吉卜賽、Benz、旺角

中佬仲喺外地，仲有閒情逸致講下第啲嘢紓緩下大家嘅情緒。首先問大家一個問題：如果坐飛機嗰陣有人話你坐咗佢個位，你會點？即刻攞機票出嚟對證？啱一半啦，因為，如果你要打開個袋先拎到張機票嘅話，你，就大檸樂喇。

我今日就係咁，爭啲畀幾個吉卜賽女人撻嘢。呢單嘢，簡直可以用「有組織罪案」嚟形容，過程嘅一傳一送、靈活走位好似阿仙奴咁絲絲入扣，就算冇波入，後防都驚餐飽、一額汗。

話說中佬夫婦今日坐有劃位嘅火車，距離開車五分鐘左右，突然有個女人行過派紙仔，都係話自己好窮又成竇細路要養，好心施捨幾蚊嚟（梗係歐羅啦，畀港紙佢打返你轉頭）。

呢個女人掂行掂過，我哋全車都冇人理佢。冇耐之後，有三姊妹出現，手指指話坐我隔離個位。我想起身讓座嘅時候，佢哋好似想話我同中佬老婆坐緊、喺我對面呢兩個位都係佢哋嘅。冇嘅，打開袋，攞張車飛出嚟以證清白囉。

一起身，先前擺低紙仔個女人就再次行過收返張紙仔，而呢三個女人居然唔係想坐低，而係品字形圍住我，仲眼金金望住我個袋入面有啲乜嘢。中佬老婆發覺勢色唔對，拿拿臨叫我行去佢嗰邊閃開。佢跟手背脊俟後，居然發現有隻手想拉開佢個手袋，原來係嗰三姊妹其中一個人喺啲薄紗底下使橫手！好在個袋本身有扣實，佢都攞唔到嘢出嚟。

結果，喺我哋兩個由冇咩警覺到高度戒備之下，嗰三姊妹好快就轉身走人。我鬧佢哋係賊都冇用，車上其他乘客都冇咩反應，大概係見慣不怪。

事後點算好在冇損失，但諗返都幾驚險下。根本擺低紙仔個女人就係探路睇下邊度有得搵食然後通風報信，跟手嗰三個女人就埋嚟做戲分散注意力乘機入手。呢啲組織同默契，真係靠由細到大刻苦平日操練、日夜培養默契先可以合作無間……咦我做乜讚佢哋？

故仔就講到呢度咧。

適逢今晚旺角咁橋冇咩差人叔叔又咁啱有好多流言叫人速離旺角，然後仲有架 Ben 屎成個保齡球咁衝埋示威人群入面。好在示威者唔係樽，有腳曉走啫。呢個世界，好少可咁多巧合一齊發生嘅，點樣見招拆招，就靠大家提高警覺，用下 common sense 思考消息真偽，大家互相包抄提點，唔好單獨行事，係咁架啦，邊有得讀書學返嚟架。

仲有呀，遍地開花嘅抗爭運動，當然要由港島抗散到九龍以至新界。旺角呢個據點，點可以話散就散？得返中環到銅鑼灣，警方由集中火力喺上環同天后兩邊夾攻，咪一舖清袋？唔該嗰啲平日唔去旺角，家下又好似我咁唔喺香港嘅 so-called 知識份子唔好危言聳聽，講少句當幫忙（更加唔好寫千字文同我講吉卜賽人被迫害嘅史故，賊就係賊）。

除非，講嚟唔係為幫忙。好似係，除非唔係。

作者：中佬

中佬，三十而立，最怕香港濕立立

閱讀後覺得好，請多多讚好及分享～：）