【廣告回帶】一到夏季氣勢升高～

（原載於：廣告狂人 Madman’s Monologue）

作者：Tom Chung

廣告界前輩講過：以前？做一個煙仔客，夠養起成間廣告公司一年。

此話當真，相信今時今日新入行的廣告人難以想像。

尤其是當你三更半夜重揼緊石仔，側邊重有個AS「得」住喺度睇你幾時改完，你就會覺得上述呢段說話，頂多只是Urban Legend。

但其實，這是事實，只不過……

「這些機會不是你的。」

N年前，萬X路牛仔廣告，起碼行咗十年有多，從來冇咩大改動，呢啲錢，好似好易賺。

一眨眼去到九十年代，煙民變老，係時候吸納新客。（講得唔好聽，叫做「導人升仙」，又或者「Devil’s Advocate」，不過又咁講，冇人迫到你食煙，一切都係自己選擇。）

為咗咁，萬X路喺1992年夏天，放棄咗多年沿用嘅西部牛仔，反而起用當時得令嘅城城，配埋Sammi、梁漢文同許志安，推出《Marlxxro Red Hot Hits：火熱動感La La La》，跳躍節奏舞曲，火速攻陷0靚仔0靚妹心。

我當年身為中學生，都不期然眼前一亮，同朋友去California Red（當年好勁的卡拉OK Box加州紅）唱K咩？呢首歌係必唱，必定捽慶成個場。

但你睇返個MV，冇一句歌詞係講食煙，填詞人林夕只係用後生仔唔好浪費青春嗰種心態去寫，若用今日客戶常見的comment，或者會質疑：「係咪要有一句加返『萬X路嘅世界』呢？」

事實上，冇就係冇。

成個MV最夾個Brand嘅動作，就只係Color Tone以「紅色」為主。

今日客戶可能又質疑：「就咁樣一首歌，你黐落咩Brand都得啦，你黐落去匯豐銀行夠係紅色啦。」

當然，客戶的觀點冇錯，如果匯豐當年肯用，而家就係匯豐Own咗Red Hot Hits，而唔係萬X路了，而事實上，當年的青少年人，至今依然記得「Marlxxro Red Hot Hits」。

件事算唔算成功？大成功！

成功在於往後幾年，我同唔少後生仔都期待新一浸Red Hot Hits出街，數數埋埋，計有張學友《愛火花》、《餓狼傳說》、學友王菲《非常夏日》、草蜢加女歌手《熱力節拍Wou-Bum-Ba》、黎明《我愛Ichiban》、寶麗金群星《鼓舞飛揚》、陳慧琳等的《打開天空》……

成件事玩咗幾年，直至政府禁煙政策出台，煙仔客正式退居幕後，廣告公司開始要揼石仔。

回望以往有幾風光，其實多少有點兒無鬼謂。最重要嘅，係呢個案例有咩Lesson？

當年的廣告人，真係落足心機去同客戶度橋，所以突破了傳統視野，將流行音樂結合煙仔廣告，以吸納新客，其實幾高招。

今日當你埋位揼緊Layout或Powerpoint之時，你個心係「幫客戶完成目標」？還是「過到個客就收錢走人」？又抑或是「整啲新嘢隊個獎俾自己轉工」？定係「打工唧、犯法呀、我想0架」？

用心不同，往往Outcome不同，各位廣告人，共勉之。

作者：廣告狂人

心繫本土廣告，同時放眼世界。

閱讀後覺得好，請多多讚好及分享～：）