【短篇小說】倒下的單車，倒下的生命

（photo via cc Flickr user r. nial bradshaw）

八月二十四日，天晴。

那夜凌晨，我在屋企樓下食個宵夜飲罐啤酒，身邊港女朋友批評啱啱約會嘅男伴，只係同我食茶記，又污糟又食唔飽仲要AA制。我懷疑無數既呃like同follower到底有咩意義？一直以來建立既女神形象又為咗咩？呢一刻，我覺得人生最重要嘅，係點樣收更多既兵仔，點樣更加快狠準地呃更多嘅like，望住我杯啤酒，我睇唔透點解港男可以咁無用，隔離成班麻甩單車男已經望左我成晚，又臭又宅又咸濕，真係連“JIP”都廢事。

「明仔！你做咩啊明仔？Call白車，快啲幫我call白車！明仔你唔好嚇我呀！」

忽然，紅衫單車男攤左喺地，反晒白眼，黑衫單車男一邊大叫，一邊做心外壓同人工呼吸，宵夜鋪老闆即刻衝出來開著把牛角扇，同時淡定地叫人唔好圍太埋，怕影響空氣流通。呢一刻我同港女朋友即時彈開九丈，除左嚇到震，我哋連白車都唔識Call⋯⋯

白車三分鐘就到，明仔依然無反應，黑衫單車男一殼眼淚咁上埋車，圍觀嘅路人甲乙丙都因為無花生食，最後鳥獸散，我同港女朋友仍然只係識得震。

兩秒前麻甩單車男仲眼甘甘望住我對腳…明明佢仲同朋友細聲講大聲笑；明明佢碗餐蛋麵仲未食完，明明……

前一秒生，下一秒可能是死。

生命可以有幾脆弱？

每一次天災人禍名人逝世，我哋有無盡嘅share、無盡嘅like、無盡嘅Rest in peace，但原來我哋嘅想法一直都無改變、唔關心社會、冷待身邊人，無人願意行多一步，盡多一分力。

心唔變，日子唔會變，世界唔會變，無限重複消費社會大事，世界就只係一直停留係無盡嘅「一路好走」當中。

我喺度諗，我哋努力過自己嘅日子，努力過自己嘅人生，原來只係單純地自我感覺良好，活係自己世界，原來我哋連面對自己都無能為力，更何況面對別人，面對世界？

返到屋企，係張床碌咗兩下，諗起明仔究竟點，忽然又有兵仔inbox。攪錯！今日得兩個兵仔inbox，聽日應該post咩相好啲呢？

唔⋯…明仔，邊個嚟嫁？佢拎咗籌未？

作者：蘇眉

閱讀後覺得好，請多多讚好及分享～：）