如果係都要喺暑期加上一個期限，我希望係一萬年…

（原載於：姐死姐還在）

（純粹懷緬過去系列文章，特別送比而家都仲未做哂功課嘅朋友仔）

今日係8月29日，距離開學日只係得返兩日，你做哂功課未？

無論升小一定中一，每年嘅呢一日，我都悔不當初，因為通常我呢個時候都係咩功課都冇做過。本來買哂姣婆公仔月曆，寫哂「每日功課幾分鐘，返學之前好輕鬆」嘅人生目標全部都冇實踐。

其實每年暑假鬼節，見到呀媽燒衣，都好想隊埋本暑期作業落去燒。

到左呢個關鍵嘅時刻：

> 我都會數幾次，「1月大，2月小，3月大，4月小，5月大，6月小，7月大，8月大…」，因為我要確保8月唔係得30 日，make sure我仲有兩日做功課。

> 唔理三七二十一，唔理岩定唔岩，我都會痴左線咁將所有暑期作業嘅空隙都填滿佢。排句呀，擴張句子個D ，我全部都變左縮短句子。選擇題就要毫不經意，無規律的ABCD哂佢。

> 好似立法會拉布咁，我日以繼夜，夜以繼夜咁做功課。一邊做一邊諗：出得黎行，預左要還…

> 我仲會不停同天父講數：「天父呀，如果今年比我過到呢關，做哂D 功課，我下年真係會改過自新架天父。」

> 做做下，呀媽一定恐嚇我：「抵你死啦，你做唔完我實唔比你睇兒歌金曲頒獎典禮」。我係唔可以唔睇架，我個個年代無MYTV 架，我唔睇，開學我點同同學仔討論賽果姐。聽到呀媽恐嚇我，我就會好似鬼上身咁口up up 同天父講：「天父呀，唔好意思呀，頭先漏左，千其要比我係兒歌金曲頒獎典禮前hur hur 聲做完呀，我真係會痛改前非架我。」

> 最慘都莫過於做完一頁，揭去下一頁係叫你剪報搜集資料，臨時臨急叫人點搜，真係好想打999。

如果係都要喺暑期加上一個期限，我希望係一萬年 …

總係有幾年，9月1日係星期日，然後我又係會8月30日先做功課，然後再不停揭日曆confirm 9月1日係星期日。

痴左線咁趕緊功課嘅朋友仔，加油啦。

PS. 暑假過左之後，年尾peak season 之前，我呀姐觀音上身，慈悲為懷的比我放annual leave，都係個句，「如果係都要喺張假紙度加上一個期限，我希望係一萬年…」。Holiday，我真係「愛你一萬年，愛妳經得起考驗，飛越了時間的局限」

作者：姐死姐還在

我叫奴隸獸，任職大公司極小職員，日日比阿姐政治迫害，深明「姐姐不盡」的真諦，以「你睇我唔到⋯⋯」為每日工作目標。 「姐死姐還在」fb page

閱讀後覺得好，請多多讚好及分享～：）