身為梁特頭馬,如何令女兒考第一?

你係一位家長。曾經做過議員,然後出任局長,並且係梁書記既身邊紅人。

有一日,你法律上的配偶其家人 - 即係你個親生女,佢發脾氣唔肯食飯。原來係因為佢同學考試好過佢,考唔到第一而唔開心。你為左哄返心肝寶貝,並且認為「自己起碼都係政界名人、梁書記頭馬、昔日中學時期都同教主做過同學…」,個女唔做第一都襯唔起自己家庭…

俾著係你,你會點做?

A:叫小朋友俾心機讀,下次考第一
B:自己捐錢起新學校大樓,然後自己做校董會主席
C:發電郵俾家長會各成員,誹謗個同學仔出貓

 

------------------------------

 

「如果你揀A,難度係最高。」

要小朋友靠自己考第一,安全系數低。學校考試前,冇篩選機制,冇得俾你先作篩選,篩走所有競爭對手。

尤其小朋友做通識卷,答案永遠寫「反對派不遲不早,勾結外國勢力圍堵中國,達到顛覆國家政權的狼子野心…」,稍為有D良知既老師改卷都唔會俾分。

 

「如果你揀B,難度都高,不過唔係冇可能。」

做局長,靠份政府人工,高極都唔夠同其他做航空公司總裁、跨國企業經理既家長董事比。要做局長發達。識撈,一定係靠以權謀私。

不過控制驗樓部門,自己去做劏房業務。收租既錢,都只係夠拎外國護照係英國住既囝囝每月洗費。靠屯地,自己主事既發展計劃又未開工,保育社運廢青又礙手礙腳。

如果要等,要等到梁書記連任多四年先分到錢。變數太大,亦冇可能叫個女冧班冧到下屆選特首。

 

「如果你揀C,唔難,但係風險大。」

發下電郵,其實唔難。自己立法會開會篤下手機都做到。雖然撻「局長」個朵係猛,不過只係呃到一般牛頭角順嫂,落區時候肯同自己握下手(搖緊就順便「目及」下師奶個心口)。

話晒自己個女讀貴族國際學校,個個家長都非富則貴,冇咁易俾自己凶到。尤其自己做過功能組別既低票議員,總係覺得人地睇自己唔起…如果單野揚左出尼,一來瘀皮,其他局長一定笑到自己面黃。二來可能局長都冇得做,雖然已經打算搵個老婆出尼頂…

 

------------------------------

 

 

正當苦思三個選擇既利害之際,電視新聞見到一個人…原來係最近政壇紅人,紅過根正苗紅梁書記,以「讀得書少,唔好蝦我」做口頭禪既張融先生。佢點威?唔洗人講都知。佢攪左成億既「維穩概念」生意,就咁都有一千個裝住先,無本生利。依家仲攪多個新概念,叫「恐怖熱線」。好似專捉有顛覆因子 - 「佔中」既學生咁話。

依條橋,幫到手!即刻打「恐怖熱線」個電話,告發囡囡個同學仔「佔中」。聽日一哥就會去學校拉人,後日教育局「把曲頭」又取消佢學籍…既方便又快捷。個囡考成點都唔緊要。

拉Q左頭99個,個囡考第100都自動排第1啦!

 

作者:曾浚瑛

曾浚瑛
人生五十年,有如夢與幻;有生斯有死,壯士何所憾。

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 解構精神心理治療——輔導個案概念化(Case conceptualization) by 西多士
    如果問大家對「輔導」一詞想起甚麼?可能會聯想到精神疾病,情緒困擾,婚姻問題,家庭暴力等。其實,「輔導」並不如有些人想得這般負面的。先說說「輔導心理學(counselling_psychology)」吧。!它是「應用心理學(applied_p…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
歡迎讚好我們的facebook page,免費資訊源源送上。

文章資訊

ID: 84830
Date: 2014-09-12 00:11:35
Generated at: 2022-11-29 16:28:29
Permalink: https://www.vjmedia.com.hk/articles/2014/09/12/84830/身為梁特頭馬,如何令女兒考第一?