【中佬手記】從聖西路到夏慤道

藍皓 攝

中佬離開香港兩個禮拜，到歐豬國家意大利感受一下西方國家喺民主同資本主義制度下陷入經濟不景，失業率高企嘅慘況，諗住去完返嚟鼓舞一下香港人：「民咩主丫，經濟好，生活好，中國好，香港好……」

多謝科技發達，喺長靴國一樣知道我城打八號風球，一樣知道學生罷課。唯一唔知道嘅，可能係催淚彈嘅氣味。識字嘅朋友可以試下用文字描述下。

但講好咗去旅行要入鄉隨俗，唔得成日做低頭族。所以，我日頭多數都係睇下意大利妹啲心口……唔係，係面口。當然，意大利仔我都一樣照睇。

奇就奇在，又話歐債危機，又話經濟零增長，但我由南到北咁遊歷，最北去到接近奧地利嘅山區，見盡拉丁同日耳曼族裔嘅意大利人，食盡茄汁肉醬同蒜蓉欖油炒嘅意粉，都見唔到初四咁嘅面口，食唔到半點苦澀或者葡萄味。最葡萄嘅，當然係香港一樣咁廉價，但味道好十倍嘅紅白餐酒。

直到我去到聖西路球場，睇國際米蘭對卡利亞里嘅意甲賽事。中佬喎，去意大利梗係要睇返場波先對得住自己。坐喺主隊球迷中間，我睇住國米追平一比一嘅時候舉世歡騰，跟住打少個然後含含聲連輸三粒。嗰陣球場真係鴉雀無聲，除咗作客球迷喺山頂自 high ，以及坐我後面個小朋友喊緊，要爹哋安慰。

苦澀，慢慢向著心裡滲。場波踢緊嗰陣，我知道香港防暴警察出動，對付手無寸鐵嘅示威者，用伸縮警棍、胡椒噴霧甚至，催淚彈。有人話睇見咁嘅場面好催淚，我只係個心好實，就好似上個禮拜曼聯領先三比一都可以反輸三比五咁。哇，咩世界。

場波完咗，球迷半噓半擰頭離開。 But life goes on ，意大利人繼續生活喺清新嘅空氣氣、美味嘅食物同親切嘅社區入面。我問自己，點解意大利人得，香港人唔得？或者自私啲問句，點解我喺香港出世，又唔似啲高官或者老屎忽咁有居英權？

係囉，係命嚟嘅。但唔好彩嘅又唔止我一個。至少，喺呢一刻，香港仍然有數以萬計嘅人唔認命，由罷課到佔中到遍地開花嘅反包圍，迫出香港局部地區停課，連 CNN 國際新聞都以頭條長篇幅 15 分鐘報道香港嘅示威、片段原汁原味話畀大家知示威者真係舉晒雙手冇反抗，但防暴警察仍然動武。

The world is watching. 中佬同好多人一樣，身在海外，但心靈與你哋同在。好快返嚟，撐住，直到勝利為止！

作者：中佬

中佬，三十而立，最怕香港濕立立

閱讀後覺得好，請多多讚好及分享～：）