做PR，即係溝女

港鐵處理狗狗闖入路軌事件既手法，毋容置疑，做得差過篤屎。對外聲明求奇，高層前線溝通協調不足，係公司風雪交加之際，仲要比自己員工出聲明轟點解要道歉，如此難堪既公關鬧劇，響眾多國際大城市入面，真係得香港先至有得睇。

公共關係管理既功用同目的，簡單D嚟講就係透過唔同活動、宣傳、廣告建立企業形象，與消費客群，即係公眾保持良好關係，最後達致可以係你身上搵多D既終極目標，又或者防止公司係負面事態發生之後與社會大眾站在對立面，減少相關損失，難聽D講，即係比人爆鑊，都要確保隻鑊爆得好好睇睇。用MTR係呢件事身上做論說就緊係Totally fail, 但係點解一間大企業可以係呢單小事上面做成公關大災難？

原因其實好簡單，係犯左你同我日常工作最常犯既錯誤：無將個心放落去。

PR唔同Selling，雖然兩者工作層面都係對人多過對數字，但係後者係著重revenue，係實在、可以觸摸，可以用一堆錢銀符號去量度成效既工種，而PR呢？係講感覺，講感受，講Feeling，係觸摸唔到，但係觸摸唔到既背後，就有一樣你想要既實物或者實際效果，要用一件最適切既行為做比喻架話，Selling就係從事性工作服務，PR就係溝女。（筆者註：只限溝，溝女同追女仔係兩回事）

而無論追女仔定溝女既首要信條都係：用心。

根據非正式生物學理論嚟講世界上110%既男性生物都係咸濕（編按：額外10%係TB），由想識你個下開始，到變朋友仔、到拖手仔、玩到錫埋咀仔，背後既目的都只係想氹位女伴上自己一早預備既大牀，慢慢除你件衫，解你牛仔褲粒褸，然後伸手解埋你個bra，除埋你條底底，之後開餐。但係由相識去到開餐呢幾十隻字中間，仲包含左無數用心思湊搭既過程。由認識個下同你whatsapp, 點樣係文字間揣摩你既心意，點樣係你失落個陣氹你開心，點樣包裝一份禮物送比你，每一個步驟每一個情節，都要落足心機，落足精神，落足時間，目的就係希望有一晚可以同共渡春宵，同享魚水之歡。

但係成功與否並唔係用你投放左幾多金錢、份禮物有幾貴重去量度（筆者註：如果金錢係溝女唯一量度標準既，送粒10卡鑽石比條女咪得囉，駛咩咁複雜啫），而係女方眼中你所做既事，符唔符合佢既要求，岩唔岩佢既Feel，你所做出嚟既形象係咪符合佢心目中想要同需要既慾望。同理，PR亦都一樣，當一件負面事態發生，出一份聲明唔單止要清楚表達自己立場，更加需要考慮呢份聲明同後續行為，會係公眾心目中發揮到咩形式既效用，建立到邊類形既感覺，係認同阿定係反感？ Back to 狗狗被車撞死呢件事，MTR所發既聲明，先假設佢地所闡述既係事實，但係份聲明入面，亦只係得「事實」既成份係入面，完全無留意到閱讀既人、關心呢件事既人會有咩感覺，會有咩想象。呢點正正係MTR今次係公關傳訊入面所犯既最大錯誤。

繼續用返溝女做比喻，若然溝女途中比女方誤會自己同另外一個女仔有染，係你面前發晒脾氣打晒冷戰，除左向女方陳述事實之外（姑勿論是事實與否），亦都需要考慮係感覺上如何取回女方信任，如何重建自己係女方用情專一既君子形象，絕對唔會send個whatsapp話：「我同Mary真係無野架，你信我啦」就算數，甚至必要時可能要花少少金錢，買份禮物；花少少心思，跪地求饒。而係呢件事身上，MTR連最基本求饒同改善方法都無拋過出嚟，更加唔好講拎舊錢出嚟做D保護流浪動物既工作，彌補公眾心中一落千丈既企業形象。

Come on, 港鐵既公關傳訊，我知溝女你地應該叻過我多多聲，唔好要個單身既小朋友教你地點做好唔好？只要當你份工係溝女咁做，拎個心出嚟，做好佢、溝好佢，無人會Challenge你一句。

作者：利瑪高

塵世中一隻迷途小羔羊，深信努力向前行，一定會找到出路。

閱讀後覺得好，請多多讚好及分享～：）