【中佬手記】冰桶、飯桶、垃圾桶

 

呢排全球興起 Ice Bucket Challenge 熱潮,眨下眼就傳入香港。由王維基到蘇錦樑,仲有可能係梁振英嘅特別嘉賓,玩嘅人越嚟越雜,好想問句 “Who do you think you are? ” 民建聯某立法會議員趁熱鬧玩埋一份仲話要捐畀中國紅十字會,更加係對呢項活動最大嘅諷刺。大佬,人哋原意係關懷 ALS 病者,後尾廣義演化成捐款做慈善。係喎慈善,你肯定捐畀中國紅十字會係做慈善?

或者又係搬返「富中國特色的」呢個形容詞出嚟,去解釋「冰桶挑戰」嚟到香港點解話咁快就變晒質。就好似民主、普選咁,喺其他國家運行得正正常常,要喺香港落地生根就走晒樣。 Localization嘅嘢,我真係識條鐵。

 

今日有網友喺面書話,喺香港關心時政,好易抑鬱。無論係愛之深、責之切,或者因為睇唔到如何解困、突破敗局而鑽牛角尖,都係不幸。幸福非必然,但今時今日嘅香港,自命企喺雞蛋嘅一邊對抗高牆,不幸就係必然。

黃子華《絕代商驕》嘅辦公室金句:「陪笑、虛應、假度、 hea 做」出嚟為大家消災解難。早幾日嘅 817 遊行令大家啼笑皆非?保持清醒企後少少陪笑就可以,大吵大鬧就可以慳返。對於周融或吳秋北嘅一層又一層、大話冚大話嘅解釋,虛應就夠喇,步步進逼都唔會令佢哋狗急跳牆或者跳 IFC ,而大眾亦冇持久嘅專注力去跟進。「佔中三子」同泛民為咗接招而費煞思量?假度得架喇,反正技窮,人哋好似《足球小將》戴志偉咁見一招學一招,你廿五年來用過嘅招數都畀人學晒,度鬼度馬咩。至於 Hea 做嘅嘢,近幾年大家見慣見熟,識架喇。

以上金句係畀無可奈何,打工搵啖食嘅小職員喺辦公室政治之中,做個飯桶明哲保身。香港嘅小市民,唔想肉酸投誠引人唾罵或者淋糞,又冇本事移民或者自立嘅,除咗自命討厭政治之外,可以做嘅就係學識呢套處世哲學,一邊睇一邊當返工咁得過且過,定時定候交稅課金當買飛睇戲,唔會太難受。

 

講到難受, 817 遊行有啲相片都幾令人難受。即係,喺大街大巷有好多國旗、區旗畀人隨意踐踏,作為有公民意識嘅好市民好應該感到難過。國民教育話見到國旗高掛、隨風飄揚要感到驕傲架嘛,畀人踩唔通仲要拍手掌?

又例如話,喺沿途大街小巷隨處可見用完即棄嘅物資,例如牛咁大隻字寫住乜乜同鄉會嘅紅色紙牌呢。又好在,呢堆嘢多數放喺垃圾桶旁邊或者入面,好切合呢啲物件由頭到尾嘅本質。

比較可惜嘅係,物質上有形有色嘅嘢我都知道要放入垃圾桶,但意識上無可觸摸、只靠口耳相傳嘅嘢,例如話「請食飯去遊行」、「個別團體派錢示威咪將呢一百幾十個從大會統計數字中剔除」、「傳媒派出臥底偵查式採訪係插贓嫁禍」之類,大家非但唔會當係垃圾一笑置之,仲會廣泛流傳討論,唔好彩嘅就被潛移默化。呢種流氓都不如嘅無恥狡辯,最需要一個垃圾桶收集然後拎去堆填,無奈有人會話要捍衛佢哋嘅言論自由,或者應該針對衍生呢啲人嘅制度而唔係針對呢啲人。

 

諗到呢度,我都係玩返冰桶挑戰好過。而家唔玩,唔通到天寒地凍嗰陣玩咩。

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 語言陷阱(上):闕義、歧義、含混 by 楊梓燁
    這種因為語法結構的問題,而造成一個語辭(詞語、字、句子)在某語境裡有兩個或以上的意思,便叫做「語法歧義」。這種歧義的其他例子,例如有「求學不是求分數」,可以理解成「求學,不是求分數」,又可以開玩笑地理解成「求學?不,是求分數!」。又例如算命…
歡迎讚好我們的facebook page,免費資訊源源送上。

文章資訊

ID: 82440
Date: 2014-08-20 01:17:59
Generated at: 2022-11-27 13:27:08
Permalink: https://www.vjmedia.com.hk/articles/2014/08/20/82440/【中佬手記】冰桶、飯桶、垃圾桶