升唔到個三成。又如果我一早諗下自己想做咩,我就唔洗咁辛苦,去讀個社工副學士咪得囉,反正出來做野人工差無幾。

 

講左咁耐,其實想同打算/即將讀副學士的你們講咩呢?

第一:既然你都無Degree收,要讀Asso,不如就搵自己想讀既野讀。唔好因為咩科好似易升番上去而讀自己唔鍾意/擅長既科,因為就算個科有6成人升到,你唔鍾意、讀唔好,你咪又係個升唔到個4成人。又就算你升到,係咪真係好呢?我識得個女仔,佢硬升讀computersciencedegree,結果三年來,個個SEM過二風雲、quitU邊緣,仲差D憂鬱,何苦呢?

第二:就算個科前途再好,你唔係個科既人/你根本唔鍾意,都係浪費人生。小弟做緊份工都算係第一志願,差唔多每樣野都係自己鍾意做,但日復一日,有時搭車返工都會係耳邊響起「邊一個發明了返工」的主題曲,如果返工四十年(係架,香港唔中六合彩,好多時都做到退休架),都係做自己唔鍾意既野,好可能好快你就成為精神健康宿舍既院友。

第三:副學士,好多時係文憑試既延續。香港地,成績係升大學之前始終重要(唔代表我同意呢個制度),學鍾劍華講,升學係香港根本就係一個篩選過程。要升上去,就要面對好多你唔想面對既野。對好多中中既同學,就係英文。唔好同我語言霸權,如果你係識英文同中文,而唔選擇用英文,係一回事;但係你唔識英文而唔能夠用英文學野,係另一回事(積極與消極自由)。講真,要100%升上去,GPA無3.5都幾難。

好啦,最後講句廢話:各位同學,人生,總有失意既,而無論你今日係升大學定讀副學士,唔同既失意最終都會不斷出現係你人生當中,學陳某講「精彩不亮麗、起落是無常;沒路亦殘存,笨人找亮路」。將軍們,亮路,始終係你自己找出來,唔好俾一時的失意打沉你。

兩年前有一雙孖女係資訊日衝過來問我話想讀社工,我差唔多都係講上面既野。結果當年佢地一個讀IVE,一個讀HKCC,佢地覺得呢行係佢地真心想做既,所以好努力咁讀,結果今年兩個都升左上理大社工(好似係)。一時失意,不代表一世失意,得意亦然。

 

作者:菠蘿

廢社工一名

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 81726
Date: 2014-08-13 03:56:48
Generated at: 2021-10-20 02:51:24
Permalink: https://www.vjmedia.com.hk/articles/2014/08/13/81726/一個副學士過來人的故事