區議會系列之:自動當選研究

政治 / 最新文章綜覽

大家唔該起立、升國旗、奏國歌!

唔睇真啲都真係唔知:原來全港76個「自動當選」嘅尊貴區議員,除咗一個係民主黨代表之外,其餘幾乎清一色係「愛國」人仕!當然,仍然有極少數獨立人仕背景待查,而小弟年紀老邁,未必有咁好眼力逐個睇,各位年青力壯嘅香港人,唔該你哋「自己執生」,睇真啲我有冇眼大眼過籠,或者睇錯睇漏,多多指正,千祈唔好「點錯相」!

有部份自動當選嘅議員,又真係毫無問題嘅,例如淘大花園嘅議員,當年沙士期間真係同街坊同生共死,無說話好講。另外一批鄉紳,真係本土人仕,當選亦係無乜懸念。

不過仍然有好多「好似獨立」嘅人仕,又真係唔知「埋邊堆」?例如葵青嘅黃耀聰,報稱獨立,不過財政就似乎唔多獨立,做乜鬼「獨立」到要搬入去被委任嘅議員,民建聯嘅方平同志同一個辦事處呢吓?又更奇怪嘅係,方平點解又要被委任而唔係自己出選呢?係咪費事選唔到就瘀爆?Comeon,咁大個人,面對下選民都唔使驚嘛。

 

另外,有啲真係好似搵唔到破綻嘅人,終於都係黨嘅偉大號召之下,忍唔住要「露一手」,例如東區嘅羅榮焜,由於冇乜功課可以交,於是乎在「落閘」方案一出之下,自動獻身,動議「支持」,咁瞓身,終於令到各位愛國人仕另眼相看!

至於詳細清單未睇之前,各位唔該有定心理準備,因為當中有部份人仕,最近言行極之出位,千祈唔好順手打爛你而家睇緊嘅mon,部電腦係無辜嘅。

例如:最近「嚴正催促法庭對旺角街霸頒出禁制令」嘅仗義律師陳曼琪女士,原來唔止係民建聯嘅黨員,更加係代表民建聯出任黃大仙選區議員,當然,喺黨嘅溫情擁護之下自動當選,自然義不容辭要為黨出生入死咁啦,請鼓掌。

 

至於有部份愛國人仕,其實真係好鬼死委屈,唔知點解,打死都唔肯企出前線暴露真身。最神奇係觀塘嘅鄧咏駿同志,竟然回歸咗十七年,都仲係隱姓埋名做地下黨。今時今日乜嘢世界呀?黨經已一統香江,做乜嘢咁低調呢?搞到我要查美國嘅網站先至睇到你嘅愛國義舉?查「鄧咏駿,又名鄧詠駿,又寫作邓咏俊」,報稱獨立,其實係廣西省政協。更有愛國熱線指出,鄧同志是地下黨員,以「香港新青年論壇」身份活動,專門招攬青年入黨,更加用公帑安排多次愛國考察團,去到北美咁遠。咁鬼落力,又何必收收埋埋呢?

講多無謂,大家自己睇。

 

各位:燈燈燈凳…..自動當選清單如下

螢幕快照 2014-11-13 上午4.52.45螢幕快照 2014-11-13 上午4.52.51螢幕快照 2014-11-13 上午4.53.07

 

作者:蕭少滔

蕭少滔
香港中文大學工商管理學院本科生校友會會長、 (前) 香港中文大學學生會辯論學會首席顧問、香港中文大學辯論隊校友會主席、香港中文大學工商管理學院 (國際商業/法律) HEC School of Management Paris, (Financial Engineer, Geopolitics) 恒生商學書院 香港華仁書院

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 90715
Date: 2014-11-13 05:18:48
Generated at: 2021-06-16 15:53:58
Permalink: https://www.vjmedia.com.hk/articles/2014/11/13/90715/區議會系列之:自動當選研究