【中佬手記】歷史、新聞、預言

民主黨入中聯辦

 

好一個星期三,由風平浪靜到山雨欲來,到黃色暴雨警告轉紅色,到雨勢緩和再轉黃色然後取消所有信號。之後再重覆一次整個過程。最後,雨終於落晒,大家有覺好瞓。

想講一段歷史。 2010 年,民主黨三位阿哥阿姐去咗西環,同中聯辦官員閉門會面,之後決定支持政府提出嘅政改方案。立法會由 60 席變成 70 席,新增五席直選、五席「超級區議會」功能界別。當年冇「原地踏步」,官媒歸功於民主黨肯同中央溝通、達成共識。雖然,選民喺 2012 年立法會選舉用選票表態,民主黨議席數目八變六,用百分率表示,係少咗 25% 。你試下份糧少咗 25% ,你會知係咩一回事。

2014 年,政改談判同樣陷入僵局,「佔中」同「反佔中」泥漿摔角打到面目模糊,中央同港府「消息人士」相繼放風講到明要高門檻篩選,甚至唔怕同你玉石俱焚,無論係政改被否決又好,真係佔領中環又好,總之驚你有牙。喺曬馬嘅同時,一班有頭有面,向來親建制但相對地形象溫和嘅大人物出嚟聯署倡議尋求共識,便宜地戴上光環走上道德珠峰。鬼唔知政治係妥協嘅遊戲,有共識就 Win-Win ?問題係,要市民讓步定係要中央讓步?呢班偽中立人士由頭到尾冇講明。但舖好晒嘅路,就係畀以「溫和民主派」自居嘅立法會議員下台階,一方面賣甩「激進民主派」,另一方面可以獲得「顧全大局」嘅讚賞。

 

歷史,遲早重複。

 

2012–14 Iraqi protests: Iraqi Sunni demonstrators protesting against the Shia-led government. (公有圖片)

2012–14 Iraqi protests: Iraqi Sunni demonstrators protesting against the Shia-led government. (公有圖片)

 

講完古,講下今。中東局勢繼續立立亂,「時事評論員」張翠容喺港台節目《左右紅藍綠》分析「伊斯蘭國」崛起,貫徹一個中心思想:「千錯萬錯,美國嘅錯」。點解有伊斯蘭國 (ISIS) 崛起?因為美國 2003 年攻打伊拉克,推翻薩達姆政權,狙擊遜尼派殘黨。然後翻舊帳翻到美國為咗拉攏庫爾德族對抗伊朗同利亞,搞到地緣政區不穩。至於今日嘅亂局,就係美伊戰爭嘅結果。如果觀眾照單全收,產生一面倒嘅反美思想絕對唔出奇。

但係講到阻止 ISIS 嘅暴行,平日行文充滿人文關懷、對生命價值珍而重之嘅張翠容又話美軍空襲 ISIS 唔係辦法,仲引用美國總統奧巴馬嘅說話,佐證武力解決唔到問題。好啦,咁我作為觀眾引頸以待等呢位前度戰地記者、現任「時事評論員」提出佢嘅真知灼見啦,點知原來又係一句「極需各國共同合力解決」。喂,我年年生日都許願世界和平架。

再睇下張翠容嘅 Facebook ,過去一個月,除咗加沙,都係加沙。以色列攻打加沙就係一切,憐憫加沙人民就係一切。嗱,我冇以偏概全架,真係一直掃落去都係以巴衝突嘅新聞同文章。至於 ISIS 喺中東嘅種族滅絕、殘酷行刑等行為,如果你嘅 Facebook 只係關注張翠容一位富有國際視野又走過烽火大地嘅權威, sorry 你真係唔會知。

又然後,獨媒有篇名為《少談ISIS,就代表不關心嗎?》嘅文章,解釋關心時政嘅知識份子為咗「抗衡的媒體力量不一樣」,為咗填補「對以色列的鞭撻卻少之又少」嘅空白,所以多寫以巴衝突而少寫 (或者唔寫) ISIS 。講真,鬥力都要睇下同邊個鬥。如果係同國際傳媒如 CNN 、 BBC 之流對抗,咁點解唔係寫英文而係 keep 住喺香港網站寫中文文章畀返香港人睇?抑或預期外國傳媒會埋伏喺獨媒等出稿然後 Google Translate 以作平衡報道?如果想畀香港人知道巴勒斯坦人好慘,呢個擔心真係多餘,由傳統嘅新聞到 Facebook 嘅 posts ,以巴衝突嘅內容絕對唔會少。再講,以色列有冇揚言佔領世界、有冇話要攻打歐亞各國?斷斤秤,邊個危機大鑊啲?

我又返返去一個問題:如果有一班人,佢哋嘅生活就係飲飲食食,以前只會上《主場新聞》關心世界,家下《主場》摺咗就睇獨媒知識份子嘅報道,咁佢哋會睇到一個點嘅世界、接收到咩資訊?唔好唔記得,好多香港人好忙, Like 一篇文章對佢哋嚟講可能已經盡咗公民責任,肯 Share 嘅就更加功德圓滿。如果沒有誰比誰的生命更高尚,又如果大家都承認以色列同 ISIS 所犯嘅都係屠殺罪行嘅時候,點解唔係各打五十大板,左一篇以色列停火,右一篇 ISIS 可恥?公正持平客觀評論嘅社會責任去咗邊?

 

準備收筆,展望一下將來。如果 2017 年特首選舉大家同意政府呼籲而「袋住先」,喺過半數提名委員會支持下出到閘畀市民選出嘅到底會係咩人?好明顯係中央明示或默許可以接受嘅人選。問題係,點解一位提名委員明知當選名額只得一個,但仍然會提名多過一個人參選?係精神分裂?定係覺得「我覺得甲幾好,乙又唔錯,都唔知點揀好」?講白啲,提名超過一個人,猶如食兩家茶禮,參選人為求「出閘」而爭相派發政治油水,提委自然肥過肥仔水。

咁如果大家覺得高提名門檻唔妥,結局好似官方咁講要到 2027 先有得再傾,又如何?以香港過去兩年赤化嘅速度嚟睇,如果等到 2027 年又真係爭取到符合國情又符合國際標準 (好似好矛盾) 嘅選舉方式,到時香港嘅人口結構都肯定又紅又愛黨,中央根本唔需要擔心安全系數不足嘅問題。換句話講,袋住先又好,一拍兩散又好,結果都一樣。

至於歷史會點樣記載呢件事,以歷史係由勝利者書寫嘅原則嚟講,民主黨嘅何俊仁、劉慧卿同張文光應該可以名留青史。如果你問我,唔想咁樣,可以點樣? Sorry,當「時事評論員」都畀唔到有用嘅建議畀你,我答你「算罷啦,冇計喇」又有咩唔妥呢。何況,你有冇問過村民係咪咁諗?或者大家知道可以「一人一票選特首」已經開緊香檳慶祝?何必搞串人哋個 Party ?

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 語言陷阱(上):闕義、歧義、含混 by 楊梓燁
    這種因為語法結構的問題,而造成一個語辭(詞語、字、句子)在某語境裡有兩個或以上的意思,便叫做「語法歧義」。這種歧義的其他例子,例如有「求學不是求分數」,可以理解成「求學,不是求分數」,又可以開玩笑地理解成「求學?不,是求分數!」。又例如算命…
歡迎讚好我們的facebook page,免費資訊源源送上。

文章資訊

ID: 81781
Date: 2014-08-14 03:40:37
Generated at: 2022-11-27 14:26:46
Permalink: https://www.vjmedia.com.hk/articles/2014/08/14/81781/【中佬手記】歷史、新聞、預言