北京都好關心留京港生對佔中既睇法～

（photo via cc Flickr user kenner116）

人大對香港政改落閘令「佔中」一觸即發，而北京當局會點樣應對「佔中」備受關注。呢個時候，我諗起離京前幾日，我間學校要求我呢種香港學生（下簡稱「港生」）填寫既一份問卷。

件事是咁的，6月底某日，亦即係我畢業前幾日，有一個電話打過黎俾我，叫我即刻去學校某樓的辦公室填一份「給港生填的問卷」。當時我仲以為學校想以問卷搜集港生的畢業訊息，仲覺得有少少奇怪，一般搜集訊息都係港澳台混埋一齊既，好少會單獨對港生咁做。

到左個度之後，有兩個負責人記低左我個名，就俾左份問卷我了。一睇，份問卷既「生產者」原來係「北京市政府」而不是「（我間）大學」，驚覺原來搜集港生訊息既係政府，學校只係代勞既。Well, 冇問題照做住先。不得不說份問卷設計得好用心……一開始既問題都係問咩「你在北京生活有什麼不適應的？」、「你在課上有什麼困難嗎？」、「你能與大陸的同學和諧相處嗎？」，搞到我真係以為北京政府關心我地呢D香港學生既情況。

做到後半，先發現原來真係「好戲在後頭」，當中幾條問題是咁的：
「對於中央政府回歸後一系列的惠港政策，你有什麼看法？」
「你認為內地和香港此前發生的一系列矛盾的成因是什麼？」
「對於佔領中環你有什麼看法？你支持佔領中環嗎？」

見到呢D，我確信前面的問題只係裝飾，呢份問卷的目的是想知道港生既政治取向，甚至可能會根據答案「特別照顧」個D 思想上「有問題」的港生。不過對我黎講，一來我就畢業離開北京，二來我既思想應該仲係大陸政府「可以接受既範圍內」，所以我照直寫左我既睇法。

提番起呢件事其實無咩特別目的，只系突然諗起，講俾大家知道下姐。以上提到既問題因記憶力所限，字眼上或者同原卷有誤，不過意思上應該無記錯。

順帶提一提，如果你第日有機會北上，千祈唔好太相信個D「本____內容將會保密」之類的保密協議。好似我做呢份問卷咁，卷頭標明內容保密，不過我做之前有人登記左我既資料，做完之後等我推門走個陣又見到個兩個負責人係度睇我份卷。如果第日遇到同我一樣既情況，記得小心同自己執生啦。

作者：興

不土生但土長於香港的90後，在北京讀書四年，踏遍中國各省，對中國和香港當前情況各有體會。熱愛旅行，向環遊世界的目標出發中，長期徵旅伴～

閱讀後覺得好，請多多讚好及分享～：）