話說有個人係丹麥搭的士由Odense （安徒生故鄉）用左四萬港紙終於係三日後成功到達羅馬，一覽佢最想睇既教堂。眼利既讀者可能發現，Google maps上面寫話Odense去Rome喳車要1978公里，但係點解新聞張圖既咪表得千八公里既? 答案係因為Google maps無視左渡輪呢家野。
Odense用汽車渡輪到德國，可以經丹麥9號公路經過Tåsinge同Ærø （細到咩咁）呢兩個島去到Langeland (lange = long, 因為個島真係好長) 搭 Spodsbjerg – Tårs渡輪去到lolland，經過nakskov（我個friend住既沉悶地方不過幾靚) 去到Rødby (Rød = red) 轉汽車加火車渡輪去到德國既Puttgarden，跟住就唔需要坐船啦~
（真係成卡火車上左船）
丹麥好多渡輪都可以比汽車甚至火車上去，呢種服務夠直接，需時比兜路快（用返呢個例子已經講緊慳到100km mileage），又唔需要司機操勞，所以好普遍。上呢D船個陣你係需要離開汽車或者火車上佢地甲板的，上面除左有檯凳之外，仲有（狂掠水既）餐廳商店同埋一個原意係睇風景實質係感受颱風威力既甲板，最特別既係scandlines呢間公司每部船都有最少一部老虎機之類既賭場機（我個人未玩過亦唔打算玩）同埋個D睇落好容易但係其實難到PK既「切繩囉獎品機」（有示意圖鑑），用繩吊住D gadget獎品，你切到就送比你（我玩過，難到想屌部機（編按：卡住左會被人笑的））。長途船的話（例如København til Oslo同埋Esbjerg til Harwich, England）個D就會有房比你訓同埋有buffet，同郵輪無異。我原本兩個都有機會搭，但係因為種種原因前者最後無去而後者最後都係搭ryanair飛過去sosad。
所有（我搭過既）跨境渡輪都有類似免稅商店既野，歐洲因為唔點限制跨境買野同埋稅呢家野每個國家唔同既原因，所以會有跨境客大手掃入食品，男女老少都加入行列進行類似強國人既活動，而最PK的係D船公司會專登買入批發裝既食品，實質上同香港無異，但係如果你計埋歐洲無border control，歐洲人幾乎可以自由出入歐洲所有地方的話就衰過香港（好似係）。
（水貨撚出沒）
但係因為時代發展，所以有D比較繁忙既渡輪服務都開始比大橋或者隧道取代，鼎鼎大名連接哥本哈根同埋瑞典Malmø既Øresund橋就係其中一個啦，其他仲有包括連接Sjaelland，Fyn同Jylland呢三個大島既Storebæltsforbindelsen (Stor = Big, forbindelse = link) 同埋 Lillebæltsforbindelsen (Lille = small)，而 Rødby – Puttgarden 呢因為太過繁忙同埋想起高速鐵路連接德國同瑞典，依家準備起大橋，2021年條橋起好之後就會停駛啦。
睇返上面段膠事，個的士司機話佢揸左2005公里（姐係佢兜路），而睇返原本新聞既comments發現原來係幾年前aarhus有另一個人因為要同教宗討論一D好緊要既野所以又搭的去羅馬（最後到達個陣因為太貴所以比唔起的士錢），究竟兩個人最後下場係點同埋咪表同司機究竟邊個恰，真係心裡心裡有個謎，難解，難計～
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年8月23日
