來自WECHAT的問候

藍皓 攝

係警察用催淚彈之前，我對佔中實在唔太支持，所做既主要係食下花生，係FACEBOOK SHARE野，同埋將香港既新聞CUT圖放係WECHAT。放野落WECHAT既理由好簡單——想令大陸人唔係透過大陸傳媒咁知道呢件事。下晝警察用催淚彈之後，激起左我既不滿，走去中環一邊支持一邊影相放上網，結果，引起左唔係好多但係都唔少WECHAT既大陸朋友回應。

有人唔知發生咩事，問我「神馬情況？」「什麼事？」「什麼名堂遊行？」。佢地會咁問非常正常，因為大陸極少有關香港社運既報導。佔中有提過，但係好少，而且一提親都係「港府发声明回应”占中”:坚决反对 将依法适当处理」「调查指近六成香港受访市民反对中学生罢课及占中」之類既內容。佢唔會話你知前因後果，只係會話佔中唔應該同犯法，而且放係一個你唔主動搵根本搵唔到既位置。我簡單咁答左問我既人，雖然佢地未必理解，但係都會同我講句小心安全。

有人係香港讀緊書，係WECHAT見到我SHARE既野之後覺得好「糾結」。佢好中意香港，想為香港出一分力，但係又好怕出事。我同佢講「你有這個心意就夠了。你可以多點問候你周邊參加的朋友同學。但是別去，真的。」我咁講係因為佢係個大陸人，如果發生左咩事，番到上去可能會有好大既後果。佢有咁既諗法實在令人好開心，畢竟有更多在香港讀書的人選擇純做一個「過客」，對香港既事不聞不問，完全唔打算關心。

有個人知道但係反對佔中，留言同我講話干嘛要搞那麼多事。我既回應得一句：「你可以當成是看戲，但是請不要多踩一腳。」之後佢冇再回應了。我明白大陸人既思維同香港人唔同，但係一直我容忍唔到唔了解香港既情況又指手劃腳既人，所幸佢睇到我哥句，自知理虧就冇再講落去了。希望終有一日，佢會真心了解香港和香港人。

我一直唔強求大陸的朋友同學認同我既想法，畢竟大家既背景和所受的教育都唔一樣（大陸既基礎教育實在充滿Mind control 既成份）。但係我一直好想俾佢地知道香港發生既事既真相，希望佢地知道之後，會作出思考，甚至同我有同感，而不是微博上經常出現的「香港人有什麼了不起的，老搞得那麼亂」。

作者：興

不土生但土長於香港的90後，在北京讀書四年，踏遍中國各省，對中國和香港當前情況各有體會。熱愛旅行，向環遊世界的目標出發中，長期徵旅伴～

閱讀後覺得好，請多多讚好及分享～：）