請先看看上圖這位朋友嘅言論。嘩！咁激進嘅，一定又係「搞搞震，無幫襯」既反對派為左阻礙政府施政，而千方百計、不問因由去鬧政府啦。呵呵，咁諗你就錯啦，原來呢位陳雲生係民建聯屯門區區議員黎架，口吻做咩似足反對派呀？套用心繫中國嘅小天后GEM GEM名言：「嘩，駛唔駛呀！運輸署嘅壓力必然好大，我們又何必去judge它做得好不好呢。」
民建聯平日最鍾意做咩？就係盲目維護政府，出賣香港人利益囉。
一、當反對派批評政府漠視民意，唔發牌俾香港電視嘅時候，民建聯係邊？
二、當反對派批評吳亮星係立法會不公正地主持會議，「霸王硬上弓」極速表決，強姦立法會、強姦民意，民建聯又有無出過一句聲？
三、當上年運輸署同九巴唔理居民嘅反對，強行推動「北區巴士區域重組」嘅時候，身為北區區議會交通及運輸委員會主席嘅民建聯劉國勳，又有無企係居民嘅角度，維護北區（特別係上水）居民嘅利益？
四、當反對派批評政府處處維護大商家，要求打倒官商勾結嘅時候，民建聯又消失左去邊？
民建聯係咪真誠為香港，大家心中有數。陳雲生呢個時候企係居民身邊，純粹為左下年嘅區議會選舉。踏入選舉季節，忽然鬧下政府事小，得罪居民事大嘛，我諗運輸署都會體諒陳雲生，亦都會包容佢，尊重佢同政府之間嘅「立場差異」。
不過，都係果句，選民係要為自己嘅決定負責的。你當日投左民建聯一票，就自然要預左佢會有朝一日出賣你；同理，你當日含淚投民主黨一票，你都要預左佢今日會再一次「投共」，係最後關頭「轉軚」支持政改。
好啦，鬧完民建聯，講返今次運輸署同九巴係屯門區嘅重組計劃先。改動會於9月27號實施，內容主要有以下幾項：
一、59A由而家嘅全日服務縮減至只於繁忙時間服務，總站由深水埗縮短至葵芳；
二、58P縮短服務時間；
三、60M總站由屯門市中心延長至屯門西鐵站；而61X則由屯門西鐵站縮短至屯門市中心；
四、66M與66P合併，新路線跟66P方式行走，全日服務。
以整個屯門區嘅角度睇，最有爭議嘅會係第一點。因為而家非繁忙時間來往屯門碼頭至荃灣嘅59M都經常爆滿，而59A就正正做左一個唔錯嘅分流作用。另外，因為荃灣來往深水埗嘅巴士服務實在太不堪，再加上40改道以及66取消，變左59A嘅另一個功用，就係幫助荃灣區居民有一個車程合理嘅服務出美孚同深水埗。而新計劃下59A只會保留繁忙時間服務，同埋縮短至葵芳，受影響嘅乘客都唔少。
至於第二點，雖然我覺得58P其實有佢嘅功用（俾良田區居民特快歸家），但如果58P減班之下，58M會加返班次，咁我覺得問題並不大。而第三點更加無可能反對，畢竟延長後嘅60M都唔會係西鐵站上滿，搞到市中心嘅乘客無得坐。
咁第四點呢？一直以來，57M、66M同66P都係重疊得離哂譜，所以九巴要將佢地重組，係無可厚非。要鬧九巴點解今次唔拎埋57M出黎重組，都無乜意思，反正九巴蠢係自己嘅事，我地蟻民唔需要為九巴擔憂。至於屯門市中心少左條66M出去荃灣，亦都唔係一個好強嘅理由，因為而家大部分市中心居民都係搭密好多嘅60M，或者係58M，仲邊會咁好心機等一條20分鐘都未必有車嘅66M？
總括來講，今次九巴係9月27號實施嘅重組，有佢嘅問題，但相比起之前嘅沙田區及葵青區區域性重組，已經算係無得罪哂成個區嘅居民了。
至於陳雲生係圖一列出嘅要求，都算合理。不過都係果句，唔駛咁激喎陳議員，我地要理性、要慢慢傾，你咁樣一味鬧，只係破壞我地和諧、安定嘅社會，唔符合 貴黨一直標榜「建設繁榮安定嘅香港」喎！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年8月26日
