是咁的，近日梁文道寫咗篇文，提到維穩是盤大生意，所以有人會故意製造「矛盾」（即衝突）嚟維持維穩經費，佢又提到《熱血時報》同埋《輔仁媒體》係可以喺大陸瀏覽，暗示兩間網媒成為咗「中港矛盾」既源頭之一，被利用黎呃維穩費。呢篇報道當然引來網上熱議同炮轟啦，無幾耐，《香港獨立媒體》首先撰文力撐，以自稱「依據少數服務多數民主程序編寫的集體意志」的「獨角秀」作者身份，利用網站greatfirewallofchina.org網站作測試，指《獨媒》及《852郵報》遭全國性封鎖，而《熱血時報》和《輔仁媒體》則五個地區都能連得上，並於文末不點名指人對號入座。不久，《熱血時報》的Nagisa Kaworu 撰文回應，反擊指《香港獨立媒體》所利用的網站根本不能作準，為了護短而妄顧事實，與常識作對，又不加考證云云。及後，獨角秀再度撰文，利用《熱血時報》提供的greatfire.org再進行測試，指現存測試中國防火長城的工具，均存在準確性問題，問題不在於「被封」與「不被封」的網站，而在於決定大陸網民該看什麼，不該看什麼的網管。
眼見香港網媒兩大支柱《熱血時報》及《香港獨立媒體》皆只能以第三方網站進行測試，殊為可悲，故決定親身北上測試「給大家一個說法」。不過由於盤川及時間有限，此次只以深圳為測試地點，以深圳本地手機數據測試。
經親身以中國聯通手機3G網絡測試及利用工具分析後，結果如下：
故此，梁文道聲稱，及《香港獨立媒體》指，《熱血時報》可以喺大陸瀏覽的說法並不正確。《熱血時報》遭到冤枉可謂慘慘豬。而《香港獨立媒體》指「852郵報遭全國性封鎖」都肯肯定唔正確。高舉理性《香港獨立媒體》竟然出現如此粗疏又缺乏充足支持的文章，還要押上自家品牌聲譽同梁文道攬炒，真係令人遺憾。而《輔仁媒體》罪證確鐅，果然係令人髮指既法西斯極右網站，煽動中港矛盾既千古罪人，所以筆者決定將本文貼係《輔仁媒體》以茲嚴正警告。
另外值得一提的，是由於《香港獨立媒體》指向遭直接封禁的google pagespeed（存放於Rackspace的inmediahk.net會自動導向至存放於google的www.inmediahk.net），故此即使inmediahk.net沒有遭到封禁，也會受google拖累而無法瀏覽。
因為唔了解。你個瀏覽器好似開唔到《852郵報》或《輔仁媒體》，係因為佢用咗啲被中共封禁既資源，但係其實其他野都已經準備就緒，畀啲耐性等多陣應該有野睇，或者用rss或純文字之類都應該會睇到。
我既測試係以一個特定時間特定地點做測試，目的唔係要做持續既測試，所以唔可能保證永久正確。但基於合理推測及對GFW架構既認知，至少結果於深圳有效。測試旨在驗證上述一眾媒體及相關人士說法是否正確。而測試過程我哋測試埋一啲肯定唔會封既媒體（例如hkepc，on.cc），確保網絡不受其他因素影響。另外我地都同時以額開既香港網絡測試確保所述網站係正常運作當中。（香港roaming day-pass加大陸本地數據燒咗我成三舊幾水，好肉痛。）
測試完結之前，筆者手㾗，測試埋一啲筆者認識既博客，結果出晒名法西斯同極右既林忌同無待堂竟然無法加入煽動中港矛盾，似乎還要多加努力。
其實GFW既封禁係有三個層次。
最高級待遇既，好似google同facebook咁，係會直接係查詢地址既時候騎劫，將查詢google同facebook既交通轉去GFW既伺服器。所以係會完全連唔到線。而www.inmediahk.net就係因為放係google所以受到株連。
圖中就係facebook做例子。
首先第一行就係瀏覽器向域名伺服器查詢www.facebook.com既地址。正常嚟講，我哋係應該收到第六行既回應，地址應該係31.13.79.33。不過GFW就插入咗第二行同第四行既假地址，37.61.54.158同59.24.3.173都係GFW自己既地址。瀏覽器就會誤判（但應該唔會好似蔡東豪咁恐懼），連線去第一個指示既地址，就好似第三行咁。然後就得個等字無人應，出現第八同第九行既重試，直到你F5都㩒爛都唔會上到facebook。
而第二個層次，就係會係你連線既時候，送一個重置既封包畀你，將你既連線中斷。呢種做法係有機會失效，所以有時會得有時會唔得。以上被測試的網站都係因為呢種待遇而斷線。
呢度我地用inmediahk.net做例子。
首先第一二行係成功既地址查詢。瀏覽器都係第三行，第五行同第六行成功同inmediahk.net連線，並於第六行開始問伺服器攞網站內容。不過第十二行至十四行就出現三個重置連線既封包，唔駛問呀貴，呢三個封包係GFW攪攪震呃你個瀏覽器既。於是瀏覽器又誤判，連回覆都唔等，係第十九行同inmediahk.net伺服器說再見。
其實仲有第三個層次，就係睇你網站內容有無敏感詞去即時中斷你既連線。但係今次測試用咗唔同既敏感詞都無法成功，唔知道係GFW鬆咗定其他因素影響啦。而為確保我地既測試結果唔係受呢一個層次既因素影響，我地係會嘗試存取favicon.ico及robots.txt，網站常見而存在敏感詞機會極微的資源去排除呢個可能性。
我地用咗Kali Linux做基礎，再用上面既工具做測試。Kali Linux係一個專為資訊保安而設計既Linux系統，有各種工具同比較「寧靜」既習性，唔會亂咁連線影響測試。而工具我地主要用wireshark做封包截取，用firefox做普通既連線測試。如果網站有load極都load唔到既問題，就會用chrome同佢既inspector去睇下係邊一個模組出事。而連線都連唔到既，同埋後期非完整既博客測試，就用curl呢個工具去手動連線做確認。我地都會用dig呢個工具去證實下個網站有無係域名層面被GFW封禁。其他輔助既工具仲有traceroute，whois等常見工具。
因為梁文道呢條友既文章，攪到成堆人網上互片，浪費咗香港幾多生產力？本文旨在以真·技術角度拆解，封禁網站名單根本同是否煽動中港矛盾係完全無關係。同時希望某啲媒體好好檢討下，唔好下下以為自己好進步好理性，但係就寫埋啲亂黎既文章黎攻擊其他媒體，呢啲野真係沒有誰比誰更高尚。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年8月31日
