是咁的，幾日前香港有個史無前例既演藝界大遊行，遊行完左薑蓉最先宣稱19萬人參與，第二日更正人數為25萬，網絡上不斷流出報大數又或者貼錢請人遊行既留言，而普遍好多人都認為當日遊行人數只係得幾萬人。雖然唔想承認，但事實上呢次演藝界遊行的確有超過20萬人參與。
以支聯會點算六四集會參與人數同民陣估計遊行人數方法計算，一個維園足球場可以容納2萬人，維園六個足球場就12萬人，再加埋大約兩個足球場既草地，仲有籃球場同埋通道等等，所以六四晚會迫爆維園大約都係18萬人，就算想吹都無得吹得再多，因為呢個係維園容量。
（photo via cc Flickr user yuen yan）
（六四燭光燃亮維園）
呢次遊行，就算幾唔想睇都好，但係為咗想知對方用盡所有傳播渠道、手段得出嚟既實力如何，我地應該用個同樣標準去估算佢地人數。如果睇番佢條片，其實係會睇到佢個維園開始遊行果下係滿晒人，跟住就啲人係由草地再經過維園出發。而佢地既人數係夠填滿維園兩次，按照支聯會計算方法填滿一次12 萬，填滿兩次就24萬，其實如果呢次遊行人數係講成25 萬，相信都係合理既講法。當然你可以講佢疏啲又開晒遮，但係上年六四同呢兩年七一個個人都因為大雨颱風有開遮，所以照計密度係差唔得幾遠，就算係疏密都好大誤差唔會多過5萬個，所以我真係相信個遊行超過20萬人參與。
（817遊行人士企滿維園）
訊息，最緊要真。而估算方法，要用相同標準先有意義。好似警方果啲維園面積都套用埋可加可減機制既方式，除左政府會拎佢做防空炮以外，大家都會覺得佢無任何意義。當支聯會相信六四集會有18萬人參與，當民陣相信七一遊行有超過50萬人參與，就需要相信薑蓉大遊行有超過20萬人。雙重標準既話就只會被人攻擊，睇下啲親共專頁點用雙重標準呢下攻擊點算人數呢樣野？
(「反歪風．反暴民」專頁鬧蘋果雙重標準)
如果個個泛民中人都住喺「堅離地城」錯估民情，相信至少51萬人參與七一，相信超過18萬人參與六四集會，但相信得8萬人參與「反佔中」遊行，咁既話就會好大鑊。你地都識講如果個政府唔知參加呢啲活動既人數會完會唔知民情，咁你又點可以「有口話人無口話自己」？
呢個時刻，泛民最重要既係面對政治現實。
喺民主既地方，最重要係明白政治現實，最要關注既係：你有幾多人。
你用彰顯大義獲得既一票同佢用蛇齋餅糉得到既一票價值同等，就算有個人鐘意藍色就投俾禮義廉既話，嗰一票都係同等。當你要相信「沒有誰比誰高尚」，亦相信民主係要人人平等，你可以鬧佢地俾錢人地去遊行手段卑鄙無恥下流賤格，但係唔可以唔計落人數。民主、普選，每一張票喺選舉度都係同等價值，但喺每個選民入面價值都唔同，有人因為幾百蚊投俾個賤人張票，同投票俾個人民英雄嗰張票都係同等。以對方手段卑劣，俾錢俾禮物收買番嚟既人又唔計支持者，就以為對方少人支持既人，尤其係啲議員，希望你地接受政治現實：講民主，人數先係最重要。因為民主–就係鬥「疊馬」。
呢個中共露出佢地統戰實力既時候，唔係你唔想睇、唔想面對就可以當佢真係無料到。依家真係自我催眠同自己講：「佢地只係得幾萬人遊行，我地七一有50幾萬人行，佢地啲人多都係臨記，真係可以當佢無到」既時候？呢個咁重要既資料真係唔駛參考？喺戰略上，我認同應該集體恥笑同揭發罪行，但呢個只係一個宣傳手段，實際上喺背後好應該憑呢次集會去估算到時政改、選舉既時候會面對既人數。咁多人可以被幾百蚊收買去行幾粒鐘，會唔會再有下次？佢地會唔會被幾百蚊收買到去用幾分鐘投票？係咪係時候諗下其他對策？
你唔信佢有20萬人去，你做既決定好容易會做錯。事實係難以接受，但總好過明明有知己知彼既時候白白浪費。
另外，可能你會問點解佢地有超過20萬人參與演藝界遊行，而啲街道相就真係影到咁少？其實原因最少有三：
1)按照幾個版本消息，有人集合完就走，有人出左維園就搭地鐵去終點，所以喺維園既人唔一定有參與遊行
2)警方無阻街既話，密度一定有異
3)參加七一遊行既人數真係多過佢地幾倍
利申：連續參與六四集會十年，幾乎每年七一都有去，當然無去到薑蓉個遊行。
利申2：我相信今年七一係超過70萬人參與，比2003年更多。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年8月20日
