九‧二二罷課：「罷課」一日

上星期，學聯及學民思潮宣佈將於九月二十二日舉行大學生罷課一星期行動，其後更宣佈中學生將於九月二十六日罷課一天。學生起來行動係好，不過都要正視一下今次罷課嘅問題。

第1， 參加今次罷課嘅學生，目標都是反對中央對普選特首「落閘」。然而，不少參加罷課嘅學生都認為罷課作用不大，只係「掙扎一下」。有依個想法其實情有可原，因為係大部份香港人心目中，中央係神秘而有大能，與神無異，要對抗佢根本冇可能。但係，帶有消極想法嘅人，激昂嘅吼聲也會變哀號。所以帶住依個諗法去對抗中央，成功機會係零。

第2， 領導者不應該公開講明罷課期限，因為一開局就揭底牌，對行動亳無好處。有人會話:設立限期，係俾政府有時間去考慮及妥協。其實，談判嘅基礎是雙方皆為強者，或者係弱者抓住強者痛腳，從而作出威脅。單純罷課一星期，對政府影響甚少。公開底牌，就好似小孩講明玩到七點鐘回家。試想想，究竟講明返屋企時間，定係唔講會更加容易令父母抓狂？

第3， 領導者未有充分利用罷課嘅力量，尤其係缺乏罷課期間嘅指示。學生們參與罷課，除左可以對社會正常秩序造成影響，其實仲有好多野可以做。現時領導者要求罷課學生在罷課期間進行集會，和以「罷課不罷學」為目標，在各個大學進行講課。試問對佢地當初罷課嘅目標有何影響。從以往嘅罷課歷史來看，學生會利用罷課期間進行各種社會運動，其中大部份都係較為激進嘅行動，務求達至與當初目標有關嘅成就，而唔係好似而家咁，為左完成”罷課”而努力。我明白，要香港學生進行如五四運動、法國五月風暴等激進嘅行動係不可能的，畢竟我地都背負著「和平」嘅包袱。不過，罷課學生應該要利用罷課，去作出對將來有一定影響嘅行動，例如積極向沒有或反對罷課嘅學生宣傳罷課行動嘅目的，務求將來有更大嘅動員能力。

第4， 動員中學生參與罷課實屬不智。學民思潮剛宣佈中學生將於九月二十六日罷課一日。首先，罷課一日我實在諗唔到對政府有任何影響，一日嘅時間相信不足以擾亂香港教育秩序。相反，雖然現時中學生具有一定政治觸覺，但對於大部份家長和老年人嚟講，佢地給人印象仍然係在政治上未成熟。因此，動員中學生參與罷課，不但缺乏成效，更使老一輩對罷課反感，我身邊有親戚就話：「搞還搞，做乜搞著D中學生」。可見，動員中學生之舉著實不智。

雖然，要求一眾年青人一口氣去解決以上眾多嘅問題係為難佢地，因為大部份問題都涉及長久嘅政治文化。然而，我地除左要與落後嘅文化作鬥爭，探討其他可威脅到政府嘅行動亦非常重要，因為如果我地繼續在「和平」嘅陰霾下與敵人講道理，而我地面對嘅更係愈來愈野蠻嘅政府，最終只會失敗，甚至會失去更多。

作者：左仔

左仔一名，讀緊鯨大政治系，最憎人唔識政治又亂咁講政治。

閱讀後覺得好，請多多讚好及分享～：）