如果你係傳統泛民支持者，又唔喜歡有人對你擁戴既政團說三道四，你可以先行Click上一頁離開呢篇文章，面對唔喜歡比人批評既朋友，小弟暫時未有興趣去用大愛感化各位。
好，入正題。
不久之前小弟已經寫過文講過下政府廣告如何比泛民宣傳優勝，但係親政府體制陣營有既係錢、錢、錢同錢，要打你既話，渠道同工具當然唔止一樣咁少，你地泛民做到既，建制話我都一樣做到，仲要做得比你班友更好。我唔係呢到長他人志氣滅所謂同路人威風，只係講緊事實，近一個月嚟親眼見到既事實。
事例論證，論張力最大，模彷得同泛民最似模似樣，又係以道德高地作招萊既，一定係南齊張融…阿唔係，係同為女王陛下子民周融既「反佔中，保普選」運動。姑勿論看官對「佔中」三子既行動有幾讚同有幾多質疑都好，周融之流搬字過紙既行為，確實將佔中光環既道德高地同認受性大大降低。你佔中搞公投；我反佔中搞簽名，你有網上投票；我又有網上簽名，你要留身份證號碼阿嘛？我又留一個比你囉，縱然心水清既人都明白，反佔中一方係技術上故意縱容重覆簽名、虛假簽名，意圖推高參與者人數，但係都係個句，普羅大眾又有幾多人心水清？又或者有幾多人願意客觀分析事實？你可以話周融班友低莊，但係咁樣正中佢地下懷。反佔中陣營以催谷簽名人數為次，矮化佔中運動為實，你要話我簽名人數多水份，我就加多幾分水份入去，然後利用建制宣傳機器大量放風：「泛民班友既全民投票都係咁兒戲架喳」，人無恥，果真天下無敵。
最頂癮既係，你地佔中搵個細路女出嚟拍《試問誰人未發聲》（我都係鍾意叫佢做試問誰人未發腥多少少…），咁我地又搵返個細路女影返輯保和平反佔中先，搬字過紙既唔止小朋友攻勢，連街站動員人數、叫咪講稿都同泛民陣營、學生團體所用既論調、語句一模一樣，只要遮住街站直幡，你甚至分唔清個個站係屬於泛民陣營定建制勢力。
圖一：試問誰人未發聲（轉自蘋果日報）
圖二：周融陣營兒童文宣（轉自幫港出聲Facebook Page）
有日小弟係樓下見到民建聯張子賢（馬鞍山區）叫咪呼籲參加反佔中遊行，依稀記得內容係咁既（由於時間已久，有錯漏請各位指教補充)：「各位馬鞍山既朋友，有無諗過假日時間除左行街、同屋企人共聚天倫之餘，仲可以為香港和平既將來出一份力呢，我呼籲各位一齊…」哇頂，點解咁似叫人七一上街既！！！！！！！！仲要有同我咁大十八、九歲既女仔行過去同佢握手喎！！！
圖三：民建聯社區幹事張子賢（上排右一，轉自民建聯沙田支部）
SHIT, 原來企係道德高地到，講野真係特別大聲架！！！
傳統泛民陣營用左差唔多三十年建立既道德高地傳訊模式，比建制派用左一個月就學到十足十，抄到加零一。甚至被對家將高地移平，矮化成同樣低莊既門面功夫，泛民自恃選舉必殺絕技亦都就咁武功盡廢。
以地區政績論說，泛民政黨確實比建制陣營遜色得多，建制願意花大量資源推行蛇齋餅糉策略收買地區人心，已結業既主場新聞昔日都有報道指出民建聯於地區支部花費高達3600萬（因網站結業，參考流傳於網絡之舊文Link），公公婆婆食飽飲醉自自然然會對米飯班主言聽計從，你可以控訴民建聯新民黨之流背後有紅色水喉大量射水支持，但係泛民政黨扣除政治捐獻之外，每逢社運旺季亦都從民間大量吸金，以政治倫理述說，民聯聯收得張曉明錢，就自然幫中聯辦燒災解困，咁點解傳統泛民收左民間暮捐又唔回饋地區工作呢？既然建制陣營奉行「你做到既，我都做到」既原則，何解泛民不以彼之道，還施彼身？
圖四，網絡流傳昔日主場新聞統計圖
要記得，係香港體制既權力分佈之下，2017行政長官選舉方案同嘈左好多年既《基本法》四十五條只係政改方案既配菜，2020普選立法會先至係真正既主打，英國佬三十年前已經看透呢個道理（詳情請睇中英聯合聲明），今日泛民虛耗一切資源時間係係配菜身上，到他日爭奪真正權力權關個陣，仲有何彈藥同人據理力爭？道德策略已經輸到乾晒，乾嗌真普選亦都不能再有效鞏固鐵票，係咪要地區直選議席比建制贏晒個日，先發覺自己連輸既資格都無埋？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年8月15日
