「Ice Bucket Challenge 冰淋城下」 呢個活動應該已經無人唔知係咩野。雖則好多人講講對佢反感又話講咩浪費水資源，又話咩偽善又話淋冰感受唔到啲咩。但其實個活動點講都好都係好成功，連香港肌健會會長都表示：「做咗16年都冇今次效果」。講真，一條好既橋勝過十幾年既汗水同精神。而我地香港有啲野想爭取咗幾十年，年年都好似食白果，再唔係就俾人呃呃氹氹咁行冤枉路。正正呢個時候，出現咗一個全球熱爆既活動，我地係咪應該學參考下呢個活動嘗試改變下呢？
究竟「冰淋城下」呢個活動係唔係浪費水，參加既人係咩心態其實都唔係重點，重點係要知呢個活動點解成功。我認為呢個活動成功既因素有以下幾點：
1) 娛樂性強
無論係香港人定全球人，其實都鐘意睇人濕身、狼狽、瀟灑樣，而呢啲片大多數都係係好笑同好睇既。雖則有好多人話呢個活動唔可以感受到啲病人既痛苦，又好似為咗好笑而淋，為咗玩而淋。但係….why not? 如果呢個活動係要痛到想喊，做完會攰到想死咁又會有好既結果？搞呢個活動係想有人同啲患者一齊喊？
我相信無人會反對「每個人都想開心」呢個說法。如果我地所追求既野係開心既，點解唔令佢變得好笑、變得開心啲？大部份活動都係要令人開心、令人鐘意先可以延續落去，試諗下如果人類每次搞野都只係得個痛字，搞完之後剩係想喊，成個過程連一點快樂一啲興奮都無，相信人類想唔絕種都幾難。活動要令人開心，先會流傳開去。活動開心啲唔係罪，參與者既笑容又唔係恥笑病患者，咁又有咩問題？呢個活動，因為參加者同觀眾變得充滿娛樂性，正正因為呢啲搞笑、好睇既片段，呢個活動先至可以咁成功。
2) 有名人參與
呢個活動，一開始就由美國開始其實都唔係咁Hit，但一到Facebook創辦人Mark點名叫Bill Gates，全球首富拍套片自己整個自助淋冰既機器，已經令呢個活動喺香港廣傳。再加埋香港又有個王維基帶幾十個香港電視員工又玩一次，之後幾乎每個人都被Ice Bucket Challenge 洗板。呢啲級數既名人，有錢都未必請到佢賣廣告，呢啲咁既名人參與活動仲要幫手宣傳，絕對係成功既關鍵。
3) 活動大眾化，幾乎邊個都可以參與，仲可以講到好有意義
淋冰水看似係一個挑戰，但其實又係一個好多人都可以做得到既野，好多人會以「唔衰得」咁既心態接受。睇落有挑戰性，而自己又做到，係會令人覺得做完係好自豪，加上呢個本身看似好玩既活動為佢地添上一個意義，就更有成功感。成功感，實在係好多人都非常渴望得到既野，令參加者感到成功同自豪，係活動成功既重點。
4) 傳播性強，連綿不斷
呢個活動內容程序咁既：
(1)挑戰者拍一段自淋冰水既短片放上網
(2)指定另外三個人挑機，要求佢地要24小時內完成挑戰
(3)被挑機者要喺24小時內自淋冰水
(4)如果唔想淋冰水就要捐100美金俾ALS基金會。
(5)返回程序(2)
一睇就知道如果唔係個個被挑機既人都唔再繼續做落去又或者新一批被挑戰既人都已經係參加左個活動既人之外，呢個遊戲係唔會停止。加上之前講過呢個活動成功既原素，呢個活動好多人會分享出去。唔好睇少一個人挑３個人機呢樣野，佢既增長率係以幾何級數上升，如果每次挑3個未玩過既人機，而每個都接戰既話，呢個遊戲只要重覆20次，就會接觸到3^20=3,486,784,401個人，幾乎有全球既一半人，增長速度係非常驚人。
順帶一提，佢地活動加左24 小時呢個聽落合理，但親身感覺又係好迫切既時限，係有助推進呢個活動既進度，件事丟空超過一日，挑機既同被挑機既人都可能已經無咗回事，所以加呢個時間其實係都有幫助。
5) 有提供選擇
正所謂「有得揀先至係老闆」，個活動比你揀一係淋冰水，一係捐錢。其實都係佢成功既部份，活動最大目的其實本來係想多啲人捐錢同埋認識呢個病，但如果呢個活動一開始就只係叫人廣傳捐100蚊，之後再叫3個人捐100蚊，相信個個都只會覺得呢個活動係一個老千活動，根本無可能有人參加。但係加咗一個遊戲叫你「唔捐錢就玩下啦」之後，成件事就合理咗好多，幾乎無咩人覺得呢個活動係屈人捐錢咁。俾多一個選擇你，其實令到件事容易接受好多。
另外呢招其實就好似啲書成日教令人墮入思考盲點既方法，例如你想追個女仔，唔應該問佢「星期六你可唔可以陪我出街？」而係「星期六你想去睇戲定去踩單車？」，對方唔夠清醒既話就會諗睇戲好定係踩單車好，而唔係諗同唔同你出去，當佢諗「睇戲」定「踩單車」嗰。本身明明每個人都有權利選擇參唔參與呢個活動，但就因為俾咗「捐錢」同「淋冰」兩個選擇你令到你諗下揀邊樣，呢招其實都真係好高明。
香港既社運真係搞咗好多年，而搞咗咁多年成功既數字真係少之有少，除非係個議題極大爭議先至做完唔會白做之外，成果真係「有目共睹」。呢個時候全世界出咗個咁既熱潮，我地係咪應該反思下我地一直以來既方法係咪有改善空間呢？
搞集會係咪一定要咁悲情，大部份都係鬧無普選，而唔係宣傳下普選之後既願景係點呢？明明普選係一個咁好既事，點解要搞到好似咁辛苦呢？有冇辦法令參與活動既人可以開心咁得到正面訊息呢？
搞活動會唔會有需要參加者有張大學畢業證書先至有資格參加咁難呢？點解啲關於全香港人既事要用啲唔係大部份香港人聽得明既字眼呢？咩「意識形態」，咩咩主義，乜乜思想咁，係咪會搞到啲民眾一頭霧水呢？好似佔中咁，好多大學生都話聽唔明啲討論會講緊乜，門檻咁高點叫市民參與呢？
民眾運動唔能夠離開民眾，只單靠媒體支持係唔夠動員咁多人，登廿份報紙可能唔及你拉你老死一齊參加咁有威力；對隔離屋李師奶嚟講咩世界級學者、國寶級專家都唔會夠住對面既陳師奶咁有說服力。人與人之間既關係，比千萬堆理論更具威力，咁我地要諗既就係：搞一個咩活動可以令參加者拉攏更多人參與既時候會令佢覺得開心、自豪。咁既話訊息就會一傳十，十傳百咁傳開去，活動就會成功。
我地依家需要既係一條好橋，一條好橋足以扭轉成個劣勢，大家一齊集思廣益啦！
另外「冰淋城下」呢個活動，講明左人與人之間既連結係可以發揮好大既作用。所以唔好睇少自己，每個人都可以係一個媒體，每個人都可以係一個活動既成功關鍵。救自己屋企，點少得你！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年8月24日
