「喂，好悶呀，仲講Ice bucket challenge」

「喂，好悶呀，仲講。」
「係囉就係悶極都仲有人樂之不疲繼續玩嗰下離譜，分析下點解會咁都好丫」

呢幾日已經有好多人就呢個活動寫唔唔少野，有人話佢浪費食水，有人話啲人無腦，人挑佢機就要應機，又有人話佢搶晒其他組織既捐款。本文唔係打算批評佢，始終籌款活動沒有誰比誰更高尚呀嘛。咁究竟點解咁活動可以席捲全球？本文旨在胡亂猜測下。

首先，ice bucket challenge既目的係為咗幫關注好似霍金咁既病既組織籌款，但係你問下玩既人知唔知個美國組織做咗啲乜？我估有一半以上都唔知。「總之捐錢畀佢幫嗰啲人啦」。據聞個組織就無乜錢放落去研究度去根治呢個病，但係其實根本唔重要，正如你捐錢俾無國家醫生唔係為咗根治非洲貧窮問題一樣。同時，係淋水既過程你可以「體驗」患者嗰種冰冷既感覺，咁你就成為咗會關懷世界，先天下之憂而憂既一份子了。呢種道德高地而家做咁簡單既事就得到，何樂而不為？

其次係虛榮。Bill gates玩過，Zuckerberg玩過，劉華金城武張家輝粒粒皆星，你都有份玩，成件事立即將你同佢地之間既距離拉近咗。而且仲要拍片放上網，宣告世人「嗱，我畀人點名呀」，就好似歡樂滿東華啲總理咁要出Show捐錢啦。機會唔係個個有架，而且你仲見唔少平時只會係facebook打中文既人用一式一樣既英文講一模一樣既說話添～

然後係朋友圈子。每人可以點名3個，咁你會點名邊3個？可能係最老友或最親嗰3個；而功利既人會點名最想拉攏既生意伙伴：我同你一樣行善最樂，有接近既價值觀，人畜無害。而被人點名既人就會有被肯定既感覺，因為成件事係有quota的，你點得我，即係我都係受人重視又畀人感覺正面啦！咁我又點可以托手踭？

最後，消暑。唔駛講啦，夏天淋凍水有咩挑戰可言？冬天有人玩先同我講係challenge啦。

不過點都好，功利啲講，呢個活動都幫到班患者嘅。人性本身就唔係十分高尚，利用到人性去做好事，玩同捐錢既又開心，雙贏，幾好呀！你平時叫堆友友捐錢，有邊個肯？成件事，只係有人玩到死咗同重傷比較可惜。至於有堆友仔扭曲件事，搏出位，就預咗架啦；係唔係浪費食水？對唔治，唔算囉。嗰度用得你幾多水？一次浸浴已經遠超呢個用量啦。更何況你唔用，啲東江水都已經俾咗錢，都係一樣流出公海架啦。用抽濕機水，泳池水，洗菜水既人，其實係怕咗你班道德塔利班咋。用咁高既道德標準度人，有咩意思？倒不如學下點樣更有效去幫人啦。

作者：市井之途

閱讀後覺得好，請多多讚好及分享～：）