【佔領中環】第一次示威，有咩要注意？（入門篇）

（配圖只反映總編打機品味，並不構成任何邀約）

 

（注意：此文為社運入門文。對社運有深入經驗和戰蹟的，可略過。）

 

呢一刻，好多人接力去緊政總，當中有啲朋友之前都從來無參加過任何集會。就算有，都可能係國教或者港視嗰時，乖乖坐喺度聽大會分享咁。今次比起之前明顯激進，有啲朋友可能去之前有啲憂慮，亦唔知會唔會受傷。有朋友都在Facebook、Whatsapp收到各樣訊息，可能多到有點混亂。以下係小妹嘅小小整理，簡單直接講吓到底去之前要點準備，去咗之後又應該點做。希望對於新手會有用。

 

A. 裝備篇：

1） 我第一次去政總集會，應該點著？

Don’t：短褲、拖鞋、短裙、長裙、側揹袋
Do：長褲，深色衫（唔貴，預咗報銷）、背囊、風褸或便利雨衣、波鞋、摺遮。如怕比鏡頭影到，可戴太陽眼鏡。

 

2） 我驚比胡椒噴霧射中，應該點做？

最簡單，拎游水嘅泳鏡，護眼。口罩，護口鼻。
有時間就去五金舖買護目鏡同面罩。

 

 

3） 我驚比催淚彈射中，應該帶咩？

手套。毛巾。（點防？陣間再講）

 

4） 仲有咩物資要帶 ？

水／運動飲品、乾糧、生理鹽水。尿袋，同埋真嘅尿袋。前者，即係外置充電器。後者，係小便神器，Um，簡單啲講，空水樽。如有興趣DIY，可上Youtube睇教學。如無時間DIY，水樽就行。

 

5）我無諗住衝wor，洗唔洗著到咁呀？

Prepare for the worst。就係咁。你入得去，就唔會知下一秒發生咩事。有時比人推推下，有可能去咗較前線，成為警方嘅目標。

 

 

B. 行動篇：

1）自己一個去，好驚wor⋯⋯

一定要搵同伴！最好搵啲有經驗嘅一齊，3-5個人一齊行動係最理想。老手當然自己一個都夠應付。

 

2）去到金鐘，周圍都係人，應該去邊？

Don’t：
唔好去啲同一個出入口嘅地方，唔好走入滿佈鐵馬嘅地形入面，否則警方一封咗個出入口，就可以一次過清你場。

（例如926有人突破防線衝入公民廣場，之後警察已經封哂公民廣場嘅出入口，咁呢個時候你特登跨欄走入去，就等於走入籠中嘅鳥。）

Do：
General咁講，去啲需要人嘅地方。去啲你可以行動嘅地方。

 

3）我見到大會有個台，有啲講者分享緊，我係咪應該坐喺度聽？

No！It’s not a must.

當然，如果你覺得，段講話真係好好好好好好好有意義，唔聽唔得，唔聽會終身遺憾，你就去聽吧。不過我覺得，Talk，幾時都有得聽。既然你都去得示威，你唔會滿足於聽talk。

 

4）有人帶領叫口號，我應該跟住叫嗎？有人話「比啲掌聲自己」，我應該拍手嗎？有人帶領唱「試還誰還未發聲」，我應該跟住唱嗎？

問下自己，你嚟到政總，係想達到咩目的。而你唱歌、嗌口號等，又能否達到你嘅目的？
如果你嚟，覺得一齊叫下唱歌好感動、好想喊，而你就正正係為咗感受呢個氣氛而嚟，無論運動最後失敗都無所謂，咁你就用盡你嘅力氣去唱歌、叫口號、比啲掌聲自己。
如果你嚟，係為咗自我感覺良好，咁你打完卡，自拍完，就可以走，唔好喺度阻住其他人。
如果你嚟，係想為香港民主盡一切努力，願意用身體去對抗呢個政權⋯⋯咁就唔好浪費氣力去咗啲無意義嘅事。

講到尾，It’s up to you。我唔係話個個都要流血，做民主鬥士，只要做你認為值得做嘅嘢就得。

 

5）我應該企，定係坐？

不要輕易坐下！！！因為會減低行動力。你諗下，你由坐低，企返起身，要用幾多秒？有起事上嚟，係咪真係走得切？
如果真係好攰，到場外搵個位坐，唔好令自己成為籠中鳥。

 

6）我好暈，好唔舒服，但係唔想走⋯⋯

Sorry，請立即返屋企或附近地方休息，不易久留。因為你會造成阻礙。如果係打持久戰，係需要大家幫手接力，等攰嘅人返屋企休息。所以攰，唔係罪，死撐仲衰。
Exceptional case係，你扮暈，然後令警方開路比救護人士，形成突破點。

 

7）我唔想比人拉，係咪唔應該去？

絕對唔係！去集會唔一定會比人拉，放心。

 

8）我被捕了，怎麽辦？

筆者不鼓勵示威者輕易被警方抬走，因為留有案底後，會不利於日後行動。你可能會成為警察嘅追蹤目標。但如果你真係有被捕嘅覺悟，希望有法律支援，你可以參考：

 

 

另外，時刻check FB各大媒體及民間嫌體嘅update，留意最新發展。不過有啲小道消息，亦唔好信到十足。

 

C. 衝突篇

1）比胡椒噴中，應該點做？

不要即用水淋。先用紙巾抹，把頭傾斜90度，然後用生理鹽水淋。注意唔好比頭髮沾到更多胡椒。洗乾後，再查平時用開的cream護膚。

 

2）比催淚煙射中，應該點做？

（以下為Forward message，未知真偽，歡迎提供更好對應方法）

唔好用紙巾。

逆風跑，因為催淚彈跟風向，跑去空氣流通的地方，就咁用水沖，過一陣先擦。

（呢段巴西示威者凌空抽射回敬警察係高難度動作）

 

3）牛奶有用嗎？

胡椒噴霧刺激成份屬油溶性（即是溶於油，不溶於水），而牛奶含脂肪，可沖走刺激成份，而且牛奶不傷人體，亦相對其他有機溶劑可安全／合法攜帶（你帶罐天拿水去應該好快被捕）

 

4) 我見到警方好粗暴對學生，我係咪應該大叫「警察可恥」？

叫一兩次就夠。叫得多，佢都係照做，唔會因為你講到幾句而放軟手腳。

 

5）警察都係人，我地係咪唔應該衝擊佢哋條防線？佢哋同我哋一齊留咗咁耐都辛苦㗎⋯

如果你真係有呢個想法，我建議你返屋企，冷靜下，思考下你為咗咩而出嚟。

（我贊成這次運動嗎？坦白說，策略上很多時候可以做得更好，衝入公民廣場欠後著也是令人揼心口。但我認為這會是我們日後抗爭的重要啟示，至少我們終於懂得拿眼罩口罩保護自己。是的，也許來得遲了些，但仍值得鼓勵兼親身支持。）

 

寫得很急，只因希望能幫到更多新手。如有遺漏，歡迎留comment補充，謝謝。