不如麥城同溫泉關都留條人道通道啦～

是咁的！今晚係晚間新聞見到係特首辦前，為左俾救護車通過，一眾示威者根據戴耀廷教授建議，讓左條「人道通道」出黎，跟住就有部救護車出左黎。正當人人以為 救護車走左，可以歸位時，跟住就有兩部警車經過，而呢班人竟然攔住部警車，真係可怒也！警察都係人啫！點解唔嘗試感化D警察？至少都感化部警車……上面個 司機吖！跟住警察們就係果條人道通道上運人道物資入去特首辦喇！咩話？人地返工要用催淚彈同橡膠子彈嫁！返工工具唔係人道物資呀？人地都係好似當年葉繼歡 咁，打份工啫！吃飯就是人權，打工就是人道呀！人地戴教授上個禮拜六晚係屋企嘅時候，你班示威者係邊呀？（弊！我係咪講錯左？？？）

跟 住我一擰轉面，見到對面屋個關公像，忽發奇想諗起佢嘅故事。係好耐好耐以前嘅三國時代，關公……即係關羽，係天下最揪得嘅武將之一。不過，由於佢鍾意拂 鬚，拂鬚嘅時間多過打仗，已經冇人記得佢斬過顏良。所以，當時一班同佢鎮守荊州嘅同僚，好似同係徐州已經跟劉備嘅麋芳咁，見到關羽被稱為「美髯公」。就成 日私底下同班手下講，「成日話自己打仗咁叻，又唔見佢去打下仗，我跟劉備咁耐，未見過佢殺過幾多個敵人！我跟劉備果陣，佢都唔知係邊呀？（手下提醒︰「將 軍，佢果陣都好似跟緊劉備嫁啦喎！」）咳咳咳！佢成日掛住拂果住鬚，邊同我打咁多次仗呀！正一『拂鬚戰士』！」表面上麋芳唔俾班手下將呢番話傳黎傳去，實際上自己同埋個好同事傅士仁就成日提，次次講起都話關羽「痴線」、「Short Short地」（果時有英文咩？）同埋「拂鬚戰士」。

結果，劉備係漢中打贏左曹操，關羽知道時機到啦！就帶住班士兵出發，臨走前將荊州城，即係南郡，交左俾個表面上好服佢，實際上成日笑佢「拂鬚戰士」嘅糜芳同傅士仁去把守。關羽好快就佔領樊城，圍住曹操係南方嘅辦公室襄陽啦！那邊廂，曹操見勢色唔對，就叫孫權幫手做野。孫權聽到都頭痕，事關關羽真係好好 打，自己都驚左佢。結果，佢就叫左呂蒙黎，「嗱！你唔係以前矇下矇下果個阿蒙黎嫁啦！讀過兵法啦！有招叫做『兵不厭詐』，關羽咁好揪，又佔領左咁多地方， 你自己識做啦！」呂蒙面露一絲奸笑，然後拍拍心口，「無問題主公！呢次一定做得好好睇睇！」

跟住，呂蒙就帶左幾萬吳軍出發去荊州城。途中自己都疑惑，究竟啱啱應承老細時諗條屎橋得唔得，關羽好揪之餘，其實都唔蠢，究竟佢會唔會中計呢？

去到荊州城附近，佢就搵左幾百個吳軍，叫佢地解開盔甲，只係係軍靴度收埋小刀一把，全部人穿上白衫扮醫生同護士…………啊唔係！係商人先啱！去到南郡城下 面。無啦啦咁多醫生同護士…………啊唔係！係商人先啱！黎到城下，蜀軍士兵好奇怪，打左個突，就問佢地阿頭糜芳同(傅)士仁啦！

糜芳同傅士仁就問班人，「喂！你地着晒白衫係城下面做乜呀！」白衫中有個好似阿頭嘅人就答佢︰「糜將軍傅將軍，我地係路經呢度嘅醫生同護士…………啊唔 係！係商人先啱！我地要好攰要換班同入城休息（另一個白衫人用手掙頂一頂阿頭背脊）………啊唔係！我有個伙記心臟病發，想入城睇醫生。你地做下好心，基於 人道立場，開條人道通道俾我入城啦！」糜芳同傅士仁一聽到人道理由喎！心臟病發喎！梗係要人道通道啦！唔理班士兵反對，自己去城門開左條人道通道俾班白衫人入城。

點知班白衫人入左去之後，個個由苦口苦面變得生龍活虎，一個兩個快手快腳面露奸笑，立即用小刀威脅糜芳同傅士仁。糜芳同傅士仁最初雖然好驚，都話︰「保護孩子……啊唔係，係士兵，不離不棄！」跟住呂蒙班大軍就係白衫人開城門之後殺左入黎，呂蒙見到後 心諗，「唔係呀嘛！估唔到呢條屎橋都昆到人？呢次真係好彩」呢個時候，佢見到個樣好硬淨嘅糜芳同傅士仁，就問佢地投唔投降，唔投降就用催……啊唔係！ 係殺左佢地！佢地呢個時候竟然講︰「我覺得我地兩軍之間唔可以一直對立，要保持溝通！」呂蒙聽到後個頭上面多左個燈膽（喂！吹大D 吖！），然後派出談判專 家虞翻出馬。虞翻就話嘞︰「放心啦！只要肯投降，你地一樣係荊州做將軍，官職依舊，俸祿年年加，咁滿意啦！」呢個時候有個好勇嘅蜀軍士兵講︰「當初關將軍 唔去打仗你兩個就話佢係『拂鬚戰士』，依家人地出去同曹軍搏命，你地就投降，算乜野英雄呀？」糜芳同傅士仁呢個時候對望一眼，跟住糜芳就講︰「咁…… 咁……咁呢……妥協就係談判的……的……藝術嘛！」呂蒙見到呢個士兵講得咁啱，隨時影響大局，就以「破壞吳蜀間互信」嘅罪名拖左出去斬。

咁關羽點算？你地應該有睇過歷史書或者《三國演義》掛？

我都知我絕對絕對諗多左，另外一單就長話短說啦！是咁的，從前有個叫波斯帝國嘅國家，佢地文化鼎盛，奴隸眾多，簡直係大國崛起！咁佢地就想將D文化向希臘輸 出，點解輸出去希臘？因為有希臘人幫過佢地手做雇傭兵囉！佢地覺得希臘人應該會同意，話晒大家都是世界公民(唔記得講果時世界好細)嘛！點都可以包容他國 文化，表揚普世價值嘛！咁個皇帝叫做薛西斯一世就同希臘人聯盟講︰「我每日派150個士兵……啊唔係！係有武器自衛嘅平民去你果度傳播一下波斯文化得唔得 呀？」希臘人聯盟當然睬佢都傻，乜野叫做有武器自衛嘅平民呀？語言偽術咩！

點知薛西斯一世見偷雞失敗，一怒之下決定玩大 佢，浩浩蕩蕩派左十萬大軍殺去希臘。希臘人聽到反應不一，係希臘城邦聯盟會議中有個代表就話︰「我地溝通嘅大門唔可以就咁關閉，要持續溝通先有共識！」有 個城邦嘅代表就話︰「我地要和平理性非暴力非粗口！」有個城邦嘅代表就話︰「既然大家各執一辭，不如我地擇日再開另一個會，商討下我地有乜野分歧，然後再 商討下分歧嘅重點，再商討下分歧嘅重點之間嘅差異，再諗下點樣去縮窄差異……」呢個時候，代表斯巴達嘅列奧尼達一世當然睬佢地都有味！自己返斯巴達班兵同 波斯軍死過。

點知佢一返到去斯巴達元老院會議就有元老同佢講︰「喂！你自己衝好啦！村……國民唔係咁諗！你唔可以代表國家 出兵！」列奧尼達一世失望到爆，諗住呢次大家都係等死之際，有300個唔怕死嘅勇士竟然同佢講︰「國王，冇事嘅！我地查過，只要佔領溫泉關呢個要地，任佢 地有幾多士兵，我地都守得住一段時間，只要時間一長，其他城邦嘅國民應該會組織黎支援我地！就黎死！都死得有價值！」列奧尼達一世聽到精神一振，就同班元 老講，話自己要同呢300個保鑣去行下。

一行人好快去到溫泉關，竟然比波斯兵自到，立即做好守備功夫。過左幾日，守備功夫 完成，呢個時候有個希臘漁夫經過。佢同列奧尼達一世講︰「喂！你係乜水呀！你知唔知我日日都要爬過呢個山返工嫁！你唔搵食啫！我要搵食嫁！仲日日下晝係度 大嗌『Spartan Spartan』咁，知唔知嘈住我訓教！我相信波斯人統治我都唔會咁嗌法嘈生晒囉！」列奧尼達一世冇理佢，佢知道有好多野依家做左一定會俾人反對，等佢地 成功左呢班反對嘅人就唔會再出聲。

過左冇耐，波斯大軍真係到左，事情亦一如當初300勇士之一所講。溫泉關如果加左防禦工 事，真係一夫當關，萬夫莫開！呢個時候薛西斯一世好心急，佢驚拖下拖下真係會有其他希臘人黎幫手，唔先攻破呢度，統一希臘嘅夢就會碎！呢個時候佢手下話捉 到一個希臘漁夫，個希臘漁夫話臨死前有野想同佢講。薛西斯一世見到竟然有希臘人咁夠膽，就見一見佢，問佢有乜野遺言。希臘漁夫就話嘞︰「我可唔可以唔死？ 如果我幫你手拆左D防禦工事，你就放過我啦好冇？」薛西斯冷笑左一聲。希臘漁夫流左滴冷汗出黎，再講︰「好啦！大王，我諗到個方法幫你通過溫泉關，如果成 功左，我可唔可以唔使死先？」薛西斯眼前一亮，然後話︰「不但唔使死，估有官你做！」

第二日希臘漁夫就去到列奧尼達一世面 前講，「國王，你地係正義之師黎嫁嘛！正義之師真係講人道啦！你地依家D防禦工事搞到呢度咁窄，好難出入嫁嘛！你知啦！敵人都係人，都係你鄰舍，鄰舍病左 都要睇醫生。你知十萬人咁多，隨時會有乜野冬瓜豆腐要睇醫生，睇醫生最快果條路就係溫泉關啦！就咁，對面薛西斯一世就想問你可唔可以拆左D工事，留條人道 通道俾波斯兵去睇醫生呢？」列奧尼達一世聽到覺得有D唔妥，但呢個時候300勇士中有幾個就異口同聲話︰「國王，佢講得好啱！為左打仗，輸左斯巴達人嘅素 質，值得咩？」就係咁，列奧尼達一世就讓左條通道出黎……

最終結果，都係睇下歷史書，或者去睇返《戰狼300》都知嫁啦！

作者：思賢

一位社會上的小角色，愛思考，希望別人亦能多思考

閱讀後覺得好，請多多讚好及分享～：）