遮打運動今日後的沙盤推演

藍皓 攝

藍皓 攝

 

以下純粹沙盤推演,冇憑冇據唔好鬧我。

 

今晚全港周圍都起風:

1) 梁振英喺錄音講話表明星期一公務員要返到政府總部,港台英文同外媒都理解為清場前嘅最後通牒。

2) 天主教區極高層、新聞行政人員協會(又係班大粒)以至學民思潮、羅致光同李慧琼都呼籲記者同集會人士提高警覺甚至及早疏散,當中又以羅博士「含淚」呼籲、免致「無人可阻止」的事情發生最具戲劇性。

3) 林忌引述消息指梁振英會見傳媒高層,明令聽日對警察報道輕手啲。

4) 多個電子傳媒引述警方高層表示,如非示威者衝擊,無意「今晚」清場。 (你話過咗12點唔計我就冇符)

 

如果政府係鐵板一塊,一心諗住打鑊你班示威者,咁結果就係血腥清場。呢啲阿媽係女人嘅,唔駛我多講。 (咁你又講!)

但如果政府內部都有鷹派、鴿派之分,咁上述嘅亂象,連同早幾日政府一啖砂糖一桶屎嘅策略,加埋就有古講。

 

1) 鷹派係邊個唔駛多講,動用防暴隊同施放催淚彈成就獲得之後,佢當然想再下一城。猜想警隊一哥殺紅眼都係一夥。

2) 鴿派,有能力同鷹派老大抗衡嘅人,五隻手指數得晒。由警隊一哥近日火絕跡鏡頭前,猜想佢畀公務員之首投閒置散。由黎棟國激動反駁警氓勾結論,猜想黎生都好不滿有人動用黑勢力搞局。由林鄭準備同學聯但轉頭發生暴亂導致學聯反檯,猜想有人唔想佢傾,林鄭應該咳咗好多聲。

3) 學聯今晚發聲明要求政府承諾徹查警隊辦事不力、可以同林鄭傾唔會同梁振英,畀咗位自己落台重返談判桌。猜想鷹派見到日前旺角動武嘅心血快將付諸流水,遂立定決心下星期一前煞科。

4) 戴耀廷呢個moment 冒住畀大眾鏟到上天台嘅風險,提出開路畀公務員返政總開工。猜想唔係佢一個人天真或戇居嘅諗法,而係有人提出嘅展開談判嘅籌碼。戴生都醜咗咁耐,唔爭在做多次醜人,亦符合梁振英「開路畀公務員返工」嘅訴求,免招人口實。

5) 默克爾即將會見中國總理李克強。中共會唔會想喺同歐盟大家姐之前血洗香港,引致國際壓力,連同原本可能簽訂到商貿協議都攞唔到?未必。一出解放軍,習總就上身。梁振英想陷習總於不義,邊個派系會得益呢?

6) 從北京到香港,喺今次佔領行動/革命入面,都有鷹鴿角力,檯底嘅對話同談判大家睇唔到,但面嗰浸就係有人唔想有空間談判,有人想留位談判。唔談判嘅就攬炒,談判就用時間再換空間改變。我唔 buy 佔中三恥,但目前,我贊成開路畀公務員返工。

 

再講多次,以上純屬沙盤推演,如果政府係鐵板一塊,好似林非話齋冇個好人,咁以上都係廢話,大家合埋眼等核爆。

 

作者:中佬

中佬
中佬,三十而立,最怕香港濕立立

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 87237
Date: 2014-10-05 01:53:04
Generated at: 2019-02-17 08:54:30
Permalink: https://www.vjmedia.com.hk/articles/2014/10/05/87237/遮打運動今日後的沙盤推演