如果我是思歪……

（前言：常言道：知己知彼，百戰百勝。一個活動的成功與否，與你是否了解當權者的想法有很大的關係。當然，以下只是FF而以，我只是嘗試評估一下由922罷課開始直到現在，如果我和思歪一樣無恥，我會如何看這次的示威活動？只有代入當權者的思維和應對方式，才能避免自己犯下讓當權者得逞的錯誤，才能針對性地反擊。不然，所做的都只是在消耗民意，事倍功半而已。）

藍皓 攝

當我聽見示威者說他們要罷課一星期，我唯一需要做的事情就只是等。等什麼？等這一星期過去，既然不是無限期罷課，一星期咪當豪比你地。我就賭你們會在第七天晚上，在有名的「社運人士」帶領下給自己拍拍手後散場。反正也不是第一次，之前你們反對洗腦國民教育還不是這樣？30萬的人還不是說散就散了？

東北發展也是，吳同志夾硬通過東北前期撥款，你們還不是在外面叫嚷一下就走了？每次都說要行動升級，Come on，對我而言是口號而以。你地夠人嗎？就算夠，有人敢衝嗎？就算有人熱血去衝，「著名社運人士」比你地衝嗎？連戴口罩都驚比人話暴力的人士點會幫手呀？話唔定佢地自己就會先制服打算衝的人交給警察，以表示自己真的非常和平，覺得警察會因此當佢地係朋友倒戈添。天真到咁，真係分分鐘連防暴隊都唔駛出動。

我知，果班人要比人覺得自己和平嘛，真可愛。連被捕都不怕，怕區區一個口罩！「潔癖」到一個地步連戴口罩都唔比參加集會。個個死攬住個「和平」的光環，驚死人家話佢地同「不理性」扯埋一齊講，我真係睇唔透呀。明明有示威就唔算和諧架啦。不過咁都好，方便嘛，影低晒你地之後慢慢拉。一對Database，所有資料出晒黎。用咩罪名？咩都好啦，襲警又好阻街又好一人集結又好，告得入就最好，告唔入都唔緊要架，手段黎架啫。旨在殺雞儆猴，嚇下班果班細路。反正只要警察上門，理得你D仔女係靜坐露迎定衝擊？D家長就會恐慌，覺得個仔女惹到警察肯肯定做左壞事。慢慢用呢個手段收窄集會自由，無人再敢出黎講野，到時球證旁證主辦協辦全部都係我的人，你點同我鬥呀？

你話行動升級係會佔中？「去飲」果三個人？哈哈哈哈唔係講笑呢三個人真係好適合搞笑呀。之前佢提佔中，真係嚇倒過我同阿爺架，祖國好歹都比人個印象叫開放緊，打緊貪…嘿，連祖國領導人話要見英女王，英國咪又睇錢分上叫英女王接見他？祖國咁強大，仲有中英聯合聲明睇住，雖然香港真係無咩人理，但香港有聯繫匯率呀嘛，祖國仲要經香港逐漸開放人民幣流通政策架。話就話上海就黎超越香港姐，但偏偏幾多鬼佬肯同祖國合作做生意都係經香港…嗯嗯，返黎先，講起祖國我就有點得意忘形…總之個重點就係，祖國點可以係國際都注視的情況下重演多次六四？哇諗到呢度我真係驚過一期黎架，驚唔知點收科呀。

點知個個都比佔中果三個人fake左，佔中係為左唔佔中？真係好有邏輯好有趣呀。仲有d行為真係令人抓爆頭。你地求祖國恩賜民主比你，所做的竟然係剃光個頭？話佔中成年幾都未去佔，等到我都悶了，終於出左詳情，竟然係國慶去佔！國慶佔中輪得到你地咩光頭佬？剩係祖國自由行都佔緊啦，真係笑死我！講到係威係勢，原來同我地話祖國強大係一樣的，你覺得我會驚你地露營？連口號都唔叫，就咁坐係度打坐睡覺，你真係諗住集氣打倒我呀？睇得太多1 Like – 1 Support上腦了少年。咪玩啦。早知佢地係發展到咁樣樣，就連比薑溶果筆維穩費都慳返啦。

你問為何上次反國教的對策是會開記者會講房（屋）事（務），今次主動去回應？是不是我驚學生罷課？情況不同嘛，國教是家長覺得政府搞佢地的仔女所以反彈。今次？不用政府出手，那些怪獸－呃，「重視子女成績」的家長們就已經會撲出黎反對啦，還有報章、甚麼勞子協會，都會逼不及待跳出來叫人「不要搧動學生」。真可笑，如果學生可以叫得郁的，D家長仲需要叫個仔女做功課溫書唔好玩電腦叫得咁辛苦？還需要訓導主任？還需要找薑溶「購物」？細路會乖乖地聽大人指揮，我個女會上網公開鬧我老婆？全部都係天真嬌，傻豬黎的。

不過咁，都多得班家長對D仔女咁無信心，成件事先咁順利咋。我同你就梗係知道班學生個個都有自己思想自己的諗法，個個都係為香港而出黎罷課啦。唔係我當年要硬推洗腦教育？就係要叫班細路個個都崇拜我地「進步、無私、團結」的執政集團嘛。就係個個細路都咁有批判思考，成件事先會失敗－不過都唔算失敗，係要多少少時間斬件滲入去啫－呢D就唔好講住啦。

總之，既然學生落唔到手，咁咪向d家長埋手囉。多簡單，班太太真係迷信覺得係屋企溫書一定唔夠係學校坐係班房就好，好似班房係打機果D特殊練功場所咁，似乎忘記了細路就算坐在課室都未必真係聽書，But Who Cares? 「反正坐係班房，就算訓教都兩倍經驗，係公民廣場聽課？肯肯定學唔到嘢架啦！都唔係係學校打怪，係出面打怪邊有經驗升級架！」這群家長的思維，太容易被摸清了。

這時只要多加兩句「這是美帝陰謀」，自然會有人把「反美」、「討厭美國佬」的情緒去反對學生罷課。而政府只需要擺出一副「彬彬有禮」、「我很明白你們的感受」的樣子，自然會吸引到「反暴力、愛和平」的太太們支持同覺得，「政府都回應左啦，班學生就係都要搞事。」

你問點解仲會有人信？好簡單之嘛，D人最叻係咩？以貌取人囉。香港人最擅長係咩？善忘囉。只要個發言人着得體面d，西裝骨骨咁，加上CCTVB 一直重覆播班學生衝向我的影片，然後見到我好似唔介意，好包容佢地咁，佢地就會覺得我係好人黎架啦。我咪又係靠咁呃左個特首黎做？人類，係真係唔比阿寶休息架！哈哈哈哈

作者：小妤

生平無大志，只想吃喝玩樂的港女，卻身不由己地關心着政治

閱讀後覺得好，請多多讚好及分享～：）