不平則鳴 讓座NO WAY

拐杖

 

作為一名長期痛症患者,對讓座呢個話題,特別敏感而又有深刻體會。好多時,係車上,尤其港鐵上,都不禁強逼自己想像:車廂中所有人同我一樣,都有看不到的病痛,有說不出的疲勞。我憑著呢種想像,努力捱過一個個站,努力捱過一個又一個上班日。

即使撐著拐杖,據自己不正式統計,10次乘搭只有1次是有人主動讓座,而讓座年齡大多是外觀40多歲的女人,只係非正式統計,當然都會有例外,但都係女性。諗深一層,又真係未試過有男人主動讓座俾我,可能個樣唔係女神,身材唔係周秀娜,所以男人多數都會視而不見,最深刻一次係,三個西裝人不約而同咁上下掃視我,眼光落在我手上的拐杖,一秒兩秒,然後好似集體催眠咁訓著左,睇黎自己不知不覺中練成了神級催眠能力呢!但我寧願要個位坐下,因為對腳軟弱無力有時其實慘過腳傷。男人唔鐘意讓座,男人主義?可解釋為佢地勞心勞力,累到起個身都舉步艱難,可能佢地累到起唔到身而已搭左好多轉地鐵來回,所以,對於可以見到我後即時入眠既人,我都可以體諒,唯一建議係:練好?戲先,唔好同我對望,亦唔好同我枝拐杖對望,否則令你訓過左站我會唔好意思。

 

但男人唔讓座,只限於唔讓,女人讓座,卻讓得極端。所謂極端,就係一係好好人扶埋你座,一係唔讓而仲要俾說話你聽。

故事一:搭巴士有位,咁岩有位,於是上坐。兩個站後,有位女士帶兩個小朋友上車,或者我枝拐杖係黑色,唔顯眼?佢企我隔黎大叫:「冇位坐既,都冇位坐既,唉!湊住兩個細路都冇位坐,企囉!」而個兩位小朋友就有如回音咁係咁LOOP:「點解冇位坐既?唔係要讓座俾有需要既人咩?我好有需要,點解我冇得坐?」唔知我本身體質是否易遇到奇人異事,有小朋友咁講已唔係第一次,由於位女士不時望下我,望到我忍唔住衰多口講左句:「我都有需要,讓唔到。」但竟得來一句:「我都腳跛啦!又唔見我有得坐?」果然,我體質較易吸引奇人。

故事二:我同呀嬸爭位坐,由於太龜速而理所當然咁輸左,最衰枝拐杖阻住晒,否則0.99秒內實爭到位,而呀嬸獎品係坐係度望住我,一秒、兩秒,又訓左。

故事三:其實,冇位但可以倚牆歇息都係好事,但讓座冇話讓企,所以你只好在中間努力捉緊條救命柱,然後俾人咁推你〔試過跌倒幾次〕,再加多句:「唔好企係度阻住啦!」

 

當然,有人會問,點解你唔請人起身俾位你坐呢?有段時期我會請人讓座予我,但唔係個個人會誠心讓俾你。太多次,被我奪去座位既人會全程死死咁盯著你,好似要搵到破綻再次奪回寶座,又或他們其實在盤算著,也許下站佢會落車呢,再下站呢,再再再下站呢……久而久之,我竟對唔讓座既人起左同理心,香港人真係太累,有時,唔係唔想讓,而係有心無力,呢點我明白,因為我都試過唔用拐杖又需要座位時,冇讓座俾老人、孕婦,而那時係最矛盾迷茫,因為人地眼中只睇到你係個表面健康但唔讓座既人,並唔知你係長期病患,當時,心中係會非常愧疚,但我真係讓唔到,只能心中講句,對唔住。所以,我唔想,萬一問到個真係有需要既人,而佢係因為我望落更有需要而讓左個位俾我,都唔係好事,因為讓座係要主動,而唔係強逼。

 

香港自從多左博愛座後,據自身非正式統計,讓座率反而低了很多。原本係教導人公德既博愛座,反而成就了:「我唔係座緊博愛座,唔需要讓」既扭曲思維,而呢?思維,都係係班小朋友度聽番黎,所以我想知,究竟係家長得唔好,定係社會俾左個錯讓訊息人。非同理心,非愛心,博愛座竟成為了讓座基本。因此,我十分討厭博愛座。某程度上,博愛座原意係,見到有需要既人,就優先讓出博愛座。但博愛座來到社會中,竟被人類扭曲左需要既定義,令社會只會以外表觀人,只會猜度對方係咪真正有需要,久而久之,只會練出一班更自以為是既人,「只要我覺得自己有需要就OK」;另一方面,反而有內疚心的,就算身體不適,亦會因自己睇上去同常人無異而拒絕坐下(女性尤其明白,那幾天的累人),博愛座的名銜,對較好心的人來說只有罪孽意味。博愛座,若你非身體殘障到一定程度,千其唔好坐,就算我有拐杖都冇機會坐,何況你地?這是一個分類椅,椅子本身沒有分類了你,但可以影響人心把你歸類。其實,係紅紅既哈哈笑貼紙之下,只不過係普通座位既博愛座,大概只是個提點,可能佢意思係每個座位都係博愛座,但又有人留意到嗎?

點解博愛座愈是推行,社會卻愈不博愛?就正如點解中國講文明,但文明不了。關鍵在於博愛是全民教育,但一兩個博愛座就係本質上既殘缺,因為社會唔係只需要一兩個人的少數博愛。可惜,設計博愛座既人沒有膽量將所有座位設為博愛座,亦沒有試圖取消所有博愛座。係教育人民不可有自私之心既同時,一兩個殘存既博愛座其實係增加了群眾自私心態。任何事都不宜下太多定義與條件,與其要人們懂得身處地,不如從小搞個體驗活動,讓青年打上?帶石膏,「成為」一日行動不便既人,走出學校,體驗一下不能理解之苦。否則,禮讓之邦,禮讓的對象只會變成自限於自身,或與自身有關係利害之人上。

 

其實,講到尾,如果見到有人一入地鐵就望下望下,嘗試搵位坐時,而你又唔係累到兩秒即訓著,唔係有說不出的內傷,就讓吧。至少認住圖中既拐杖,見到枝咁既野就讓吧。私心講句,我真係有需要架。

 

作者:宇原

興趣是寫作、哲學、音樂、心理學,歡創作,希望可以以拙文帶動自己和他人作不同層面的思考,僅此而已。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 86111
Date: 2014-09-24 23:41:26
Generated at: 2022-12-05 11:44:15
Permalink: https://www.vjmedia.com.hk/articles/2014/09/24/86111/不平則鳴 讓座no-way