25歲以後

(photo via cc Flickr user Kristaps Bergfelds)

(photo via cc Flickr user Kristaps Bergfelds)

 

「喂,做咩咁灰啊?」
「無啊,我諗緊自己將來應該點,我好擔心自己儲唔到錢買樓結婚。」
「車!你唔駛擔心喎,因為一定買唔到!」
「_,講呢d!正面d得唔得啊你!」
「我都係講事實,事實係殘酷,唔到你唔接受。」

 

以前我覺得只要努力讀書,考入大學,畢業後找份好工,再努力工作,假以時日,便可以買樓結婚生兒育女,就像以前父母做的一樣,可是現在大環境已轉變,樓價高得遙不可及,人工卻連通漲也追不上,較年長的朋友或姨媽姑姐經常勸我要早點為自己計劃將來,別行冤枉路,可是「將來」又可以如何計劃?又到唔到我地去計劃?

以小盛女為例,雖沒一技之長,但勝在吹水叻,所以一畢業便到Event公司做Marketing,這一行不像會計、工程及IT這些行業需要專業知識,只要你溝通能力好、應變能力強,肯搏肯捱,便有機會投身這個行業,可是Event這一行加班無極限,人工又唔見得高,我總不能捱過世,轉工?又可以轉去邊?我實在想不透。

 

就當我永世做Marketing,由assistant升到officer再升到senior又甚或是咁好彩升到manager,人工都可能只有2、3萬,日日做到隻狗咁,到頭來首期都儲唔到,真係諗起都一額汗,最後我想了十萬九千次,只有兩個辦法可以解決以上問題,一係中六合彩,一係嫁個有錢人,完。其實有時真的不能責怪港女們現實,講真,有邊個唔想婚後做少奶奶唔駛捱?番工受完氣,放工仲要煮飯湊仔你估真係咁易?錢唔係萬能,但無錢就萬萬不能。莫講話女人,有不少男性朋友也說一生志願是娶個有錢人唔駛捱,不過呻還呻,呻完大家都係會回歸現實努力工作賺錢養自己,這就是香港人。

既然兩個辦法都是靠彩數又不切實際,那倒不如試試險中求勝,於是我最近開始請教朋友有關買賣股票的事。甚麼是限價盤、市價盤,如何計算買一手要多少錢,由最基本學起。沒辦法,我是個不折不扣的文人,閒時看書寫文,吃喝玩樂,根本從沒有想過要認識股票這回事,直至踏入25歲以後,才突然發覺勢色不對,原來現在靠努力工作已不足以令我買樓,看著身邊朋友開始為著自己定立的目標而努力,有的計劃創業、有的不斷進修增值自己,以求找到高薪厚職,當然也有的不斷裝扮自己,以求吊到金龜。人各有志,但請記住時間從來不等人,自25歲以後,開始計劃一下自己的將來吧。

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 89981
Date: 2014-11-05 16:50:35
Generated at: 2022-09-28 13:55:58
Permalink: https://www.vjmedia.com.hk/articles/2014/11/05/89981/25歲以後