防膠之心不可無

 

呢幾日左膠及「大會」糾察活躍後,惹起的連串爭議,我以一個冇政黨取向,冇政治取向的人來講我呢幾日的觀察,並畀大家分析邊一方的理據可信。

其實,「左膠」係來自高登等「煩膠」等文化,膠即係低能冇腦(無限個可能性),「左」則泛指所有有左翼lefties政治取向或思維的人。著名左膠之所以係左膠,唔係因為佢地加入左某個政黨,而係佢地一直行言業績實在符合「左膠」的定義,所以先係左膠。

大家呢幾日一直叫人「提防左膠」,其實並無指明一定係著名左膠先係左膠,範做反智不設實際行為,如拆馬開路的,如嘗試再將政治行動變為文化、教育運動的,一概被認定為左膠,因為根本成件事有反常識,膠到不能。

而偏偏葉寶琳就呢幾日都有搶咪,又在幾日前銅鑼灣電車路中帶頭幫手開電車路(葉話其他拆馬,移巴士係老作,我就當係老作)。如果你話一直以來都係有人屈佢,仲要係四方八面來屈佢,雖然疑點歸於被告,但如果人地真係咁鍾意屈佢,咁唔該葉小姐真係要經常post 住自己響邊來解釋,不然我都係偏向相信其他人講的野,因為真係四方八面都咁講。同時我不見有人老屈林輝或陳景輝拆馬搶咪,次次葉寶琳?可能因為佢做左一次膠,大家有位入佢?有可能,但次次都係屈佢?自己諗。

 

另一方面,呢幾日最大問題係,左膠而家不斷嘗試去push forward 自己創造的「右膠」去反駁,即時話人係「熱狗」或「陳雲粉」,同時一有意見分歧就大叫「分裂!」,「有人搞破壞!」,「有人唔想行動成功」,全部都係極之有問題。首先,叫人「右膠」已經係小學雞可憐至極,右膠根本從無流行,僅係佢地自high,純為想人講一句你講一句咁的小學雞鬧交情緒;其次,佢地口口聲聲成日話人要團結,我唔明點解佢地開口埋口都會鬧人係搞分化,搞破壞,搞分裂。

如果意見不合,應做的未係撃破人的論點,逐點反駁囉。但係左膠卻不做,左膠先label 你係熱狗、陳雲粉,然後再用佢地根本唔make sense 的理據,例子之一,例如叫你向市民道歉,因為而家係要打民意戰!喂,你估而家選舉前哨戰咩!全世界都知政府想sit out 等個行動自己消磨失敗!唯獨佢地會唱反調,去到今時今日,都知有班村民係冇得救你講到三千年都仲會係覺得你地係暴徒的,而大部份傳媒都係幫中國的時候,佢教你同政府打民意戰?唔係膠?唔係膠的話,另一可能性,就係間諜,我諗唔到第三個可能性。

亦要注意的係,通常人家鬧左膠係因為佢地做左膠事,例如搶咪,例如開路,但係左膠每次的反撃都會係「有人搞分化!」,你會覺得,邊個合理D?當大家知道政府正正係想我地分化內鬥時,偏偏有人不斷提「有人搞分化」,再即時指向某個政治團體同政治人物,你唔覺得有不妥?同時,每每有紛爭佢地都將所有「左膠指控」轉化為係唯獨果班人的攻撃,真係?全個網絡包括高登同好多人都不斷講左膠,係人所皆知。佢地真係活在自己世界裏面,幼稚得乜都以為係佢地口中的「右膠」的攻撃?

好啦,再講一次,左膠其實係一個形容詞,冇指名道姓,亦不指獨立一個政黨。著名左膠不作膠事,就可以脫膠,正如毒男脫毒,一樣道理。又正如學民思潮曾被形容為左膠,但係最近的果斷決定已脫膠好耐。

 

其實咁大型的人民運動,基本上冇可能有機會「團結一致」,人人意向不同,取向不同,點解有人偏偏要強調「團結」呢種不可能的任務?人家有唔同想法去做自己事時,點解有人會變左先知話人係搞破壞?一開始佔金鐘佔旺角佔尖咀,大家都話搞破壞喎,最後呢?其實大家敵人好明確,就係港共(中共),當摧淚彈來到時,我地駛唔駛大叫團結?你自己諗。

雖然之前果張通緝海報係有點過火,但我認為係情有可原,因為全部有歴史根據,大家已經冇本錢再輸,「左膠」其實係給所有有份參與是次社會運動的人的一個最大警惕,回望歴史,認淸錯誤,今次,香港人,唔可以再只係畀D 掌聲自己,因為全世界已經畀緊掌聲你地;唔需要自己影大合照,因為全世界已在幫你影大合照。今次,唔再只係撤退的階段性勝利,而係有實際回報的勝利。

 

作者:陳Damon

陳Damon
陳Damon,或Chan大文,愛音樂聽音樂讀音樂寫音樂。中學時開始是網絡活躍份子,開始對音樂講東講西亦開始與音樂結下孽緣。最終由網絡寫到實體傳媒,文章散落在NUYOY、南方都市報、明報及信報等。構成陳大文的材料除了音樂還有城市、電視、藝術⋯⋯你有興趣嗎,那歡迎你到好人角落【長角】

閱讀後覺得好,請多多讚好及分享~:)

其他熱門文章

  • 感謝徐緣媽咪嘅勇敢,防止HPV 喺社區散播,大丈夫要有一套,好人一生平安。 by 白木乩
    徐緣媽咪自爆受HPV 困擾,呢個係茲事體大,呢個係非常咁勇敢嘅挺身而出,提醒大家注意公共衛生,防止病毒散播,下文將申述並讚揚佢嘅勇敢。…
  • 叄拾 by 藍兼併
    她結婚那年三十歲,在古代而言有點年長,在現代來說相當普遍。她的婚禮很華麗,在半島酒店筵開三十席,出席的朋友或親人都相當冠冕堂皇,至少在衣着打扮上,與場合絕配。她是個喜歡文字的人,長得漂亮,卻不算富有,也不在意婚禮的排場,只是夫家有點社會地位…
  • 【嚴肅文】我真係無諗過,夜總會個果盤係會擺香印! by 容樂其
    古語有云,去夜總會千期唔好貪果盤,意思係話,做事目標要明確,交際就交際(?),傾計就傾計(?!),你貪第二啲無關痛癢嘅嘢,係嘥自己時間。 …
  • 你人工搵到幾多?憑咩教我呀? by 中環塔倫天奴
    「呀麗!又係得你無得交呀?你究竟想點架?」MISS 鄭瞄了瞄桌上的家課表大喝。「MISS,我好忙架!」呀麗抿着嘴說。「…你覺得而家做緊既野可以做一世咩?你考好個試先啦。」MISS 鄭語重心長。呀麗望着計算機上的數字,她看到了自己的人生,憤然…
  • 【外賣仔日記】而家做速遞乜貨都要送,包括假 __ ! by 外賣仔
    「嚟送貨架,樓下保安叫我上嚟」…
  • #我鍾意經濟圈 by 健吾
    有很多人想捐錢給一些人,是想「改變一下」世界。就像他們看到那些明星去的「非洲探訪」之旅,看到小朋友很可憐,所以就月捐一點。然後,那些大型的志願機構組織利用他們的獨特身份,去搞一些小朋友的時候,那些捐錢人就會不了了之,甚至不去問,他們的錢究竟…
歡迎讚好我們的facebook page,免費資訊源源送上。

文章資訊

ID: 86961
Date: 2014-10-02 15:53:53
Generated at: 2020-01-21 08:49:52
Permalink: https://www.vjmedia.com.hk/articles/2014/10/02/86961/防膠之心不可無