（原載於：姐死姐還在）
見到有學校話罷課當曠課，要記缺點。如果個缺點係爭取民主嘅代價，拿拿聲比半打黎啦，趕時間呀。正所謂死有輕於鴻毛，重於泰山；爭取民主，要求真普選都要記缺點，咁因為欠交功課冷氣費、打架、遲到記缺點個班友仔，你地慚唔慚愧，我要求欠交功課最少要罰剝奪小息去小食部權利終身。
有得罷，當然係趁嫩罷。你愈長大，你嘅opportunity cost 只會愈高。唔通讀書唔罷課，grad 左會有時間罷工？讀書罷課又話影響學業，返工罷工你又話影響社會經濟，擾亂公安，咁係唔係要拎左長者卡先可以參加抗爭？到時我骨頭脆到，比警察推一推都身亡啦。
「學生唔好搞咁多野，比心機讀書啦」，孫中山聽到都想起身掌摑你，孫中山唔係讀書時發起運動推翻滿清，你班友仔可能仲要札腳，以及剃到個頭條髮線係中央啦。
個世界對年齡向來都雙重標準，呀媽叫我做家務個時實話：「咁大個人，咩都唔做」；到駁佢咀個時就話：「你咁細個，識咩呀你」。又要D 細路上通識學批判性獨立思考，又唔比人思考完以行動抗爭，究竟係唔係訓練D 靚仔用念力為社會作出貢獻？咁畢左業唔好搵工做啦，係屋企用念力推動香港經濟啦。
李國章：大專生明知不能改變人大常委的決定，罷課令人覺得是「做騷」…
「做騷」黎講，真係唔係政府個皮…引用返視帝黎耀祥嘅講法，政府年年都「爆騷」。
–>諮詢，諮完唔聽我地意見，係唔係做騷？
–>董太SARS去清潔，係唔係做騷？
–>mug 太豎起手指鬧蔡子強，係唔係做騷？
–>立法會個元秋，係唔係做騷？
所以我好明白點解唔發個牌比WIKI WONG，政府日日都有騷睇，你班市民仲唔知足，仲要多個電視台「做騷」你睇？
片文真係長過特長夜用片M 巾；其實重點只有一個：我撑罷課。
成日話香港係個自由嘅特區，選擇罷課爭真普選，定選擇繼續上堂袋住2017張票，呢D 根本係個人決擇。係我眼中，就好似去MK吉魚蛋一樣，有辣有唔辣，任君選擇。我完全睇唔透點解又要記缺點，又要叫學生退學，做咁多野去干擾罷課嘅決定。
PS. 話說，我張畢業證書係印左校長堯堯個名，好彩唔係李國章個名。我覺得印李生個名係上面衰過印半打缺點。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2014年9月18日
