《大海盜》狄龍 邵氏兄弟(香港)有限公司
收工落茶記食飯，啱啱食完最後一啖，就見到茶記電視播緊無線新劇活動。唔睇由自可，一睇不得了，竟然係「張‧保‧仔」！霎時間腦內飛過一大堆唔係好啱食緊飯諗起嘅故事，然後爆出一句：「嘩咁咪同明光社宣戰？！」講完呢句我又發現自己懵上腦：果間係無線嚟囉，佢敢？
點解我會爆出句咁嘅嘢？因為歷史上嘅張保仔，故事傳奇得嚟又破格，保證明光社睇完頭三成就話全人類不宜然後喊打喊殺。不如依家就將輔仁當做榕樹頭，講下張保仔段故……
嘉慶年間，由於乾隆削弱水師嘅政策，令大清海防力量大減，沿海居民往往輕易出海為盜。加上安南西山阮氏三兄弟啱啱統一安南，建立新朝，有心學野豬皮入主中原，收買唔少漁民，提供武器，去中國做細作。一時間，南起東京灣白龍尾，北至浙江海岸，海盜蜂湧而至，襲擊商船，擄劫漁民。
其中好有可能係喺香港出世嘅鄭一，嚮嘉慶十年（1805）同華南一帶其他五支海盜結盟，分為紅、黃、青、藍、黑、白六旗幫派。鄭一嘅紅旗幫手下有戰船千艘，為六旗最強，勢力一時無兩。
呢個時候，鄭一正係雄姿英發，美人在抱。先娶蜑家花艇妹石香姑為妻，後擄新會江門美貌漁家郎為寵。冇錯，鄭一係雙性戀者，萬能插蘇。傳說約喺嘉慶六年左右，鄭一船隊如常「做生意」，擄人勒索，順便睇下有冇勇悍漁民可以入夥。
不過，今次同上次好唔同，鄭一喺人質堆中驚鴻一瞥，發現一個好靚仔嘅後生仔……
「叫咩名？」
「張保。」
「張保仔呀嘛？的佢入我房。」
當晚，年僅十五歲嘅張保仔「開竅」了……
張保仔咁就入咗紅旗幫，同時因為同幫主嘅超友誼關係扶搖直上。名義上佢係鄭一契仔，事實上佢真係鄭一嘅契弟。如是者過一排，人稱鄭一嫂嘅石香姑行過，春心大動……
「張保仔♥」
「咩事啊阿嫂？」
「嚟‧我‧房！」
當晚，契弟張保仔竟然又做返個男人，重係一嚟就畀義嫂勾……
時間又返到六旗大會盟嘅時候。當年鄭一如日中天，華南過路商船全部都要交保護先可以過。咁一直有出入開澳門、廣州嘅外國商人，早就知呢啲規矩。呢啲規早喺明朝鄭芝龍一統江湖嘅年代佢哋就交過。咁啱鄭一祖先就喺鄭成功手下當過兵，話唔定重係鄭芝龍手下嘅海盜添。不過，天妒英才，就喺兩年之後，有次打風打沉咗鄭一艘船，紅旗幫一時群龍無首，幫眾就唯有推鄭一嫂成為幫主。
呢個時候，張保仔終於唔使再賣菊花，相反，佢同鄭一嫂嘅關係更加係反客為主。鄭一嫂為咗有個親信，同時又為咗佢同張保仔可以「關係正常化」，竟然嫁畀張保仔。張保仔由一件靠賣菊花上位嘅契弟變成一幫之主，並挾有南海最強嘅紅旗艦隊，真係快活過做皇帝──至少想食咩女就有咩女食，冇人可以幫佢揀女，更加唔使「食住先」。
六旗海盜幫肆虐南海，清廷終於認真對待。一方面用招安分化六旗，等佢哋互相攻伐。又發信同澳門嘅葡軍約定聯手。嘉慶十五年（1810），清葡聯軍喺赤鱲角與張保仔大戰，重創紅旗幫。張保仔即派鄭一嫂上岸同清朝傾招安。最後紅旗幫歸降清廷，張保仔封為三品武官，派駐澎湖打海盜。並於道光二年（1822）去世。張保仔生有一子一女，個仔玉麟後來去咗澳門住，後人睇怕都重喺澳門。
張保仔一生如上，你話無線敢唔敢拍套咁嘅張保仔？一旦出街，黃金時間唔上得不特止，明光社同高主教一定又跳出嚟阿芝阿佐，唔使講班師奶又會話你教壞人──而絕對唔會有人諗下，呢件係真人真事！香港人只係想要個「舒服」嘅答案，「真」定「假」，關香港人春事咩！
如果以上萬能插式三角戀無線真係敢拍重出埋街，我即時入港幣壹仟圓整落輔仁媒體戶口（編按：多謝……），立此為據！
P.S. 不過無線呢次有件事做得好，就係搵黃浩然做張保仔。唔係話選角正，只係因為佢真係 Wrong Hole 咁囉。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年9月4日
