【短篇小說】我是兩個孩子的媽媽

（photo via cc Flickr user nicwn）

我是兩個孩子的媽媽。

為了解答他們的問題我的問題，我決定站出來。

小女阿靜，今年就讀小學三年級，今天，班上選班長。

「媽媽，今日班裡面揀班長呀！ 好開心呀！」 阿靜一回家就擁著我高興的說。

「點解咁開心呀？ 你做班長呀？」

「唔係呀。不過我投左陳麗鈴做班長！佢仲高票當選左啊嘻嘻！」

「又唔係你做，點解咁開心既？」

「陳麗鈴好好嫁！又有禮貌又樂於助人！最緊要係誠實！呢，上次個班長楊子英呀，成日都講大話嫁，上次又話幫我地同老師話想要個圖書角，點知買左幾本書就算，哼！」

「咁咪好囉，希望陳麗鈴係個好班長啦！」

「一定係！ 至少係我揀先啦！」

「叻唔切！ 快d去做功課啦！」 我摸摸阿靜的額頭，她興高采烈地回房間，安心的把功課做完。

大子阿誠此時從閘口進來，笑容滿臉，看起來有好消息。

「媽！ 我地個內閣贏左啦！」

「真係嫁？好叻呀阿仔！」但我心有著疑惑，「不過，聽陳太講，你間學校唔係話你一定係天主教徒先可以選嫁咩？你扮教徒呀？」

「哦，吹嫁姐，邊有咁保守呀我地學校！不過個時真係幾擔心，好驚要老師鐘意先選得，我地內閣真係好少同老師打好關係。」阿誠鬆鬆領帶，呼了一口氣，「不過，好彩我地做好多落地工作，爭取下福利呀，幫同學發下聲咁，話咁易就儲左d同學既支持，雖然老師d票都好緊要，但最重要都係班學生。哈，有d老師見我地咁為同學都支持我地添呀。對面個內閣真係好抵死，成日擦老師鞋，又亂咁下承諾，做埋d多餘野，話咩要開隊哥爾夫球隊，要做d1冠軍，我心諗，不如放多d資源落其他野到，d中六生猛咁呻話無位溫書，講左幾年都無人做野，今年我地終於可以為佢地做d事，」阿誠滿腔熱誠。

「得啦，學生會主席！快d換衫沖涼啦！」我拍拍阿誠的膊頭。他聽話的走回房間，看著他的背影，我覺得很驕傲。我相信他會是個好的學生會主席，因為他知道，他是由信任他的同學提名出來，他不能辜負他們。

鐘聲響起，我打開門閘，阿年的表情告訴我，事情並不如意。

「老婆，白皮書出左。」

「點呀點呀？有無聽你地講呀？」我緊張的問。

「無，一句都無，」阿年沮喪的說，他抓著頭，頭髮凌亂。

「點會咁嫁，唔係好多人投左票，上左街嫁啦咩？」見到阿年的樣子，我很擔心。

「係呀，我知呀，你都知，政府知，全香港人都知呀！但中央就係唔聽囉！咁有咩辦法？」阿年很激動，眼睛佈滿了血絲。

「唔緊要啦！再傾下啦！可能有彎轉呢，其實依家都唔係好差姐，」我嘗試安慰阿年。

「唔係好差，唔係好差，」阿年冷笑了一聲，「我唔知我地仲可以唔係好差幾耐，」阿年眼裡好像充滿了絕望，「老婆，對唔住，我食唔落，我想落街行下，」阿年拿起鎖匙，轉身就走。這時候，只剩下我一個人。

阿年是中大政政的助理教授，常常和學生討論普選這個話題，為了這個議題，他出很多力，支持很多政治運動，希望能夠改變整個政治氣氛。最近，佔中三子走數，白皮書出世，這令他很沮喪，他開始慢慢失去教政政的熱誠，越來越絕望。

身為一個家庭主婦，我一生人就是想老公和子女開心，甚麼政治，我一概不理，簡單來說我甚至討厭政治，因為我覺得很煩人。但我開始發現，不是不理會就可以，它自然會找到你頭上。於是我開始留意新聞，希望能追上阿年的步伐。

「媽咪，爸爸係咪嬲呀？點解既？」阿靜從門口害怕的走出來。

「因為爸爸…」問題太複雜，我不知怎樣開口。

「因為爸爸唔可以揀自己個特首，」阿誠也剛洗完澡。

「下？點解既？我可以揀班長，哥哥又可以揀學生會主席，點解爸爸唔可以揀特首既？」

這個問題我沒有答他們，因為我也不知道答案。

我是兩個孩子的媽媽。

為了解答他們的問題，我決定站出來。

作者：Airolgeeykoloh

成功不是由你爭取那一刻開始，是由你決定發聲，到踏出第一步開始。

閱讀後覺得好，請多多讚好及分享～：）