與上手有個約會

（photo via cc Flickr user Robert S. Donovan）

離開左舊公司，仲唔快快飛走？臨別時同舊同事講將來約出黎聚舊，大家心知肚明只係客套說話。即使有，果位朋友應該都一齊離開左公司，大家先可以暢所欲言。上星期三我阿頭係臨收工前話我知，我上手Bear主動約我地食lunch，當時以為自己聽錯，佢仲指明係因為想認識下我！

心裡暗喜，除左想趁機了解下佢年紀比我細，就已經步步高陞取得金飯碗既秘訣外，亦真心想認識呢位傻大姐既真面目！

第一次見面，佢就遲到啦，我阿頭無佢咁好氣，「有無搞錯？唔係應該book定位等我地黎架咩？」，當時好想回應一句，「人地而家唔係你下屬黎架啦，唔好咁啦！」之後見到有個高挑既身影氣來氣喘跑過黎，到啦！由束著馬尾、架起金絲眼鏡，到穿著可愛卡通既襯衫短褲，背著一個小背包既外形，加上見到牙肉既笑容，感受到佢確切係一位無邪又單純既傻大姐。無疑係自己職業病發作，第一印象就感覺到佢係一個點樣既人，我就知道，佢係一個乖乖員工同埋抵得諗既好同事。

「你好啊！我係Bear，你又係Bear，真係有緣！」講完佢立刻向我展示身上既熊公仔，「睇黎你真係好鍾意熊仔！」，「係啊，平時放左工我會去買材料整熊仔曲奇、熊仔餅、熊仔軟糖……」，聽到我有啲頭暈，阿頭即刻喝停，「喂，我地得一個鐘頭食飯，叫左野食先啦好無？」

終於定落黎，阿頭同其他同事繼續公事mode，Bear就問我返新工慣唔慣，佢唔好意思留得太多文件俾我幫手做。「哈哈，傻啦，講亂都唔夠我舊公司，呢度起碼有晒checklist俾我跟。」，無計，佢只係做過呢一份長工，根本無比較，「係？我已經覺得好痛苦，有時要加班到七點，咩work life balance都無啦！希望新工好啲啦！」

我當堂打左個突，加班到七點已經覺得攞你命？小朋友，你真係太幸福啦，唔知外面既打工仔有幾痛苦。

食左個豐富午餐，上手Bear好慳家，將食唔晒隨身預備左膠盒帶走，而且好關心我地每個人最近既動向。「我下星期就返新工啊！而家仲係holiday mode，要上training又要睇notes，好懶仲未開始睇啊！」，我阿頭聽到頓時媽媽上身，「你啊，返新工唔好再著得咁隨便啦，記得買返隻錶帶，唔好下下拎個手機出黎睇時間，好唔專業架！」上手Bear好似毫無準備咁，「好啦，知道啦，仲諗住著得斯文啲就得夠添！」

睇住佢既一舉一動，我開始了解金飯碗既工要咩人，唔需要你口才了得，唔需要你做專業擦鞋仔，只需要……你聽命令。

作者：HR熊

人事部工作既小妹，見盡唔少公司既「人」同「事」，係呢個平台上一齊分享職場上既苦與樂，笑與淚。Facebook: https://www.facebook.com/hrbear.dairy

閱讀後覺得好，請多多讚好及分享～：）