世界足球回顧：1984年嘅法國歐洲國家盃

1984年嘅法國歐洲國家盃，亦喺有8隊參加決賽周：8隊分成AB兩組（各四隊）打單循環，每組首兩名交差對打爭入決賽，並且取消季軍戰。

8隊參加決賽周嘅隊伍包括主辦國法國，以及由外圍賽出線嘅上屆冠軍西德，亞軍比利時，葡萄牙，丹麥，南斯拉夫，羅馬尼亞，同埋西班牙。當中葡萄牙同羅馬尼亞喺第一次入決賽周；而世界盃冠軍意大利，季軍波蘭，同埋表現唔錯嘅英格蘭就分別喺分組賽被淘汰出局。

未講決賽周分組形勢，就先要講一場疑似假波，當年分組賽最後一場，西班牙要喺最後一場贏馬爾他最少11球先可以憑得失球壓倒荷蘭出線。雖然比賽初段馬爾他曾迫和西班牙1：1，不過最後竟然係西班牙贏12：1出線。呢個賽果令好多人懷疑馬爾他打假波，不過經過調查，無任何證據。

當年A組有主場之利嘅82年世界盃殿軍同埋法國，上屆歐洲國家盃亞軍比利時，淘汰英格蘭嘅丹麥，同埋南斯拉夫。以國際賽經驗嚟睇，法國同比利時係熱門。

揭幕戰由法國對丹麥；法國陣容比世界盃時更強，首先門將俾斯（Joël Bats）比世界盃門將艾度里穩健，後防就由勒盧斯（Yvon Le Roux）代替退休嘅杜素，中場就組成稜型中場，由居里斯同新人費南迪斯（Luis Fernández）做策劃，泰簡拿打防守中場，柏天尼做攻擊中場，而前鋒就缺乏新人，所以法國用怪陣迎戰：前線放兩個翼鋒勒金比同埋貝隆（Bruno Bellone）拉開前線，由中場球員後上攻門；而丹麥就係喺20年嚟第一次入到決賽周，隊中有後衛摩頓奧臣（Morten Olsen），右後衛施夫碧（John Sivebæk，後來效力曼聯），拜仁慕尼黑中場勒比（Søren Lerby），摩比（Jan Mølby，後來轉會利物埔），左翼謝士柏奧臣（Jesper Olsen，後來轉會曼聯），前鋒艾基亞（Preben Elkjær，花名叫坦克車，效力比利時洛格倫，決賽周後轉會意大利維羅納，就協助新球會首次奪得意甲聯賽冠軍），19歲新秀米高勞特立（Michael Laudrup，當時已經加盟意大利祖雲達斯，不過由於外援名額限制，被外借去拉素，後來回歸祖雲達斯，之後再轉會巴塞隆拿及皇家馬德里）。呢場波柏天尼被效力意大利比薩嘅伯格連（Klaus Berggreen，後來效力羅馬同都靈）全場凍結，最後喺下半場末段把握一次機會入波，替法國以1：0打敗丹麥。丹麥呢場波損兵折將，中場主力77年歐洲足球先生西蒙遜（Allan Simonsen，曾效力巴塞隆拿）斷腳，唔能夠繼續踢決賽周；而法國後衛阿武羅斯亦喺臨完場前以頭撞謝士柏奧臣而被趕出場，最後要停賽3場。

次熱門比利時就對南斯拉夫；不過比利時喺決賽周前就爆出醜聞：幾名國家隊成員，包括隊長吉烈斯，後衛Walter Meeuws，Gerard Plessers，後備門將普荷美（Michel Preud’homme，多年後擔任正選門將），中場Jos Daerden及Guy Vandersmissen被告發參與打假波，被比利時足總罰停賽；而另一位後防主力蘭昆（Michel Renquin）就因為要替球會爭冠軍而申請退隊。教練泰斯唯有起用多位年青球員，包括後衛格連（Georges Grün，效力安特烈治，後來轉會帕爾瑪及里賈納），剛申請入籍比利時嘅天才中場史詩科（Enzo Scifo，後來效力多間法甲及義甲大球會），以及多位國家隊邊緣人例如迪胡夫（Walter De Greef）及Paul Lambrichts去重建球隊，並委任古里文斯做隊長。對手南斯拉夫亦有幾名有潛質嘅球員及名將，例如中後防嘅卡坦力（Srečko Katanec，後來踢史特嘉及森多利亞，現為斯洛文尼亞國家隊領隊），中場史度高域（Dragan Stojković），前鋒蘇錫（Safet Sušić，現為波斯尼亞及黑山國家隊領隊）及維祖域（Zlatko Vujović）。不過，南斯拉夫喺比賽表現欠佳，先被比利時聯賽神射手尹丹貝治（Erwin Vandenbergh）遠射先開記錄，然後再被兩名首次上陣嘅比利時新人合作，由格連頂入史詩科傳出嘅角球，輸2：0。

1984 (June 13) Belgium 2-Yugoslavia 0 (European… 发布人 sp1873

第二輪比賽，就出現咗兩場令人震驚嘅賽果：法國同丹麥就分別以5：0打敗比利時同埋南斯拉夫，當中柏天尼表演帽子戲法。賽果令到法國出線，南斯拉夫出局，最後一場丹麥對比利時會決定邊隊同法國一齊出線。

最後兩場比賽，就十分刺激。先講法國對南斯拉夫，當大家覺得南斯拉夫會因為已經出局而放軟手腳時，南斯拉夫喺上半場由代隊長Miloš Šestić先入一個遠射，不過下半場柏天尼又再次連中三元，最後法國贏3：2。而丹麥對比利時就更精彩：由於比利時要贏先可以出線，所以一開波就搶攻，佢哋喺39分鐘就已經領先到2：0，不過丹麥就無輸到士氣，最後連追三球，以3：2出線。

1984 (June 19) Denmark 3-Belgium 2 (European… 发布人 sp1873

B組亦有4隊，包括82年世界盃亞軍同上屆冠軍西德，淘汰荷蘭嘅西班牙，淘汰世界盃冠軍意大利嘅羅馬尼亞，以及淘汰世界盃季軍波蘭嘅葡萄牙。呢組賽前熱門係西德，其餘三隊實力係西班牙高半線。

西德喺西班牙世界盃輸咗比意大利之後，有幾位老隊員退出國家隊，所以就補充咗啲新人，包括左翼衛布林美（Andreas Brehme，後來係國際米蘭德國三劍俠之一），中堅布治和（Guido Buchwald，退休前踢日本浦和紅鑽，並曾執教該隊），前鋒就加入新人禾拉（Rudi Völler，後來效力羅馬及馬賽，並曾執教德國國家隊），不過中場就明顯欠缺有實力嘅新力軍，令馬圖斯孤掌難鳴。而西德第一場嘅對手葡萄牙就自從1966世界盃後就一直食白果，今次嘅陣容係以老帶嫩，老將有35歲隊長門將班度（Manuel Galrinho Bento，不過佢已經喺2007年逝世），34歲前鋒尼彌（Tamagnini Nené），亦有年輕右後衛邊度（João Domingos Pinto），比較出名嘅球員有中場嘅蘇沙（António Sousa）同費蘭度（Fernando Chalana）；最後雙方悶和0：0。

另一場比賽係由西班牙對羅馬尼亞，羅馬尼亞已經有24年未打過大賽決賽周，當中比較出名嘅球員係中場波隆尼（László Bölöni，曾代表羅馬尼亞踢102場國際賽），而另一位19歲新秀赫傑（Gheorghe Hagi，曾代表羅馬尼亞踢125場國際賽，佢嘅故事會遲啲再講）亦有份參賽。而西班牙就希望擺脫喺主場都唔能夠入世界盃四強嘅陰影，後防仍然由阿干納達及甘馬曹做重心，加上出擊中堅馬些達（Antonio Maceda），以及有畢爾包屠夫之稱嘅蓋高查（Andoni Goikoetxea，當年打西班牙聯賽時用超技術去侵犯馬勒當拿，差啲令佢收山，所以西班牙傳媒叫佢做屠夫），基本上係好穩健，中場就由新人域鉈（Víctor Muñoz）同埋列卡度（Ricardo Gallego），再加上翼衛歌迪路（Rafael Gordillo）組成，不過前鋒就繼續靠老將辛堤連拿（Santillana）及法蘭斯高（Francisco José Carrasco）；而兩隊就以1：1打和。

第二輪比賽，西德憑禾拉連入兩球，以2：1打敗羅馬尼亞，而葡萄牙同西班牙就以1：1打和。呢個賽果，就令到四隊都仍有出線／出局機會：西德有3分，只要和波可以出線，而有2分嘅葡萄牙同西班牙，同埋得1分嘅羅馬尼亞，只要贏波就仍有出線機會。由於82年世界盃Disgrace of Gijón（之前篇文有講）嘅影響，所以賽會一早就安排羅馬尼亞對葡萄牙同西德對西班牙喺同一時間開波。當葡萄牙後備入替嘅老將尼彌喺81分鐘寫入1：0替領先羅馬尼亞時，全世界就將注意力放喺0：0嘅西德對西班牙。西德喺上半場已經有白禮高頭鎚中楣，而布林美亦射門中柱，而西班牙亦有一個12碼被舒麥嘉救出。當大家以為比賽會係以0：0結束之際，馬些達就接應隊友傳中喺最後一分鐘頂入贏1：0，將上屆冠軍西德淘汰，報咗兩年前世界盃輸1：2之仇。

西德出局除咗唔夠運之外，另一個原因係缺乏中場球員，82年世界盃球星烈巴斯基不在狀態，另外兩名中場舒斯達同漢斯梅拿亦同西德足總不和而未有入選，再加上另一中場主力馬加夫（Felix Magath）未有入選參賽名單，令隊長路明尼嘉要改打中場，令西德攻守失據；唯一安慰係有四名球員最後入選決賽周明星隊。

第一場準決賽由法國對葡萄牙，呢場波好引人入勝：法國嘅功臣係國家隊邊緣人後衛杜馬高（Jean-François Domergue）。杜馬高喺84年歐洲國家盃前只曾代表法國一次，不過佢喺第一場分組賽就入替有輕傷嘅中堅勒盧斯，然後就由第二場分組賽開始就代替停賽三場嘅左後衛阿武羅斯。當24分鐘法國喺葡萄牙禁區外得到罰球時，所有人都以為係柏天尼表現嘅機會，點知一射破網嘅係杜馬高。不過，葡萄牙並未放棄，中場主力費蘭度於74分鐘喺左翼傳中，前鋒佐度（Rui Jordão）頭鎚扳平，而令到比賽要進入加時。

加時上半場8分鐘，費蘭度今次喺右翼傳中，佐度再次接應射窩利彈地波笠死俾斯，令到主場擁躉震驚；法國跟著就瘋狂搶攻，結果完加時下半場前6分鐘，柏天尼喺禁區內想射波，不過嗰波被葡萄牙後衛拍甩，杜馬高就衝前射入效力國家隊嘅第二球；當葡萄牙諗著要射12碼定勝負之際，柏天尼就再次發威，係最後1分鐘接應泰簡拿傳波，喺三個葡萄牙後衛加埋龍門班度包圍下將個波射入，氣走葡萄牙！

第二場準決賽，亦要打到加時：上半場7分鐘，西班牙門將阿干納達雖然救出艾基亞嘅頭鎚攻門，不過後上嘅勒比就執雞射入；馬些達就再次成為救世主，喺下半場為西班牙追成平手；雖然丹麥嘅伯格連喺加時被趕出場，最後兩隊要互射12碼。最後，艾基亞成為罪人，射失12碼令丹麥互射12碼輸4：5。

決賽最後由法國對西班牙；呢次係法國第一次入到大賽決賽，而西班牙係繼1964年喺主場奪得第二屆歐洲國家盃後，再次入到決賽。法國嘅阿武羅斯雖然坐完3場波監，不過就未能正選上陣，左後衛位置就被上仗功臣杜馬高搶咗；相反西班牙就有上兩場都入波嘅馬些達因為累積兩場黃牌而要停賽。

西班牙喺呢場比賽一直同法國互有攻守，勝負分野就係喺決賽周打出身價波嘅西班牙隊長阿干納達再次發波瘟，喺接柏天尼嘅罰球時彈琵琶唧咗個波入網；而法國嘅貝隆就喺最後一分鐘突擊射入2：0，替法國奠定勝局。

84年嘅歐洲國家盃係法國足球嘅一個里程碑：係法國第一個大賽冠軍。當然，法國人希望國家隊喺兩年後嘅世界盃會有更佳表現，不過法國最大嘅問題係缺乏前鋒。喺呢屆比賽，除咗柏天尼打5場入咗9球之外（至今仍係一個記錄，第二位嘅幾位射手最多到係入5球），入球第二多就喺兩球嘅後衛杜馬高，而唯一有波入嘅前鋒就喺決賽入波嘅翼鋒貝隆，如果法國喺86世界盃前未搵到好嘅前鋒，就要再次依賴到時30歲嘅柏天尼做後上射手，情況未必樂觀。

至於亞軍嘅西班牙，亦面對同樣問題，就係前鋒無入球能力，首席射手竟然喺入兩球嘅出擊中堅馬些達，而前鋒就只有老將辛堤連拿入一球。不過，呢場決賽亦喺西班牙門將阿干納達最後一場大賽決賽周賽事，因為佢好唔好彩喺86年世界盃前受傷，唔能夠參賽，位置由佢嘅副手蘇比沙列特（Andoni Zubizarreta）代替。

1984年歐洲國家盃賽會選出嘅明星隊如下：
守門員：舒麥嘉（西德）
後衛：邊度（葡萄牙），摩頓奧臣（丹麥），K科士打（西德），布林美（西德）
中場：費蘭度（葡萄牙），居里斯（法國），柏天尼（法國），泰簡拿（法國），晏尼臣（丹麥）
前鋒：禾拉（西德）
神射手：柏天尼（9球）

作者：奇雲

作者為旅居海外的一名前香港公務員。現時在海外做人之患。

閱讀後覺得好，請多多讚好及分享～：）