《異數:超凡與平凡的界線在哪裡?》:
擲落老屎窟塊面度

《異數:超凡與平凡的界線在哪裡?》:擲落老屎窟塊面度

 

朋友介紹我睇Malcolm Gladwell的《異數:超凡與平凡的界線在哪裡﹖》。呢本書的作者曾經寫過《引爆趨勢》同《決斷兩秒間》,係美國暢銷作家。

《異數》呢本書幾有啟發性,同《蘋果橘子》系列相似,作者會嘗試搵出事物之間看似無關但又息息相關的隱藏聯繫,揭示成功人士背後隱藏著的秘密。

 

比如其中一章講南韓的大韓航空響90年代空難頻生,更被指責為「航空界安全記錄最差的航空公司之一」,究竟點解韓航的出事率比其他國家的航空公司特別高呢﹖原來係同南韓人階級觀念特別重有關。響韓航入面,機長就係上帝,副機師往往唔敢直接指出機長所犯的錯誤,而係選擇用非常委婉的方式去暗示,結果容易阻礙溝通,令危機出現時未能及時制止。

作者指出,每一個人都深受自己出生地、出生年份、種族、文化所制約,而一個人的成功,往往係天時地利人和種種因素的配合,個人努力雖然重要,但重要程度比不上客觀環境因素。作者舉出大量名人事例去證明「創造歷史真正的原因並非才能,而是機會」。大部份成功人士之所以成功,其實係好大程度上係揀岩時辰同地方出世,又能夠把握機會先會成功。絕對唔止係個人努力就得。

 

比如第一章提到加拿大曲棍球明星隊伍,40%的球員都係一月至三月出世。點解年頭出生的小孩最後會比較容易做到加拿大曲棍球隊選手﹖原來係因為佢地的年齡分界係一月一日。有潛質的小童加入少年組之後,年頭出世的比較有生理優勢,而呢種優勢會隨住「馬太效應」而愈來愈得到強化,結果累積好多年之後就會令年頭出世的遠遠拋離年尾出世的表現。一個人為隨意的選擇,就影響左無數人成功的機會。

又好似Bill Gates咁,就正正係20歲時適逢當時個人電腦問世,電腦革命方興未艾。如果Bill Gates早十年或遲十年出世,都好難食正呢股風潮,咁就未必會有呢號人物。而事實上,無論係Bill Gates、喬布斯定係其他一堆IT界巨子,都正好係1955年前後出世。

 

中國人好鍾意強調成功要靠個人努力。而家好多上晒位的嬰兒潮世代都好鍾意強調自己當年有幾挨得、有幾努力,彷彿所有成就都係靠自己打拼,冇靠過社會一分一毫咁。呢種講法完全係錯誤。要成功,「一萬個小時的努力」自然是必要,但成功更重要的是運氣,都要出生響「對的時間」同「對的地點」先得。好簡單,如果班嬰兒潮老屎窟出生於今日,佢地的表現唔會比我地好。

所以作者響後記都再次強調:「大律師、數學天才和電腦大亨這些人似乎都非比尋常,是我們這個社會的『異數』,但他們也是歷史、社群、機運與文化遺澤的產物。他們的成功其實沒有什麼特別或神秘之處,是優勢和文化的網絡形成的。」

呢個道理我地呢班絕望的80後自然一早明白。老實講,呢個道理都唔係咩特別發人深省的真理,但呢本書就提供左好多確切可信的名人實例去佐證。所以下次再聽到班老屎窟響度自吹自擂話當年自己幾咁努力幾犀利既時候,直接拎起呢本書擲落佢地塊面度就得。

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 83615
Date: 2014-08-30 17:22:00
Generated at: 2020-10-30 10:07:03
Permalink: https://www.vjmedia.com.hk/articles/2014/08/30/83615/《異數:超凡與平凡的界線在哪裡?》:擲落老屎