（photo via cc Flickr user Mr. Q）
最近，見到班中學老師總係滿臉愁容，原來全部係為咗諗計應付「可能」出現嘅中學生罷課問題。其實本人早已備妥應對方案，保證萬試萬靈，掂過萬潔靈。見佢哋咁慘，等我醒幾招過佢哋啦。方法如下：
唔理發起邊日罷課，一律將嗰日定為學校假期，將聖誕節呀、清明節呀假期全部調前，等你班友仔冇得「罷」，名義上嗰日係放假，你去邊都唔關學校事，仲點表態？到遲啲再冇人罷課、連年初一都要你返學呀，問你仲顧唔顧後果？
對於極度緊張學業嘅Band1仔女，就可以用分數嚟誘惑佢哋。係罷課日安排一連串考試，總之嗰日點都要keep住係課室，否則下學年隨時轉去讀band3學校。或者將平時分嘅比例無限提高，係課室答一題，成績表加十分，問你仲敢唔敢離開課室。
利用唐唐遺物「關愛基金」搞遊學團。北京又得、北韓又掂，甚至連鳥克蘭都唔好放過，全港中學生全部離開哂香港，學校剩得幾個校工，問你班思潮仔發動到啲乜？
香港法例寫得好清楚，父母係有責任送仔女去學校讀書，否則係違法。家陣間間學校都話「不支持不反對」，又話要寫家長信呀咁，總之有理冇理，學校一收到家長信就即刻報公安上門拉人(拉佢哋父母喎)，孝順嘅新一代必然會顧及親情同日後嘅零用錢而懸崖勒馬。
為咗救救孩子，免受污染，政府可以將什麼思潮組織定性為同法x功一樣咁邪惡，仲要話佢哋啲領袖係基佬、人妖等等，甚至可能係英國倫敦少女，總之要令一眾追隨者夢想破滅。
所有中學一齊炒哂啲通識科老師。
只要善用以上六招，應該可以好好保護我哋嘅下一代，唔罷課，唔去公民廣場，放學繼續補課，補完課繼續搵天王。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年9月16日
