我地唔可以學獌咁領先三比一倒輸三比五俾李斯特城

我討厭階段性勝利，更討厭反勝為敗。就好似曼聯兩星期前咁，對升班馬李斯特城好地地領先三比一，跟住畀人變招攻入一粒就自亂陣腳，最後反輸三比五咁，感覺比起上季畀曼城技術性擊倒更差。唔夠人砌，輸係意料中事，但大好形勢之下輸突，我真係唔能夠接受。

九月中我出發去旅行，嗰時大家都睇死佔中冇運行，學生罷課一星期都只會係小圈子玩意。周融嗰陣應該仲好得戚。

半個月之間，形勢因為警隊誤判而逆轉，但開心嘅時間通常過得特別快。新聞焦點由警察動武變成商戶生計受影響，好快就變成學生冇上堂一個星期學習進度受影響，家長擔心影響成績，之類。

村民好現實，剎那激情之後，磨爛蓆都唔係辦法。唔好令到民意背向。迫到政府埋檯已經係比想像中好嘅結果（政府繼續不聞不問等你民氣退燒都得），而家應該集中留意學聯談判到啲乜，對政改諮詢帶來咩改變。如果係公開討論，市民發現政府根本冇誠意埋檯傾，可以再將行動升級。如果係閉門討論，學聯要將訴求同討價還價過程清楚交代，民主黨前車可鑑。

咁當然，你可以問我，政府如果真係hea 傾，咁點先？如果大眾對於政府假談判真拖延嘅做法無動於衷，我都冇咩好提議。點樣去再次引起大眾嘅關注，每位活躍於社交網絡同網媒嘅朋友都責無旁貸。

至於再衝擊，迫到警察用橡膠子彈，效果都唔會大得過先前防暴警察施放催淚彈。呢個係觀感上嘅問題。即使 touchwood 有示威者傷亡，都要警察又冇穿冇爛，先可以再喺輿論上爭鋒。萬一差人有咩損傷，到時又好似大舊咁畀啲正義傳媒追打，就真係喊都無謂。

作者：中佬

中佬，三十而立，最怕香港濕立立

閱讀後覺得好，請多多讚好及分享～：）