小學雞的期限

Internet Archive Book Images 圖片｜Philadelphia. South Philadelphia high school for girls. [from old catalog]

幾年前，考完試仲未畢業就見得成第一份工，當時抱住小學雞既諗法，可以盡快搵錢俾到家用，又可以威俾未搵到工既同學仔睇！

作為職場新人，就如一張白紙，唔了解辦公室既權力遊戲，每日自顧自做完手頭上既工作就準時放工鬆人。自成一國既人事部，對於玻璃門外既同事黎講，佢地一直以為要處理大量保密文件既部門必定係忙得不可交加，躲係玻璃門內對住電腦做到火紅火綠。呢個假象進一步提升左人事部高高在上既形象，更有唔少人不自覺會討好我地，希望收到多啲內幕消息或者係佢地上司面前美言幾句，年少無知既自己當然亦都沾上少許自傲感，行步路都輕挑左！但係見慣世面既上司反而會加強戒心，心知肚明被捧得高亦會跌得傷既道理。

愈接近高層既崗位其實愈危險，雖然部門實行輕鬆既工作文化，但係的確要作出唔少重要既決定同埋要謹慎處理所有人事。當時自覺自己不過係小小既助理，有咩唔識都有上司無條件出手相助，危機感極低。

直至有相熟既同事快要離職既時候，睇唔過眼我實在太純真，提醒我其實辦公室總會有無聊人喜歡興波作浪，職位如清潔茶水姐姐更唔可以睇少。「你諗下，佢地每日三次奉茶俾老闆，可能順便就報告下對我地既所見所聞，所以你咪咁傻講咁多自己野俾人知。」，無知既小學雞要領略更多所謂職場上既陰謀論！

「仲有保安叔叔，知道晒大家出入時間，你唔會知佢地幾時講漏嘴邊個出左去食支煙、買咖啡，更莫講話遲到早退既事。」，一聽完頓然精神緊張起黎，原來小學雞一直唔知自己隨時會踩中陷阱，仲幼稚地以為得到一份朝九晚五半既工就放心晒添！

由轉第二份工開始，無人會再對待自己係小學雞，唔留神行差踏錯、碰壁，小心立即落入為被攻擊對象！係返新工前既一星期，要開始調節心情，係未知既新環境先做好充足既心理準備。唔好再單純帶住想學習既心態，而係考慮自己可以點樣盡快上手、適應、再話咩人知你既價值！

做小學雞係有期限，隨住自己得來既體驗，要由溫室逼自己走出黎。如果唔係永遠無進步，仲會俾人笑足一世！

作者：HR熊

人事部工作既小妹，見盡唔少公司既「人」同「事」，係呢個平台上一齊分享職場上既苦與樂，笑與淚。Facebook: https://www.facebook.com/hrbear.dairy

閱讀後覺得好，請多多讚好及分享～：）