【中佬手記】巧婦難為無米坎,雲高爾首仗失利

 

新一季英超又嚟喇,揭幕戰就搵曼聯主場迎戰史雲斯,你話英超賽會幾識做生意呢。季前熱身賽踢得曉飛嘅曼聯賽前被睇高三四五六線,史雲斯換領隊又冇埋射手米祖同門神禾姆,呢場牌面真係輸咗六成喎。

然後大家都好似唔記得,波,係圓嘅。

 

曼聯今場有雲佩斯放暑假、拉菲爾、伊雲斯、華倫西亞同新加盟嘅勞克梳爾都係因傷缺陣,有外借回歸嘅連加特同新秀布歷基特首次正選上陣。雲高爾一如所料咁用 3-5-2 陣式,費查同靴里拉後少少,馬達前少少。史雲斯照舊 4-2-3-1 ,兩邊尼敦戴亞同洛列治隨時起跑接應過頭波,專恰菲臘鍾斯同史摩專身慢。前利物浦中場舒爾維同南韓嘅奇誠庸喺後半場專責截波同放長波,前線邦尼有得爭頂就爭下啦。

上半場曼聯表現其實 okay 對辦,起碼擺脫咗莫耶斯年代嗰種企喺度唔走位,郁啲就起腳亂咁斬嘅懶惰、單調踢法。靴里拉好活躍好勤力咁要波分波,但朗尼同小豆成日走埋同一個位,左邊翼衛艾殊利楊格助守勤力但助攻鵪鶉,變相一味靠串演右翼衛嘅連加特助攻。問題係, 3-5-2 嘅兩邊中堅唔多上前,唔會好似拉菲爾咁時不時疊瓦畀隻翼放送落底線出波,或者假動作切入中路再傳再射,於是史雲斯左閘尼爾泰萊只需要專注封好線道就冇問題。

中間馬達受制於舒爾維同奇誠庸嘅攔截包抄,史雲斯動不動就擺七、八個球員喺後場佈防,空間根本同熱身賽差天共地。朗尼做咗隊長但心理上又係上腦過度活躍,於是有波在腳就心雄想射波,連帶小豆都唔知可以走去咩位接應,踢少一個就係咁解。連加特上半場中段傷出,由贊奴沙入替,但呢位比利時新星攻強守弱,做翼衛絕對唔令人放心。

27 分鐘,曼聯喺轉攻為守嘅時候犯咗一連串錯誤,導致先失一球。當其時史雲斯右路放高波上前,楊格其實已經準備防守,但左中堅布歷基特無啦啦衝去左邊爭頂,搞到史摩寧同鍾斯要相繼移左補位,到史雲斯由右至左分波,安達靴里拉根本跟唔切去包後上嘅奇誠庸,菲臘鍾斯想撲出去封位又畀邦尼單擋,結果迪基亞企大細邊就畀人拉地波遠柱羞死。

 

半場雲高爾馬上作出調動, 抽起小豆換入蘭尼,整個陣式亦由 3-5-2 變成 4-4-1-1:菲臘鍾斯踢右閘,艾殊利楊格踢左閘,蘭尼同贊奴沙踢左右兩翼,馬達做朗尼後面嘅輔鋒。呢個調動亦取得立竿見影嘅效果,贊奴沙無後顧之憂下盡情快放,搞到史雲斯左閘尼爾泰萊領黃牌,及後有避忌之下放甩佢落底輸角球。曼聯就憑呢個角球機會喺 52 分鐘扳平:馬達右路開出內彎角球,菲臘鍾斯近柱衝頂唔到,勝在朗尼離門六碼車身倒掛入網。

朗尼被賦予隊長重任之後,更勇於「挺身而出」,包括爭射罰球。一個離門廿零碼中間偏右嘅角球,左腳嘅馬達本身順腳啲,但朗尼同佢密斟之後決定自己射,結果就中外柱彈出。如果馬達主射呢?冇如果啦。「戰術大師」雲高爾最後一個換人名額用喺費蘭尼身上,代替下半場轉趨沉寂嘅安達靴里拉。

不過,再次入波嘅係史雲斯。中場快開罰球分落左邊傳中,串演左閘嘅艾殊利楊格企錯位加跳頂時間錯晒,洛列治禁區內右路控定任射竟然撻 Q ,但個波錯有錯著去左中間畀施格臣後上抽入,迪基亞欲救無從。

 

曼聯喺雲高爾治下首場正式比賽失利,歸根究底係球隊夏季大量流失主力後未能及時補充足夠人材,加上傷兵相當多,焗住限米煮限飯,如果勞克梳爾同拉菲爾 (或華倫西亞) 兩隻正宗翼衛在陣,又如果雲佩斯放完暑假,球隊表現應該可以好啲。雲高爾將艾殊利楊格改造成左翼衛係折衷方案,用蘭尼同贊奴沙複製拜仁錯腳翼鋒組合亦係冇辦法之中嘅選擇。問題係, 3-5-2 陣式要有一個中堅以自由人姿態引球出擊壓上助攻,但曼聯陣中完全冇呢種人材,令三中堅陣徒具其形而無實,兩邊翼衛要兼顧助守又要單騎邊線突圍又係苦差。用到費蘭尼中場中,相信亦只係畀佢最後一次機會去證明自己唔適合踢曼聯。

唯一值得安慰嘅係,轉會市場尚未關閉,曼聯要收購中堅、翼衛同中場都仲有足夠時間。球迷唔期望曼聯由英超第七變返英超第一,要入返前四,仲有大把時間追。

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 語言陷阱(上):闕義、歧義、含混 by 楊梓燁
    這種因為語法結構的問題,而造成一個語辭(詞語、字、句子)在某語境裡有兩個或以上的意思,便叫做「語法歧義」。這種歧義的其他例子,例如有「求學不是求分數」,可以理解成「求學,不是求分數」,又可以開玩笑地理解成「求學?不,是求分數!」。又例如算命…
歡迎讚好我們的facebook page,免費資訊源源送上。

文章資訊

ID: 82048
Date: 2014-08-16 22:18:10
Generated at: 2022-11-27 13:28:29
Permalink: https://www.vjmedia.com.hk/articles/2014/08/16/82048/【中佬手記】巧婦難為無米坎,雲高爾首仗失利