老母：「呢班友收咗錢攪亂香港咋麻！」

藍皓 攝

其實呢幾日係現場，聽得最多嘅話題，就係一班學生係到講父母對佔領嘅立場同自己有好大分歧，甚至極端地反對。

可能我家中兩老所持態度同時部分家長一樣，所以身同感受。雖則我都冇辦法去說服兩老嘅態度，但我依然希望呢番說話可以由各位傳到你哋身邊嘅反對聲音到，同時想話俾反對者聽一個不爭嘅事實。

第一：「呢班友收咗錢攪亂香港咋麻！你哋做乜都冇用架，爭到啲乜啫，佢都唔會俾你！」

大家最常聽見嘅，應該係呢兩句說話。但我會想問幾樣嘢：

1,呢班所謂收咗錢嘅人，要收幾多錢先肯硬食胡椒噴霧，硬食催淚彈？而你哋眼中出嚟攪事嘅市民，要幾愚蠢先可以錢都唔洗收，被呢班所謂「收咗錢」嘅學生動員出嚟一齊硬食呢啲對付恐怖份子先出現嘅武器？

2,真正攪亂香港嘅，係港共政府定係香港人呢？如果一大班人為咗表達訴求而上街叫暴亂，咁每日一車車，拖喼佔領行人路嘅生物係啲咩？最重要一點，假設港共政府嘅施政係符合大部分人嘅民意，請問呢班所謂「收咗錢」嘅人點樣「呃」到咁多人上街？

3,呢次就真係古乳有暈：「明知不可為而為之」吖麻，何況，縱觀古今中外，邊個當權者係願意被反抗，被推翻？係幾千百年前嘅歷史我都唔講，就以剛過一個世紀左右嘅辛亥革命。難道當時滿清政府又願意被推翻政權？但結果唔係就係成功咗咩？再者，辛亥革命都並非一次成功，但若果冇先前嘅失敗，又點會有成功嘅一刻？正如你食飯，食到第三十啖飽，你可唔可以話之前嗰29啖冇用？

如果冇共產黨就冇新中國，咁冇辛亥革命就跟本唔會有共產黨添！

第二：我相信絕對有人係出於自身嘅思考而反對佔領，我都好尊重，但都好希望唔好向佔領緊嘅人潑冷水，因為佢哋爭取緊嘅，都係你哋應有嘅權利！

今日我哋做嘅嘢，係犯咗法，因為法由唔完美嘅人去制定，所以唔會有完美嘅法律，但我哋冇犯到罪，冇犯到社會道德倫理嘅罪！

各位反對子女出嚟佔領嘅家長，我都好明白你哋以子女嘅安危作首要考慮，我自己都有重視嘅人，我知佢都有出嚟我都好擔心，我都希望佢離開現場，但如果全部人都抱住呢個心態，咁港共政府就會變本加厲，所以對住堅守呢場佔領嘅親人子女，請佢哋係危險時離開前線而唔係反對佢哋出嚟支援，已經係對子女最大嘅支持同信任！

作者：如影隨風

文字好比一部時光機，而我就係一個想藉住時光機完夢嘅人

閱讀後覺得好，請多多讚好及分享～：）