唔好對正執勤既警察有任何幻想

藍皓 攝

呢幾日見到有啲朋友轉發相片，黃絲帶藍絲帶並排。我想有兩個意思：1) 我支持學生，亦支持警察執法；2) 我同情學生，明白佢哋訴求，但我都好同情警察，佢哋都係打份工。大家都係香港人，無謂相煎何太急。

如果你係第一個意思，我想講你真係一個不折不扣嘅騎牆派。如果你係第二個意思，我只可以話，『too simple, sometimes naive』。可能你都有朋友係警察，或者係警隊入面係文職。你平時同佢哋有講有笑，飲食吹水好開心，甚至可能係你嘅中學同學，大學同學，一齊癲過喪過。但事實係，當佢哋穿上制服，帶槍出巡時，佢哋已經係另一個身份：警察。佢哋已經唔係你嘅朋友，而係一個有責任執行上級命令嘅紀律部隊人員。你平時可能問你警隊朋友借手機或者電腦玩，但你試下佢出巡時，問佢借警車嚟揸，或者借支槍嚟玩下，佢會唔會當你黐線？點解？身份唔同咗！就好似Bruce Wayne咁，一著咗蝙蝠俠嘅衫，就唔係公司嘅CEO。你面對嘅，係國家機器嘅一份子，唔可能同你稱兄道弟。

國家機器兩大法寶，其一曰紀律，其二為同甘共苦，歃血為盟。紀律，大家都明，貫徹執行上級命令。作為下屬，你唔可以有個人意志，或者思想去懷疑上級指令。為達到此一目標，第二法寶就上場。平時無論係出巡，或者執行任務，警察都係自少兩人一隊。一來方便照應，(記得梁成恩嗎？)，二來就係培養部屬之間嘅感情。當遇上困難時，甚至死過翻生，拍檔就變成生死之交。你都聽到警察成日話『出邊啲兄弟點點點』，因為佢哋真係blood brothers。所以，當命令一落時，大家都無懷疑嘅餘地，『you jump, I jump』，國家機器先可以順暢咁運作。否則，陣前嘩變將會無日無之。

好，講返轉頭。當天，上頭一落命令發射催淚彈，用滅人筒兜頭兜面噴人時候，佢哋已經係同人民對立。因為，佢哋用得上『對付』呢個詞時，已經係對立面。你幾時有『對付』你啲朋友？你唔好同我玩狡辯，話係『應付』。應付係應付情況，可以有多種做法。當日，卻用咗最下一著，就係對付。 如果，佢哋要人民當佢哋係人民時，係可以，條件就係『化敵為友』。可惜，佢哋嘅暴力，唔可能將人們變成佢哋，只可以佢哋變返人民，即係解除自己武裝，放低催淚彈同滅人筒。當警察執行任務時，唔可以有自我，而且佢哋所作嘅決定，就係佢哋個人本身抉擇去跟定係唔跟命令，佢哋就係同抉擇合而為一。可否無咁極端？咁你就要問禿鷹，因為佢係呢件國家機器嘅總管。事情已經到咗大是大非嘅時候，係容不得騎牆派。

最後，如果你經歷過廿五年前嘅事，而仍然相信『警察/軍人都係人民』而同情佢哋，我只可以話，你仍然未長大。

作者：小山榮玉

美燦IT一名，喜好歷史音樂政治聖經，發夢做欽天監。

閱讀後覺得好，請多多讚好及分享～：）